Te hoê faanahoraa apî no te haamanaˈo i te porotarama o te mau tairururaa
A tamau ai te ao a Satani i te ino roa ˈtu, te faaitoito nei Iehova ia “haapae tatou i te paieti ore, e te hinaaro i teie nei ao, e ia parahi tatou ma te haapao maitai, e te parau-tia, e te paieti, i teie nei ao.” (Tito 2:12) I rotopu i te mau faanahoraa ta ˈna e rave na roto i “te tavini haapao maitai e te paari,” te vai ra i te mau matahiti atoa te tairururaa haaati e te mahana tairururaa taa ê. (Mat. 24:45) E haapuai-roa-raa tera mau tairururaa pae varua no tatou.
No te tauturu ia tatou ia haamanaˈo e ia faaohipa i te haapiiraa i horoahia, i te roaraa o te matahiti taviniraa 2005, e ravehia te hoê ravea apî no te haamanaˈo i te porotarama o tera mau tairururaa. Te vai ra i te api 5 e 6 o teie api hau te mau tumu parau o te horoa mai i te hoê hiˈoraa o te mau mea e vauvauhia e te mau uiraa o te haamanaˈoraa no te porotarama o te mau tairururaa atoa. E hiˈopoa te mau amuiraa i teie mau tumu parau i te Putuputuraa no te taviniraa hou rii a apiti ai i ta ratou tairururaa, e i muri rii atoa. E nafea ia faanaho i te reira?
Hoê aore ra e piti hebedoma na mua ˈˈe te amuiraa a apiti ai i te tairururaa haaati, e vauvauhia te hoê oreroraa parau 10 minuti niuhia i nia i te tumu parau “Te porotarama o te tairururaa haaati i mua nei” i te Putuputuraa no te taviniraa no te faaara i to tatou anaanatae. E huti atoa te taeae orero i te ara-maite-raa o te feia e faaroo ra i nia i te mau uiraa o te haamanaˈoraa e e faaitoito oia i te taatoaraa o te feia i tae mai ia rave i te mau tapaopaoraa no te haamanaˈoraa o te tupu tau hebedoma i muri aˈe i te tairururaa.
Tau hebedoma i muri aˈe i te tairururaa, e ravehia te hoê haamanaˈoraa 15 minuti no te porotarama o te mahana matamua o te tairururaa i te Putuputuraa no te taviniraa. I te hebedoma i muri iho, e rave-faahou-hia te reira i te roaraa 15 minuti no te porotarama o te piti o te mahana. E faaohipahia te mau uiraa o te haamanaˈoraa e vai ra i roto i teie api hau ei niu no tera mau aparauraa. E haamahitihiti te haamanaˈoraa i te faufaaraa mau o te haapiiraa i noaa mai. E faanaho te mau matahiapo no te haapoto, faaore aore ra taui i te tahi atu mau tuhaa o te Putuputuraa no te taviniraa no te faaô i tera mau haamanaˈoraa i roto i te porotarama.
E faaohipahia tera noâ faanahoraa no te porotarama o te mahana tairururaa taa ê, e ravehia râ hoê noa haamanaˈoraa 15 minuti no te taatoaraa o te porotarama. E hinaaro tatou taitahi e tapea e e faaohipa i teie api hau no te fanaˈo pauroa i te haapiiraa maitai ta Iehova e horoa mai.—Isa. 48:17, 18.