E imi anaˈe i te feia au
1 E fifi taa ê to te ohipa pororaa ta Iesu i faaue ia tatou e rave. “E te oire e te oire iti ta outou e tomo ra, e ui atu i to reira taata au,” ta ˈna ïa i parau. (Mat. 10:11) I te mea e mea varavara te taata i te fare, e nafea ia rave maitai i taua maimiraa ra?
2 A hiˈopoa i ta outou tuhaa fenua: A hiˈopoa na mua i ta outou tuhaa fenua. Eaha te taime tei te fare te taata? Ihea tatou e farerei ai ia ratou i te roaraa o te mahana? E hinaaro atu â anei ratou e faaroo i te poroi i te tahi mahana o te hebedoma aore ra i te tahi taime taa ê o te mahana? Ma te faatano i ta outou taviniraa i te porotarama e te huru tupuraa o te taata o ta outou tuhaa fenua, mea ohie aˈe ïa ia noaa mai te mau faahopearaa maitatai.—Kor. 1, 9:23, 26.
3 Mea rahi te taata poro tei ite e mea maitai ia poro i te omua-roa-raa o te ahiahi. I taua taime ra, mea mǎrû aˈe e mea farii aˈe te tahi mau taata. I te mau avaˈe e po oioi noa, mea maitai atoa ia poro na roto i te niuniu paraparau (ia faatiahia) i te ahiahi. E tauturu atoa te pororaa i te mau tuhaa fenua tapihoo e i te mau vahi taata, i te farerei e rave rahi atu â taata.
4 I te hoê avaˈe ohipa taa ê, ua faanaho te hoê amuiraa e poro i te pae hopea o te taperaa mahana i te Mahana maa e te Tapati, e i te ahiahi i te Mahana toru e te Mahana pae. Ua faaô-atoa-hia te pororaa na roto i te niuniu paraparau i roto i te porotarama e ua faanaho te tahi feia poro e aparau i te feia tapihoo. No te mea ua faatupu taua mau faanahoraa ra i te anaanatae rahi i taua taviniraa ra, ua faaoti te amuiraa e tamau â.
5 E atuatu oioi anaˈe i te anaanatae: Mai te peu e e mea fifi i roto i ta outou tuhaa fenua ia farerei faahou i te taata i ǒ ratou, a tutava i te faataa i te hoê farereiraa papu ia hope te aparauraa taitahi, e te reira i te aparauraa matamua. Ia oti, a tapea iho â i ta outou parau. (Mat. 5:37) Ia tano, e tia ia outou ia ani i te numera niuniu a te taata. E nehenehe ïa outou e niuniu oioi atu ia ˈna.
6 Papu roa e e haamaitai Iehova i ta tatou mau tutavaraa e imi i te feia au e e atuatu i to ratou anaanatae.—Mas. 21:5.