Te feia apî o te anaana maite nei mai te mau tiarama
1. E nafea te Bibilia e faaite ai e e ite-maitai-hia te mau Kerisetiano, e e nafea teie mau parau e au ai i te feia apî Kerisetiano i teie mahana?
1 Ua parau Iesu i ta ˈna mau pǐpǐ e: “O outou te maramarama o teie nei ao.” (Mat. 5:14, 16) Mai te hoê oire i nia i te hoê tupuai aivi, e anaana i raro aˈe i te mahana, e ite-maitai-hia ratou. I teie mahana, ‘te anaana maite nei’ e rave rahi Kerisetiano apî “mai te mau tiarama o te ao nei” na roto i to ratou haerea tia e ta ratou pororaa itoito rahi.—Phil. 2:15; Mal. 3:18.
2. Eaha vetahi mau ravea e nehenehe ai outou e poro i te mau orometua haapii e te mau hoa haapiiraa?
2 I te fare haapiiraa: E nafea outou e nehenehe ai e poro i te fare haapiiraa? Ua haafaufaa vetahi feia apî i te mau tauaparauraa a te piha no nia i te mau tumu parau mai te raau taero, te tauiuiraa o te mau mea ora, e te Taparahiraa a te mau Nazis—no te faahiti i te tahi noa. Ua faaohipa te hoê tuahine i te hoê parau haapiiraa i faauehia ia ˈna ia papai no nia i te totoaraa no te poro i te Basileia o te Atua ei tiaturiraa mau no te huitaata. Ua maere te orometua haapii i te faataaraa feruri-maitai-hia, e ua faatupu te reira i te hoê faaiteraa hau.
3. E nafea outou e nehenehe ai e vaiiho i to outou maramarama ia anaana maite i te fare haapiiraa na roto i to outou haerea?
3 Te tahi atu ravea no te anaana maite ei tiarama, o to outou ïa haerea e to outou faaahuraa e to outou faaneheneheraa faaieie ore. (Kor. 1, 4:9; Tim. 1, 2:9) Ia ite te mau piahi e te mau orometua haapii e mea taa ê to outou huru, e nehenehe vetahi e faataehia mai i te parau mau ei faahopearaa o to outou haerea maitai roa e horoa ˈtu ai ia outou i te ravea no faaite i te pue parau mau bibilia. (Pet. 1, 2:12; 3:1, 2) E ere paha i te mea ohie ia faaite i te hoê haerea paieti, e haamaitai rahi mai râ Iehova ia outou. (Pet. 1, 3:16, 17; 4:14) No te faaara i te anaanatae i te parau apî maitai, e nehenehe outou e taio i te mau papai bibilia i te mau taime faafaaearaa aore ra e vaiiho i te reira i te mau vahi e nehenehe vetahi ê e ite atu.
4. Eaha te tahi mau maitai ia poro i te fare haapiiraa?
4 E haapuai te anaana-maite-raa o to outou maramarama i te fare haapiiraa i to outou faaroo e e tauturu ia outou ia haapeu i te taviniraa ia Iehova. (Ier. 9:24) E riro atoa te reira ei parururaa. Ua parau te hoê tuahine e, “Te hoê maitai ia paraparau no nia i ta ˈu mau tiaturiraa, eita ïa te mau piahi e tamata i te faahepo ia ˈu ia rave i te mau mea e ore e au i ta te Bibilia e parau ra.”
5. (a) E nafea vetahi feia apî e faaaano ai i ta ratou taviniraa? (b) Eaha ta outou mau fa pae varua?
5 Te hoê taviniraa aano atu â: Te tahi atu â ravea e anaana maite ai e rave rahi taata apî ei tiarama, o te faaaanoraa ïa i ta ratou taviniraa. I te otiraa ta ˈna tau haapiiraa tuarua, ua haere te hoê taeae e tavini i te vahi i hinaaro-rahi-aˈe-hia ˈi te feia poro i te Basileia. To roto o ˈna i te hoê amuiraa nainai hoê anaˈe matahiapo. “Te ora nei au i te mau taime oaoa roa o to ˈu oraraa i ǒ nei,” ta ˈna ïa i papai atu i te hoê hoa. “Mea au roa te taviniraa! E tauaparau matou fatata e 20 minuti i te uputa taitahi no te mea e hinaaro te taata e faaroo i te mau mea atoa ta oe e nehenehe e faaite atu.” Ua na ô faahou oia e: “Te hinaaro noa nei au ia fanaˈo te feia apî atoa i teie huru tupuraa e ia ite i ta ˈu e ite ra. Aita ˈtu e mea maitai aˈe ia tavini ia Iehova ma te mau mea atoa e vai ra ia tatou ra.”
6. Te haapeu ra outou i te aha i ǒ te feia apî ra o ta outou amuiraa?
6 Auê matou i te haapeu ia outou te feia apî o te anaana maite nei ei tiarama o teie nei ao e! (Tes. 1, 2:20) A tavini ai outou ia Iehova ma to outou aau, nephe, manaˈo, e puai atoa, e ooti outou ‘e hanere atu i teie nei ao, e i te ao to muri ra, o te ora mure ore ïa.’—Mar. 10:29, 30; 12:30, MN.