“Ua fatata te faaoraraa”—Tairururaa mataeinaa 2006 a te mau Ite no Iehova
1. Mea nafea vetahi mau tavini a te Atua i tahito ra i te faaiteraa e ua haafaufaa rahi roa ratou i te haamoriraa mau, e e fanaˈo atoa tatou i teihea ravea i teie tau?
1 Ua tono Hezekia, arii o Iuda i tahito ra, i te mau vea no te horoa tino roa ˈtu i te mau rata o te titau ra i te nunaa ia putuputu mai i Ierusalema. (Par. 2, 30:6, 13) Na te pahonoraa a te mau Iseraela i faaite i to ratou huru i mua i te haamoriraa mau. (Par. 2, 30:10-12) I teie mau avaˈe e haere mai nei, e hoê â ravea ta te mau tavini a Iehova no teie tau no te faaite e te haafaufaa rahi roa ra ratou i te fanaˈoraa taa ê e putuputu mai no te haamori i to ratou Atua. E rata tei haponohia ˈtu i ta outou amuiraa e titau manihini ra ia outou ia haere i te tairururaa mataeinaa “Ua fatata te faaoraraa.” Eaha ta outou pahonoraa i tera titau-manihini-raa?
2. Eaha ta tatou e nehenehe e rave i teie nei ia faufaa rahi tatou i te tairururaa?
2 A faanaho ia outou iho i teie nei: Ia faufaa rahi tatou i te porotarama pae varua i faaineinehia ma te here, e titauhia ia tae mai tatou no te porotarama taatoa. A haamata i teie nei ma te paari i te rave i te mau faanahoraa atoa e hinaarohia no outou e to outou utuafare ia tae outou i na mahana tairururaa e toru atoa. (Mas. 21:5) I roto i tera mau faaineineraa, e mea tia paha ia ani outou i ta outou paoti ohipa i te mahana faaearaa ohipa, ia faaite i ta outou opuaraa i to outou hoa faaipoipo e ere i te Ite, ia tarahu i to outou piha hotela, e ia tauturu i te mau piahi Bibilia ia tae mai i te mahana taitahi. Eiaha e tiai i te taime hopea no te rave i teie mau taahiraa faufaa. A faahiti râ i te reira i roto i te pure ia Iehova, ma te tiaturi e “na ˈna e faatupu i te reira.”—Sal. 37:5.
3. No te aha e mea tia ˈi ia faatura tatou i te mau faanahoraa i ravehia no te tairururaa?
3 Na te mauruuru no te mau tutavaraa haapae a te mau taeae hahaa, tei paturu i te mau faanahoraa o te tairururaa, te tâuˈaraa ˈtu i to tatou mau hoa e tairuru mai, e te faaturaraa i te faanahoraa teotaratia, e turai ia tatou ia auraro i te mau aratairaa e horoahia ra i roto i teie tumu parau.—Kor. 1, 13:5; Tes. 1, 5:12, 13; Heb. 13:17.
4, 5. Teihea mea faufaa ta tatou e haamanaˈo ia tarahu tatou i te hoê piha hotela, e no te aha? (A faaô mai i te tumu parau tarenihia i te api 4.)
4 Tarahuraa i te piha hotela: Mea faufaa ia tarahu noa i te rahiraa piha hotela ta outou e faaohipa mau i te roaraa o te tairururaa. Eiaha e tapea i te mau piha no te tahi atu mau taata e tairuru mai, taa ê noa ˈtu e ua faaau aˈena outou e ua horoa i te mau iˈoa tano. E mea tia ia tapeahia te piha taitahi i nia i te iˈoa o te hoê o te mau taata e faaea ˈtu i roto.
5 Ei haapapuraa i ta outou tarahuraa piha, e mea tia ia aufau outou i ta outou moni tapao no te piha taitahi. Ia ore, e nehenehe te hotela e horoa i to outou piha na te tahi atu taata. Mai te peu e, i muri aˈe i to outou niuniuraa i te mau hotela atoa, aita i noaa ia outou te piha, a faaite atu i te papai parau o ta outou amuiraa. E faaara ïa oia i te piha ohipa o te nohoraa o ta outou tairururaa (e eiaha râ i te Betela).
6, 7. E nafea ia haapao i te feia e hinaaro taa ê to ratou?
6 Hinaaro taa ê: Te na ô ra te Maseli 3:27 e: “Eiaha oe e tapea i te maitai i te taata e au ia ˈna ia hopoi ra, tei to rima taua maitai ra ia hopoi.” E nafea outou e nehenehe ai e hamani maitai ia vetahi ê no nia i te tairururaa? Te hinaaro ra paha te mau taeae e tuahine ruhiruhia, te huma, te mau tavini taime taatoa aore ra te tahi atu i te tauturu e au i te pae o te faurao aore ra te nohoraa. Na mua roa, na to ratou utuafare e haapao ia ratou. (Tim. 1, 5:4) Mai te peu râ e eita te utuafare e nehenehe, e tia paha i to ratou mau hoa Kerisetiano ia haapao ia ratou. (Gal. 6:10) E mea maitai ia hiˈo te mau tiaau no te haapiiraa buka i te melo taitahi o te pǔpǔ e hinaaro taa ê to ˈna, ia papu ia ˈna e ua naho ê na te mau mea atoa.
7 E horoahia te mau api parau Demande de chambre pour cas particuliers na te feia poro anaˈe aita e maraa i to ratou utuafare aore ra i ta ratou amuiraa ia haapao i to ratou mau hinaaro. E hiˈopoa te tomite tiaauraa a te amuiraa i te aniraa ia au i te mau faaueraa i faataahia i nia iho i te api parau. E tano teie faanahoraa no te feia poro anaˈe e roo maitai to ratou e e haerea maitai to ta ratou mau tamarii.
8. (a) No te aha mea tia ˈi ia haere tatou i ta tatou iho tairururaa? (b) E nafea mai te peu e e titau to tatou tupuraa ia haere tatou i te tahi atu tairururaa?
8 E haere i te tahi atu tairururaa: Ia navai maitai te parahiraa, te papai, te nohoraa, e te tahi atu â mau mea, te faaitoitohia nei outou ia haere i te tairururaa i titau-manihini-hia ˈi ta outou amuiraa. Mai te peu e e titau to outou tupuraa ia haere outou i te tahi atu tairururaa, a ani i te taeae papai parau o ta outou amuiraa i te mau taio mahana o te tairururaa ta outou e haere atu.
9. E nafea outou e oaoa roa ˈtu â ˈi no ta tatou tairururaa i mua nei?
9 Rima tauturu: Ma te feaa ore, e oaoa rahi roa te taata atoa o te haere i te tairururaa e o te fanaˈo i te maa pae varua e te hoê auhoaraa au mau. E oaoa roa ˈtu â tatou ia horoa tatou i te rima tauturu no te apiti atu i te tere-maitai-raa o te tairururaa. (Ohi. 20:35) Eita te mau tomite tairururaa no ǒ nei e haamarirau i te ani i te rima tauturu. E nehenehe anei outou e haavata ia outou?—Sal. 110:3.
10. Eaha iho â ta outou e au roa i te mau tairururaa mataeinaa i te mau matahiti atoa, e eaha ta outou faaotiraa papu e tia ˈi?
10 I te hoê tairururaa mataeinaa, ua parau te hoê tamaroa iti e pae matahiti e: “Ta ˈu e au roa, i roto i te haamoriraa a Iehova, o te tairururaa mataeinaa ïa.” Te haamanaˈo maira teie parau aau tae i te oaoa ta tatou e fanaˈo ia haere tatou i ta tatou tairururaa mataeinaa i te mau matahiti atoa. Ua tano iho â ta te hoê fatu salamo mau parau i muri nei: “E maitai rahi to te mahana hoê i roto i te mau hezere no oe ra, i te mahana atoa e tausani noa ˈtu i te tahi vahi ê.” (Sal. 84:10) Ua himene Davida i to ˈna hinaaro e ‘parahi â i roto i te fare o Iehova e hope roa ˈˈe o ˈna pue mahana, ia [umere] oia i roto i to Iehova [hiero].’ (Sal. 27:4; MN) Ua oaoa mau â oia i to ˈna haaatiraahia e te feia haamori a Iehova. E faaite anaˈe e te haafaufaa atoa ra tatou i te haamoriraa mau ma te haere i na mahana tairururaa mataeinaa e toru “Ua fatata te faaoraraa.”
[Tumu parau tarenihia i te api 3]
Hora
Mahana pae e Mahana maa
9:30 - 5:05
Tapati
9:30 - 4:10
[Tumu parau tarenihia i te api 4]
E nafea ia tarahu i te piha hotela
1. A niuniu i te mau hotela i te mau hora matararaa.
2. A horoa i te mau taio mahana e tae atu ai e e faarue ai outou i te hotela.
3. A tarahu i te piha e a ani i te hoê numera haapapuraa.
4. A aufau i ta outou moni tapao na roto i te tareta, te parau moni, aore ra te parau tiiraa moni i roto hoê ahuru mahana. Eiaha roa ˈtu e hapono i te moni paari e te moni parau. Ia hapono outou i ta outou moni tapao na roto i te parau moni aore ra te parau tiiraa moni, a papai i te numera haapapuraa i te api aro.
E tia anei ia outou:
◼ Ia tarahu noa i te rahiraa piha ta outou e faaohipa iho â.
◼ Ia tapea noa i ta outou tarahuraa matamua.—Mat. 5:37.