Ohipa opereraa taa ê o te buka rairai apî
1 I teie mahana, e rave rahi taata o te haapeapea nei no te mau tupuraa na te ao nei, e mea iti râ o te taa nei no te aha e mai tera ˈi, eaha te tiai maira ia tatou e eaha ta ratou e rave no te ora ˈtu a piri mai ai te haavaraa. (Ezek. 9:4) No te faataa ia ratou i te faufaaraa o to tatou nei tau, e tupu te hoê ohipa opereraa o te buka rairai apî E ara! mai te Monire 18 no Atopa e tae atu i te Tapati 14 no Novema.
2 E nehenehe outou e pûpû i te buka rairai i roto i te pororaa i tera fare i tera fare, i roto i te farerei-faahou-raa e te pororaa ma te faanaho-ore-hia, aore ra i te hoê vahi taata. Tera râ, eiaha e opere haere noa na te mau taata atoa. A pûpû noa na te feia e anaanatae ra i ta te Bibilia e parau ra no nia i te auraa o te mau tupuraa na te ao nei. A pûpû na te feia e anaanatae rii ra i te hoê api parau.
3 No te huti i te ara-maite-raa o te taata, e nehenehe outou e parau e:
◼ “E rave rahi taata o te haapeapea nei ia ite ratou i te mau fifi rahi e te mau ohipa peapea roa e tupu ra i teie mahana. [E faahiti tatou i te hoê hiˈoraa i ǒ tatou.] Ua ite anei oe e ua tohuhia taua mau mea ra i roto i te Bibilia? [E vaiiho tatou i te taata ia pahono. I muri iho, e taio tatou i te hoê irava e tano i te tupuraa i faahitihia, mai te Mataio 24:3, 7, 8; Luka 21:7, 10, 11; aore ra te Timoteo 2, 3:1-5.] Te faaite ra te Bibilia i te auraa o to tatou tau e eaha te tiai ra i te huitaata. E hinaaro anei oe e ite hau atu â? [E vaiiho tatou i te taata ia pahono. E pûpû tatou i te buka rairai ia ite tatou e te anaanatae mau ra o ˈna.] E horoahia teie buka rairai ma te tamoni ore. Mai te peu e e hinaaro oe e pûpû i te hoê ô no ta matou ohipa na te ao nei, e farii matou i te reira.”
4 Aore ra mea maitai paha teie omuaraa parau no outou:
◼ “E rave rahi i teie mahana o te peapea roa ra no te mau tupuraa riaria aore ra no to ˈna iho ati. Te uiui nei vetahi no te aha te Atua e ore ai e arai mai no te faaore i taua mau mea ra. Te haapapu ra te Bibilia ia tatou e e fatata te Atua i te ohipa no te tamǎrû i te mauiui. A hiˈo na eaha te mau haamaitairaa ta te Atua e hopoi mai i te huitaata. [E taio tatou i te Salamo 37:10, 11.] E hinaaro anei oe e ite hau atu â?” A faaohipa i te hoê â parau faaotiraa e to nia nei.
5 A tutava i te ani i te iˈoa e te vahi nohoraa o te taata atoa e farii i te hoê buka rairai e a faanaho ia outou no te hoˈi atu e atuatu i te anaanatae. E ite mai ïa outou i te mau manaˈo tauturu no nia i te reira i roto i Ta tatou taviniraa i te Basileia no Novema 2004. Mai te peu e te anaanatae mau ra te hoê taata i te poroi i te aparauraa matamua, e nehenehe paha ta outou e haamata i te hoê haapiiraa bibilia i reira iho maoti te buka rairai E ara! aore ra te tahi atu papai, mai te buka rairai Titau.
6 Te vai ra te mau buka rairai apî i muri aˈe i te Putuputuraa no te taviniraa i reira teie tumu parau e haapiihia ˈi. Te ani nei matou i te feia poro e te mau pionie ia rave i te haamataraa i ta ratou noa e hinaaro i te mau mahana matamua o te opereraa. Ia haamaitai Iehova i teie ohipa taa ê ei faahanahanaraa ia ˈna e no te maitai o te mau taata haavare ore na te ao nei!—Sal. 90:17.