E faaohipa anaˈe i te mau ravea ite-mata-hia no te haapii atu
1. Mea nafea to Iehova faaohiparaa i te mau ravea ite-mata-hia no te haapii i ta ˈna mau tavini no tahito ra, e eaha te faahopearaa?
1 No te faaite i te mau haamaramaramaraa faufaa i ta ˈna mau tavini no tahito ra, ua faaohipa Iehova i te tahi mau taime i te mau orama e te mau moemoeâ. A haamanaˈo na i ta Ezekiela orama no nia i te pereoo i te raˈi o Iehova. (Ezek. 1:1-28) A feruri na i te huru o Daniela i muri aˈe i to ˈna fanaˈoraa i te moemoeâ parau tohu e faataa ra i te tereraa o te mau puai o te ao nei. (Dan. 7:1-15, 28) E eaha ïa no nia i te faaiteraa faahiahia “na roto i te mau tapao” i te aposetolo Ioane no nia i te mau mea e tupu i te roaraa o “te mahana o te Fatu”? (Apo. 1:1, 10, MN) Ua haapii Iehova ia ratou ma te faaohipa i te ohipa puai e ma te û oraora, e ua mau roa te reira i roto i to ratou feruriraa.
2. Eaha te mau ravea ite-mata-hia ta tatou e nehenehe e faaohipa no te haapii ia vetahi ê i te pue parau mau bibilia?
2 Ia hinaaro tatou e faaite i te pue parau mau bibilia ia vetahi ê a ore atu ai e moe ohie ia ratou, e nehenehe tatou e faaohipa atoa i ta tatou mau video no te haapii atu. Ua rau te tumu parau i roto i ta tatou mau video e o te patu i te tiaturi i te Bibilia, i te faanahonahoraa a Iehova, e i te mau faaueraa tumu o te haamaitai i te oraraa Kerisetiano. E hiˈo anaˈe na i te tahi mau ravea e nehenehe ai tatou e faaohipa i ta tatou mau video no te haapii atu. Teie te tahi mau video e nehenehe e faaohipahia.
3. Eaha ta outou e nehenehe e faaohipa no te aratai i te hoê piahi Bibilia i te faanahonahoraa?
3 I roto i te taviniraa: Ua parau anei outou i te hoê piahi Bibilia no nia i to tatou fetii taeae Kerisetiano i te ao nei? A faaite atu ia ˈna maoti te video Toute la communauté des frères. A horoa atoa ˈtu ia ˈna ia mataitai oia hou ta orua haapiiraa i mua nei aore ra a mataitai orua i te hoê taime haapiiraa i mua nei. E a hiˈopoa i te mau uiraa haamanaˈoraa o Ta tatou taviniraa i te Basileia no Titema 2003.
4. Eaha te mau mauhaa haapiiraa ta te hoê Ite apî e nehenehe e faaohipa i te haapiiraa?
4 E te feia apî, e nehenehe outou e paraparau i ta outou orometua haapii i te ravea e faaite ai i ta outou piha haapiiraa i na video La fermeté des Témoins de Jéhovah face à la persécution nazie aore ra Fidèles dans les épreuves—Les Témoins de Jéhovah en Union soviétique. A pûpû i te faaineine i te hoê api parau uiraa na te piha haapiiraa, ma te faatano i nia i te mau uiraa o Ta tatou taviniraa i te Basileia no Tiunu 2001 aore ra no Tetepa 2004.
5. Eaha ta te mau metua e nehenehe e faaohipa i roto i te mau haapiiraa utuafare?
5 E te utuafare e te mau hoa: E te mau metua, a feruri i te taime hopea a mataitai ai ta outou mau tamarii i te video Les jeunes s’interrogent . . . Comment se faire de vrais amis? No te aha e ore ai e mataitai faahou atu i ta outou haapiiraa utuafare i mua nei? Te horoa ra Ta tatou taviniraa i te Basileia no Atopa 2002 i te mau uiraa no te hoê aparauraa oraora e te huna ore.
6. E nafea outou e nehenehe ai e faanaho i te hoê taime faaitoito e te mau hoa?
6 E hoa anei to roto i te amuiraa ta outou i hinaaro e titau manihini i te fare? E riro te po mataitairaa i te video Respectons l’autorité de Jéhovah, e vai nei na roto noa i te reo Beretane, ei mea faaitoito, mai te peu iho â râ e e hiˈo faahou outou i muri iho i te mau haapiiraa e huti mai, ma te faaohipa i te mau uiraa i neneihia na roto i te reo Beretane o Ta tatou taviniraa i te Basileia no Tetepa 2004.
7. Eaha te mau taime ta outou e manaˈo ra e e nehenehe outou e faaohipa i ta tatou mau video?
7 Te tahi atu mau taime: E nafea ˈtu â outou e nehenehe ai e faaohipa i ta tatou na video e 20? E tauturu anei te faaiteraa hoê aore ra e piti o te reira i te hoê taata ta outou e farerei tamau ia ˈna ia haere i mua i te pae varua? E nehenehe anei outou e pûpû i te faaite i te mau video i te hoê fare ruau aore ra te hoê pu no te ruhiruhia? E tauturu anei te mau video i to outou mau fetii e ere i te Ite, te feia tapiri, e te mau hoa ohipa ia faatura ia outou? E ravea maitai ite-mata-hia ta tatou mau video, e te haamaere, e te horoa i te haapiiraa. A faaohipa i te reira no te haapii atu.