Porotarama o te mahana tairururaa taa ê i mua nei
Mea faahiahia roa te hamaniraa o te mata. (Sal. 139:14) Hoê noa râ mea ta te mata e nehenehe e hiˈo i te hoê noa taime. E parau mau te reira i roto i te auraa mau e te auraa taipe. Ia maramarama maitai ta tatou hiˈoraa pae varua, e titauhia ia tiatonu tatou i te tupuraa o te hinaaro o te Atua. Ia hiˈohia te mau faaanaanataeraa e maraa noa ˈtura a te ao a Satani, e tano maitai ia tatara te porotarama o te mahana tairururaa taa ê o te matahiti taviniraa 2006 i te manaˈo tumu “A tapea i te mata maitai.”—Mat. 6:22.
E nafea tatou e nehenehe ai e fanaˈo i ta Iehova mau haamaitairaa? (Mas. 10:22) E hiˈopoahia teie uiraa i roto i te oreroraa parau “A ooti i te mau haamaitairaa no te tapearaa i te mata maitai.” E faataa te mau uiuiraa manaˈo i te mau haamaitairaa e noaa mai i te faaohiparaa i te mau faaueraa tumu bibilia. I roto i ta ˈna oreroraa parau matamua, “A tapea i te mata maitai i roto i te hoê ao ino,” e faaara mai te taeae orero ratere i te mau mea o te nehenehe e haafifi i to tatou oraraa aore ra e tapea riirii i ta tatou mau haereraa i mua pae varua. E taa maitai aˈe atoa ia tatou te auraa e maiti i te “mea tia.”—Luka 10:42.
E nafea te mau metua e te tahi atu mau Kerisetiano e nehenehe ai e faaitoito i te feia apî ia rave i te mau ohipa pae varua? I roto i na oreroraa parau “Te mau metua e teˈa maitai ra i ta ratou mau ohe” e “Te feia apî e titau ra i te mau fa pae varua,” e uiuihia te tahi mau metua e taata apî no nia i taua uiraa faufaa ra. (Sal. 127:4) E faaite te oreroraa parau hopea a te taeae orero ratere e nafea tatou e nehenehe ai e haere noa i mua e te faanahonahoraa a Iehova ei melo taitahi, ei utuafare, e ei amuiraa.
E mea apî anei tatou i te iteraa i te parau mau aore ra tau ahuru matahiti to tatou taviniraa ia Iehova, mea faufaa roa ia ‘tapea tatou i te mata maitai.’ E tauturu te porotarama o te mahana tairururaa taa ê ia tatou ia na reira.