A faaherehere
E faatere anaˈe i te mau haapiiraa bibilia o te paturu i te mau haereraa i mua
E amui teie api hau i te mau manaˈo faufaa o te mau tumu parau no nia i te faatereraa i te mau haapiiraa bibilia o te paturu i te mau haereraa i mua i roto i Ta tatou taviniraa i te Basileia. Te faaitoitohia ra te taatoaraa ia faaherehere i te reira e ia hiˈo atu ia faatere ratou i te mau haapiiraa bibilia. Hau atu â, e nehenehe te tahi mau manaˈo o teie api hau e haamataratarahia i te mau putuputuraa no te pororaa. E nehenehe te mau tiaau no te taviniraa e faaohipa ˈtu no te mau oreroraa parau ta ratou e horoa ia tere ratou na te mau haapiiraa buka.
Tuhaa 1: Eaha te hoê haapiiraa bibilia?
Mai te peu e e aparauraa bibilia tamau ta outou e te hoê taata, noa ˈtu e mea poto, na roto i te faaohiparaa i te Bibilia aore ra i te hoê o te mau papai e titauhia, te faatere ra ïa outou i te hoê haapiiraa bibilia. E nehenehe te haapiiraa e tapaohia i muri aˈe i te piti o te farereiraa i muri aˈe i te faahiˈoraa o tera haapiiraa e mai te peu iho â e e tupu noâ te reira.—km 7/04 api 1.
Papai e titauhia
◼ Eaha ta te Atua e titau ra ia tatou?
◼ Te ite e aratai i te ora mure ore
◼ Adorez le seul vrai Dieu
◼ E nehenehe oe e riro ei hoa no te Atua! E nehenehe teie buka rairai e faaohipahia no te haapii e te mau taata mea iti to ratou ite e aita i ite maitai i te taio.
Tuhaa 2: E faaineine anaˈe i te faatere i te haapiiraa
E mea titauhia ia vauvau i te mau manaˈo e putapû ai te aau o te piahi. E titauhia te hoê faaineine-maite-raa i reira tatou e manaˈo tamau ai i te piahi.—km 8/04 api 1.
E nafea ia faaineine ia outou
◼ A hiˈopoa i te upoo parau, te mau upoo parau iti e te mau tauturu ite-mata-hia o te pene aore ra o te haapiiraa.
◼ A tapao i te mau pahonoraa o te mau uiraa neneihia, ma te reni noa i te mau taˈo e pereota faufaa.
◼ A maiti i te mau irava e taio i roto i te haapiiraa. A tapaopao i te manaˈo rahi i te hiti o te api o te buka.
◼ A faaineine i te hoê haamanaˈoraa poto o te mau manaˈo faufaa.
A faatano i te haapiiraa i nia i te piahi
◼ A pure no te piahi e to ˈna mau hinaaro.
◼ A feruri i te mau manaˈo e mea fifi paha no ˈna ia taa aore ra ia farii.
◼ A ui ia outou iho: Eaha ta ˈna e hinaaro e taa aore ra e faaohipa no te haere i mua i te pae varua? E nafea vau e haaputapû ai i to ˈna aau?
◼ Ia titauhia, a faaineine i te hoê faahohoˈaraa, te hoê faataaraa aore ra te tahi mau uiraa no te tauturu i te piahi ia taa i te hoê manaˈo aore ra te hoê irava.
Tuhaa 3: E faaohipa anaˈe i te mau Papai ma te aravihi
Ta tatou fa ia faatere tatou i te mau haapiiraa bibilia, o te ‘faariroraa ïa i te taata ei pǐpǐ’ ma te tauturu ia ratou ia taa e ia farii i te mau haapiiraa o te Parau a te Atua e ia faaohipa i te reira i roto i to ratou oraraa. (Mat. 28:19, 20; Tes. 1, 2:13) No reira, e mea tia ia niuhia te haapiiraa i nia i te mau Papai.—km 11/04 api 4.
A niu i ta outou haapiiraa i nia i te Parau a te Atua
◼ A faaite i te piahi e nafea ia imi i te mau irava i roto i ta ˈna iho Bibilia.
◼ A hiˈo e a aparau i te mau irava e haapapu ra i te niu bibilia o ta tatou mau tiaturiraa.
◼ A faaohipa i te mau uiraa. Eiaha outou e faataa i te mau irava bibilia a ani râ i te piahi ia faataa.
◼ A faaohie noa i te parau. Eiaha e tamata i te faataa huˈahuˈa roa i te hoê irava. A tatara noa i te hinaarohia no te haamaramarama i te manaˈo.
◼ A huti mai i te mau faaohiparaa e au. A tauturu i te piahi ia ite e nafea te mau irava bibilia e tano ai i to ˈna iho tupuraa.
Tuhaa 4: E haapii anaˈe i te mau piahi i te faaineine
Te hoê piahi o te taio na mua i te haapiiraa, o te reni i te mau pahonoraa e o te feruri e nafea ia pahono na roto i ta ˈna iho mau parau, e pinepine oia i te haere oioi i mua i te pae varua. No reira, ua mau anaˈe te hoê haapiiraa tamau, a faaineine e te piahi i te hoê haapiiraa no te faaite ia ˈna e nafea ia rave. E pinepine, e mea maitai ia faaineine apipiti i te hoê pene aore ra haapiiraa taatoa.—km 12/04 api 1.
Reniraa e tapaopaoraa
◼ A faataa i te piahi e nafea e itea mai ai te pahonoraa o te mau uiraa neneihia.
◼ A faaite ia ˈna i ta outou iho buka haapiiraa i reira to outou reniraa i te mau taˈo aore ra pereota faufaa anaˈe.
◼ A tauturu ia ˈna ia ite e e paturu te mau irava faahitihia atoa i te hoê manaˈo o te paratarafa. A haapii ia ˈna ia tapaopao poto noa i te hiti api o ta ˈna buka haapiiraa.
Haapotoraa e haamanaˈoraa
◼ A faaite i te piahi e nafea ia hiˈopoa i te upoo parau o te pene aore ra haapiiraa, te mau upoo parau iti e te mau hohoˈa hou oia a haamata ˈi i ta ˈna faaineineraa hohonu.
◼ A faaitoito ia ˈna ia hiˈo faahou i te mau manaˈo faufaa hou a oti ai ta ˈna faaineineraa.
Tuhaa 5: E nafea ia faaoti ehia rahiraa paratarafa e hiˈopoa
Tei te neheneheraa e te mau huru tupuraa o te orometua haapii e o te piahi, e itehia ˈi ehia rahiraa paratarafa e nehenehe e hiˈopoahia.—km 1/05 api 1.
A patu i te faaroo puai
◼ Eiaha e faaere i te piahi i te maramarama-maitai-raa i te Parau a te Atua no te hinaaro-noa-raa e haavitiviti.
◼ A rave i te taime e hinaarohia no te tauturu i te piahi ia maramarama e ia farii i ta ˈna e haapii ra.
◼ A rave i te taime e navai no te hiˈopoa i te mau irava tumu, te niu hoi o te mau haapiiraa.
A pee maite i te tereraa tano
◼ Mai te peu e e taata paraparau rahi te piahi no nia i ta ˈna iho mau ohipa, e faanaho paha ïa tatou i te aparau i te reira i muri aˈe i te haapiiraa.
◼ Eiaha e paraparau rahi roa i te roaraa o te haapiiraa. A taotia i te aparauraa i nia i te hoê manaˈo tapiri aore ra i te hoê faatiaraa ia ore te piahi ia fifi i te fanaˈo i te ite mau i te mau haapiiraa tumu o te Bibilia.
Tuhaa 6: Ia ui te hoê piahi i te hoê uiraa
Ia haamau-maitai-hia te hoê haapiiraa bibilia, e pinepine e mea maitai aˈe ia hiˈopoa i te mau haapiiraa bibilia ma te nanai maitai eiaha râ e taui noa i te tumu parau. E tauturu te reira i te piahi ia fanaˈo i te niu i roto i te ite mau e ia haere i mua i te pae varua.—km 2/05 api 6.
A haroaroa
◼ E pinepine, e nehenehe e pahono oioi i te mau uiraa no nia i te mau manaˈo e haapiihia ra.
◼ Te mau uiraa aita roa ˈtu e auraa e te tumu parau e hiˈopoahia ra aore ra e titauhia te tahi mau maimiraa, e nehenehe ïa e pahonohia i te tahi atu taime. E tano ia papai i tera mau uiraa.
◼ Mai te peu e e mea fifi no te piahi ia farii i te tahi haapiiraa, a hiˈopoa i te tahi atu papai o te vauvau huˈahuˈa ra i te reira.
◼ Mai te peu e aita iho â te piahi e papu ra, a vaiiho i te tumu parau no te tahi atu taime e a tamau i te rave i ta ˈna haapiiraa.
A faahaihai
◼ Mai te peu e aita outou e papu ra i te pahonoraa o te tahi uiraa, eiaha e horoa i to outou iho manaˈo.
◼ A haapii riirii i te piahi e nafea ia rave i te mau maimiraa.
Tuhaa 7: Te pure i roto i te haapiiraa
Ia nehenehe te mau piahi Bibilia e haere i mua i te pae varua, e mea faufaa roa ta Iehova haamaitairaa. No reira, mea tano ia haamata e ia faaoti i te hoê haapiiraa papu na roto i te pure.—km 3/05 api 4.
E nafea ia haamata ma te pure
◼ E nehenehe tatou e rave pinepine i te reira ia faatere tatou i te haapiiraa matamua roa a te hoê taata faaroo.
◼ No te tahi atu, e titauhia paha ia haroaroa i te taime tano no te haamata ma te pure.
◼ E nehenehe e faaohipa i te Salamo 25:4, 5 e te Ioane 1, 5:14 no te faataa no te aha e pure ai.
◼ E nehenehe e faaohipa i te Ioane 15:16 no te faaite e mea tia ia pure ia Iehova na roto ia Iesu Mesia.
Eaha te faahiti i roto i te pure
◼ Mea tano ia haamauruuru ia Iehova no te mea o ˈna te Tumu o te haapiiraa.
◼ A faaite i to tatou anaanatae haavare ore i te piahi.
◼ A faaite i to tatou mauruuru no te faanahonahoraa ta Iehova e faaohipa ra.
◼ A ani ia Iehova ia haamaitai i te mau tutavaraa a te piahi no te faaohipa i ta ˈna e haapii ra.
Tuhaa 8: E aratai anaˈe i te mau piahi i te faanahonahoraa a Iehova
Ia faatere tatou i te mau haapiiraa bibilia, ta tatou fa e ere noa no te faaite i te mau haapiiraa tumu, no te tauturu atoa râ i te mau piahi ia riro ei melo o te amuiraa Kerisetiano. I te hebedoma taitahi, a rave tau minuti i te roaraa o te haapiiraa no te faaite i te hoê manaˈo no nia i te faanahonahoraa a Iehova.—km 4/05 api 8.
Te mau putuputuraa a te amuiraa
◼ A faataa i te putuputuraa taitahi a te amuiraa. I te haapiiraa matamua iho â, a titau manihini i te mau piahi ia haere mai.
◼ A faaite ia ratou i te mau manaˈo faufaa i faahitihia i te mau putuputuraa.
◼ A faatupu i te anaanatae no te Oroa haamanaˈoraa, te mau tairururaa, e te tere o te tiaau haaati.
◼ A faaohipa i te mau hohoˈa i roto i ta tatou mau papai no te tauturu ia ratou ia ite i te ohipa e tupu ra.
◼ A faaitoito ia ratou ia taio i te buka rairai Les Témoins de Jéhovah: Qui sont-ils? Quelles sont leurs croyances?
A faaohipa i te mau video ia au ratou i te faanahonahoraa a Iehova
◼ Les Témoins de Jéhovah: un nom, une organisation
◼ Toute la communauté des frères
◼ Unis grâce à l’enseignement divin
◼ Jusquˈaux extrémités de la terre
Tuhaa 9: E faaineine anaˈe i te mau piahi ia poro ma te faanaho-ore-hia
A faatupu ai te mau piahi Bibilia i te faaroo i ta ratou e haapii ra, te turaihia ra ratou ia paraparau no nia i te reira.—km 5/05 api 1.
A faaitoito ia ratou ia poro
◼ E hoa aore ra e melo utuafare anei te nehenehe e apiti i te haapiiraa?
◼ E hoa ohipa, hoa haapiiraa, aore ra te tahi atu taata matau anei te anaanatae ra i te parau apî maitai?
A faaineine ia ratou ia faaite i ta ratou mau tiaturiraa
◼ I te taime haapiiraa, i te mau taime tano maitai, a ui i te piahi: “E nafea oe e faataa ˈi ma te faaohipa i te Bibilia, i teie parau mau i to oe utuafare?”
◼ A tauturu ia ˈna ia taa i te faufaaraa ia faatura e ia faaite i te mǎrû ia paraparau o ˈna ia vetahi ê no nia ia Iehova e ta ˈna mau opuaraa.
◼ E nehenehe te mau piahi e faaohipa i te buka rairai Les Témoins de Jéhovah: Qui sont-ils? Quelles sont leurs croyances? no te tauturu i te mau hoa e te mau melo utuafare ia taa i ta tatou mau tiaturiraa e ohipa bibilia.
Tuhaa 10: E faaineine anaˈe i te piahi i roto i te taviniraa i tera fare i tera fare
Ia faaoti te mau matahiapo e te faaî ra te hoê piahi Bibilia i te mau titauraa no te riro ei taata poro bapetizo-ore-hia, e nehenehe o ˈna e haamata i te apiti i te taviniraa i mua i te taata e te amuiraa.—km 6/05 api 1.
A faaineine amui
◼ A faaite i te taata poro apî ihea oia e ite ai i te mau manaˈo tauturu no te mau faaiteraa.
◼ A tauturu ia ˈna ia maiti i te hoê omuaraa parau ohie, e tano i te tuhaa fenua a ta outou amuiraa.
◼ A faaitoito ia ˈna ia faaohipa i te Bibilia i roto i te taviniraa.
◼ A faahiti faahou e te piahi. A haapii ia ˈna ia pahono ma te faatano i te parau i te mau patoiraa matauhia.
A poro amui
◼ A vaiiho i te piahi ia hiˈo e nafea outou e faaohipa ˈi i te faaiteraa ta orua i faaineine.
◼ A haapao i to ˈna huru e to ˈna aravihi. I roto i te tahi mau tupuraa, mea maitai aˈe ia vaiiho ia ˈna ia rave i te hoê tuhaa o te faaiteraa.
◼ A tauturu ia ˈna ia haamau i te hoê porotarama no te apiti tamau i te taviniraa.
Tuhaa 11: A tauturu i te piahi ia rave i te mau farerei-faahou-raa
E haamata te faaineineraa o te farerei-faahou-raa i te aparauraa matamua. A faaitoito i te piahi ia anaanatae ma te haavare ore i te feia e faaroo ra ia ˈna. A faaineine riirii ia ˈna ia nehenehe o ˈna e turai ia ratou ia parau i to ratou manaˈo, ia faaroo o ˈna i ta ratou mau parau e ia haroaroa o ˈna i te mea e haapeapea ra ia ratou.—km 7/05 api 1.
A faaineine i te hoˈi faahou
◼ A hiˈopoa i te tereraa o te aparauraa matamua, e a tauturu i te piahi ia maiti i te hoê tumu parau e au te taata e faaroo ra ia ˈna.
◼ A faaineine i te hoê faaiteraa poto e nehenehe ai e taio i te hoê irava bibilia e te hoê paratarafa o te hoê papai.
◼ A faaineine i te hoê uiraa o te nehenehe e tuuhia ˈtu i te hopea o te tauaparauraa.
A atuatu oioi i te anaanatae
◼ A faaitoito i te piahi ia hoˈi oioi faahou e hiˈo i te feia atoa i anaanatae.
◼ A tauturu ia ˈna ia taa e mea tia ia tamau maite i te farerei faahou i te tahi mau taata.
◼ A haapii ia ˈna ia haamau i te mau farereiraa, e a tauturu ia ˈna ia taa i te faufaaraa e hoˈi faahou mai tei faaauhia.
Tuhaa 12: E tauturu anaˈe i te piahi ia haamata e ia faatere i te mau haapiiraa bibilia
E mea faufaa roa ia pee outou ia Iesu ma te horoa outou atoa i te hiˈoraa. Ma te rave i ta outou taviniraa ei hiˈoraa, e taa iho â i te piahi e te fa o te mau farerei-faahou-raa, o te haamataraa ïa i te mau haapiiraa bibilia.—km 8/05 api 1.
A pûpû i te hoê haapiiraa bibilia
◼ A faataa i te piahi e e ere i te mea faufaa ia faataa huˈahuˈa i te tereraa o te haapiiraa.
◼ E pinepine e mea maitai aˈe ia faaite ma te faaohipa hoê aore ra e piti paratarafa o te hoê papai e haapiihia ra.
◼ A hiˈo faahou e a faahiti faahou hoê o te mau manaˈo tauturu no te haamata i te mau haapiiraa bibilia.—km 8/05 api 8; km 1/02 api 6.
A faaineine i te mau piahi ia riro ei orometua haapii
◼ A faaitoito i te mau piahi ia tapao ia ratou i te Haapiiraa o te taviniraa teotaratia.
◼ A rave e ia apiti te feia poro apî i te tahi atu mau haapiiraa bibilia, i reira ratou e nehenehe ai e apiti rii atu ai i te haapiiraa.