Ia ineine maitai no te haapii atu
1. No te aha tatou e faaitoito ai i te piahi ia haafaufaa i ta ˈna haapiiraa?
1 Ia hinaaro te piahi e tavini ia Iehova, e mea tia ia faaineine maitai tatou ia tatou a haapii ai ia ˈna. E hoona ta tatou mau tutavaraa ia tauturu tatou ia ˈna ia haafaufaa i ta ˈna haapiiraa. (Deut. 6:5; Mas. 4:23; Kor. 1, 9:26) E nafea ïa tatou?
2. Eaha te tuhaa a te pure i roto i te faaineine-maitai-raa?
2 A pure e a faaineine: Na Iehova e faatupu i te huero o te parau mau i roto i te aau o te piahi. E mea tano ïa ia haamata i te faaineine i te haapiiraa ma te pure no te piahi e to ˈna mau hinaaro taa ê. (Kor. 1, 3:6; Iak. 1:5) E tauturu atoa mai te reira ia faaoti e nafea to ˈna aau e î atu â ˈi “i te ite” mau i te hinaaro o te Atua.—Kol. 1:9, 10.
3. E nafea ia faaineine ma te manaˈo i te piahi?
3 A manaˈo i te piahi: Ua ite Iesu e e manuïa te haapiiraa ia manaˈo tatou i te feia e faaroo ra. E piti aˈe taime to Iesu uiraahia: “E nahea vau e noaa ˈi te ora mure ore?” E ere hoê â huru pahonoraa ta ˈna i horoa ˈtu. (Luka 10:25-28; 18:18-20) Ia manaˈo tatou i te piahi a faaineine ai tatou ia tatou e tia ˈi. Teihea irava e taio e o ˈna? Ehia paratarafa e hiˈopoa? Eaha te manaˈo o te haapiiraa e mea fifi paha no te piahi ia taa aore ra ia farii? Ia feruri na mua tatou i te tahi o ta ˈna mau uiraa, e ineine maitai aˈe ïa tatou i te pahono atu.
4. Eaha ˈtoa te faaineine-maitai-raa?
4 A hiˈo faahou i te tumu parau: Ua haapii pinepine paha tatou i te tumu parau, a tahi ra râ tatou a hiˈopoa ˈi i te reira e te piahi. Ia putapû to ˈna aau, e mea faufaa roa ia faaineine maitai i te haapiiraa taitahi. Te auraa ïa, e rave i ta tatou e faaitoito i te piahi ia rave. A hiˈo faahou i te tumu parau, te mau irava atoa, ma te manaˈo i te piahi, e a haamataratara i te mau manaˈo faufaa.—Roma 2:21, 22.
5. E nafea tatou e pee ai ia Iehova?
5 Te anaanatae roa ra Iehova i te haereraa i mua a te piahi Bibilia taitahi. (Pet. 2, 3:9) Ma te rave i te taime no te faaineine i te haapiiraa taitahi, e faaite tatou i te hoê â anaanatae î i te here.