E paruru anei oe i te Parau a te Atua?
1 I roto i te hoê ao o te faahapa pinepine ra i te Bibilia, te paturu ra te mau Kerisetiano mau ma te itoito rahi i te Parau a te Atua. I te mea e ua papu ia tatou e “te mau Papai atoa, e mea faaurua ïa e te Atua,” te farii ra tatou i to Iesu Mesia manaˈo, o tei haapapu i roto i ta ˈna pure ia Iehova: “O to parau na te parau mau.” (Tim. 2, 3:16, MN; Ioa. 17:17) E nafea tatou e nehenehe ai e paruru ma te manuïa i te Parau a te Atua?
2 A haapii i te mau Papai: Aita e feaaraa, ua haapii maitai Iesu i te Parau a te Atua. Ua tauturu te reira ia ˈna ia haapii i nia i te mau Papai i te roaraa o ta ˈna taviniraa. (Luka 4:16-21; 24:44-46) E nafea tatou e nehenehe ai e haamanaˈo i te pueraa irava tano? E na reira tatou na roto i te taioraa i te Bibilia i te mahana taitahi e te feruriruriraa i muri iho i te hoê irava ta tatou i ite e mea faaitoito iho â aore ra mea faufaa no te taviniraa. Ia faaineine tatou no te mau putuputuraa, e mea tia ia imi e ia taio tatou i te mau irava i faahitihia i roto roa i te Bibilia e ia faaineine paha i te hoê tatararaa i nia i te reira. Ia haere tatou i te mau putuputuraa, e mea tia ia pee tatou i roto i ta tatou Bibilia a taio ai te taeae orero i te mau irava. E tauturu te haapiiraa i te mau irava bibilia ia tatou ia ‘tufa i te parau mau ma te tia.’—Tim. 2, 2:15.
3 A vaiiho i te Bibilia ia paraparau: A haere ai tatou i roto i te taviniraa, e mea tia ia vaiiho tatou i te Bibilia ia paraparau. Ei hiˈoraa, mai te peu e e faatia te mau tupuraa, e mea tia ia tutava tatou i te faaite i te hoê irava i te fatu fare. Ia tuu oia i te hoê uiraa aore ra ia faahiti i te hoê patoiraa, e mea maitai roa ˈˈe ia faaohipa i te Bibilia no te pahono atu. I te taime e mea rahi te ohipa a te fatu fare, e nehenehe â tatou e haamahitihiti i te hoê manaˈo bibilia ma te parau atu e: “Hou vau e haere ai, e hinaaro vau e taio atu i teie irava.” I te mau taime atoa e nehenehe ai, a taio roa ˈtu i roto i te Bibilia, ia ite te taata e faaroo ra i te irava ta oe e taio ra.
4 I to te hoê fatu fare faaiteraahia ˈtu te mau irava e patoi ra i te Toru tahi, ua parau oia e, “Ua haere au i te fare pure i to ˈu oraraa taatoa, e aita iho â vau i ite e te parau ra te Bibilia i te reira!” Ua farii oioi oia i te hoê haapiiraa bibilia. Ua parau Iesu e e faaroo mai ta ˈna mau mamoe i to ˈna reo. (Ioa. 10:16, 27) Te ravea maitai roa ˈˈe no te feia aau haavare ore no te farii i te parau mau, o te iteraa ˈtu ïa i te reira i roto roa i te Bibilia. E riro anaˈe ïa ei feia paruru i te Parau mau a te Atua!