E faaite anaˈe i te anaanatae mau—ma te poro ma te pae tahi ore
1 Ua ite orama te aposetolo Ioane i te hoê melahi e maue ra na ropu i te reva ma te poro i te evanelia mure ore i te feia o “te mau fenua atoa, e te mau opu atoa, e te mau reo atoa, e te mau nunaa atoa.” (Apo. 14:6) Te pee ra anei tatou i te hiˈoraa o te melahi ma te poro ma te pae tahi ore? Ma te ite ore, e nehenehe tatou e faatupu i te huru pae tahi. E nehenehe to tatou huru i nia i te taata e ohipa i nia i ta tatou faaiteraa ia ratou i te parau apî maitai. No reira, e titauhia ia faaite tatou i te anaanatae î i te here mau ia poro tatou i te mau taata oraraa taa ê.
2 A hiˈo i ta oe tuhaa fenua: E taata i faarue i to ratou fenua aore ra e taata horo ê anei o te faaea ra i ta oe tuhaa fenua? E nehenehe ratou e moe-ohie-hia ia tatou. No reira, a imi ia ratou e a tamata i te haamatau maitai aˈe ia ratou. Eaha to ratou mau hinaaro e ta ratou mau tapitapi, ta ratou e au e e au ore, ta ratou e mǎtaˈu e to ratou mau manaˈo oti noa? A tutava i te faatano i ta oe faaiteraa i te poroi o te Basileia ia au i te reira. (Kor. 1, 9:19-23) Mai te aposetolo Paulo, e mea tia ia taa ia tatou te titauraa e tufa i te parau apî maitai na te mau taata atoa o ta tatou tuhaa fenua, te feia atoa o te hoê fenua ê, mea taa ê te taˈere, e paraparau ra i te tahi atu reo, aore ra e mea ona roa.—Roma 1:14.
3 E nafea tatou e poro ai i te hoê taata e paraparau ra i te tahi atu reo? A faaohipa maitai i te buka iti ra Une bonne nouvelle pour des gens de toutes nations. E nehenehe atoa oe e rave i te tahi atu api parau aore ra buka rairai na roto i te reo e paraparau-pinepine-hia ra i ta oe tuhaa fenua. (A hiˈo i Ta tatou taviniraa i te Basileia no Tiurai 2003, api 4, par. 2-3.) Hau atu â, te tutava ra te tahi feia poro i te haapii i te aroha e te hoê faaiteraa ohie na roto i te tahi atu reo. E pinepine e maere te mau taata i te faaroo i te hoê taata e tamata ra i te paraparau ia ratou na roto i to ratou iho reo, noa ˈtu e mea iti roa, e e nehenehe ratou e anaanatae i te parau apî maitai.
4 A pee ia Iehova: Ma te poro i te mau taata oraraa taa ê, e pee tatou i to tatou Atua pae tahi ore ra o Iehova, “o tei hinaaro i te taata atoa ia ora, e ia noaa te ite i te parau mau.”—Tim. 1, 2:3, 4.