Te porotarama o te mahana tairururaa taa ê i mua nei
Ia ite aore ra ia faaroo tatou i te hoê faaararaa e eita râ tatou e tâuˈa, e nehenehe tatou e û i te mau faahopearaa peapea. E mea faufaa roa ˈtu â ia tâuˈa i te aratairaa pae varua ta Iehova e horoa maira. O ta te mahana tairururaa taa ê o te matahiti taviniraa i mua ïa e haamanaˈo mai. Teie te manaˈo tumu: “E ara i to outou faarooraa.”—Luka 8:18.
I roto i ta ˈna oreroraa parau matamua, e faataa te taeae orero ratere e nafea te mau aˈoraa faaurua a te Atua i roto i te mau pene matamua o te rata a Paulo i te mau Hebera e tano ai ia tatou i teie mahana. I roto i ta ˈna oreroraa parau hopea, “E haapao noa anaˈe i te haapiiraa a te Atua,” e tauturu te taeae orero i te feia atoa i tae mai ia hiˈopoa e te faaroo mau ra anei ratou ia Iehova, ta ˈna Tamaiti, e “te tavini haapao maitai e te paari.”—Mat. 24:45.
E faufaa-taa-ê-hia te mau utuafare i te tahi mau tuhaa o te porotarama. E tauturu te tumu parau “Te mau utuafare e faaroo ra ma te peapea ore i te Parau a te Atua” ia tatou ia ite e nafea tatou ia ore te ao ia faaino i to tatou ea pae varua. E uiuihia te tahi mau taeae e tuahine o tei rave i te mau tauiraa i roto i to ratou oraraa no te tuu i te mau mea pae varua i te parahiraa matamua. I roto i te tuhaa “E haapuai mau te faaroo-maite-raa i te Parau a te Atua i to tatou feia apî,” e uiuihia te tahi feia apî o tei paturu i te parau mau i te fare haapiiraa, i mua i to ratou mau hoa haapiiraa, aore ra i roto i te taviniraa. E faaite mai te oreroraa parau “Te mau tamarii rii e faaroo ra i te Atua e e haapii ra,” e eiaha e haafaufaa ore i te aravihi o te mau tamarii no te haapiiraa. E faaite te mau uiuiraa manaˈo i te mau tamarii e i to ratou mau metua e mea maitai ia haapii i te mau tamarii mai to ratou tamarii-rii-raa mai â i te eˈa o Iehova.
A ‘haavare ai Satani i to te ao atoa nei,’ te faaite nei Iehova i ta ˈna mau tavini haapao maitai i te eˈa e na reira ˈi ratou i te haere. (Apo. 12:9; Isa. 30:21) Na roto i te faaroo-maite-raa i te mau aˈoraa a te Atua e te faaohiparaa ma te auraro i te reira i roto i to tatou oraraa, e riro tatou ei taata paari e te oaoa e e rave tatou i te eˈa o te ora mure ore.—Mas. 8:32-35.