Te manuïaraa o te pororaa na roto i te niuniu
1. No te aha e tuhaa faufaa ˈi te pororaa na roto i te niuniu o ta tatou taviniraa?
1 No te aha e manaˈo ai e faaohipa i te niuniu no te poro? E ravea ê atu hoi tera e noaa ˈi ia vetahi ê te ite mau e ora ˈi ratou. (Pet. 2, 3:9) O te pororaa na te mau fare ta tatou ravea matamua no te faaite i te evanelia o te Basileia o te Atua. Te faaohipa atoa ra râ tatou ma te aau tae i te tahi atu mau ravea no te poro i te feia mea fifi ia farerei.—Mat. 24:14; Luka 10:1-7; Apo. 14:6.
2. E nafea ia faanaho i te pororaa na roto i te niuniu?
2 Faanahoraa: Mai no te pororaa na te mau fare, e tuhaa fenua atoa to te pororaa na roto i te niuniu. Hoê noa taata te nehenehe e niuniu aore ra te hoê pǔpǔ iti e piti aore ra e toru taata poro. A maiti i te hoê vahi maniania ore. Mea rahi te parahi i mua i te hoê airaa maa tei nia iho te mau papai ta ratou e faaohipa na i roto i te pororaa na te mau fare.
3. Eaha te haamanaˈo ia poro tatou na roto i te niuniu?
3 Raveraa: Ei tauaparauraa te reira. E nehenehe vetahi a tahi ra a na reira ˈi e taio i te hoê faaiteraa mai te huru ra e e aparauraa. E omuaraa parau to roto i te buka Haaferuriraa, Ta tatou taviniraa i te Basileia, e te api parau E hinaaro anei oe e ite i te parau mau? A faaineine i ta oe faaiteraa ma te maiti i te hoê manaˈo tumu, te hoê uiraa, e te tahi mau irava ei pahonoraa. A pûpû i te mau papai o te avaˈe. Teie te tahi mau haamanaˈoraa: Eiaha e ru i te paraparau. Ia faaroohia to oe huru faatura, faaoromai e te auhoa. A faaroo i te taata ia horoa mai i to ˈna manaˈo e a haamauruuru atu. Eiaha e faahiti i te faanahoraa o te mau ô, aˈunei e manaˈohia ˈi e te titau ra oe i te moni.
4. Eaha ta te pororaa na roto i te niuniu e tauturu ia tatou ia rave?
4 Peneiaˈe e faaea fare noa te taata ta oe e niuniu ra, mea fifi ia farerei i roto i te pororaa na te mau fare no te rahi o ta ˈna ohipa, aore ra te ora ra i te mau vahi mea tiaihia aore ra opanihia te tomoraa. No te rave faahope roa i ta tatou taviniraa, e manaˈo anaˈe ïa e poro na roto i te niuniu. E ravea manuïa hoi!