Te auhoêraa Kerisetiano mau: e nafea e tupu ai?
1 Eaha te nehenehe e tahoê e ono mirioni tiahapa taata i roto e 234 fenua e tuhaa fenua e fatata e 380 reo? O te haamoriraa a te Atua ra o Iehova anaˈe ïa. (Mika 2:12; 4:1-3) Ua ite roa ˈtu te mau Ite no Iehova e te vai ra iho â te auhoêraa Kerisetiano mau i teie mahana. Ei “hoê aˈe nǎnǎ” e arataihia ra e to tatou ‘tiai hoê’ roa, ua faaoti papu tatou e patoi i te huru feruriraa amaha o teie nei ao.—Ioa. 10:16; Eph. 2:2.
2 Te opua ra te Atua e tahoê i te taatoaraa o ta ˈna mau mea ora maramarama i roto i te haamoriraa mau. (Apo. 5:13) Ma te ite maite i te faufaaraa o tera opuaraa, ua faariro o Iesu i te auhoêraa o ta ˈna mau pǐpǐ ei manaˈo tumu o te hoê pure uˈana. (Ioa. 17:20, 21) E nafea tatou taitahi e paturu ai i te auhoêraa o te amuiraa Kerisetiano?
3 E nafea te auhoêraa e tupu ai: Aita anaˈe te Parau a te Atua e to ˈna varua, eita te auhoêraa Kerisetiano e tupu. Ia haapao tatou i ta tatou e taio ra i roto i te Bibilia, te vaiiho ra ïa tatou i te varua o te Atua ia ohipa noa i roto i to tatou oraraa. E tauturu te reira ‘ia vai â te au tahoê a te varua i te ati o te hau.’ (Eph. 4:3) E turaihia tatou ia faaoromai te tahi i te tahi ma te here. (Kol. 3:13, 14; Pet. 1, 4:8) Te turu ra anei outou i te auhoêraa ma te feruriruri i te Parau a te Atua i te mau mahana atoa?
4 E tauturu atoa ta tatou ohipa e poro e e faariro i te taata ei pǐpǐ i te tahoê ia tatou. Ia haa amui tatou e te tahi atu feia poro i roto i te taviniraa Kerisetiano, “i te faaitoito-atoa-raa i te parau ra i te evanelia,” e riro tatou ei ‘feia rave ohipa i te parau mau.’ (Phil. 1:27; Ioa. 3, 8) No te aha e ore ai e ani i te hoê taata aita outou i poro aˈenei e o ˈna, ia apee ia outou i roto i te taviniraa i teie hebedoma?
5 E haamaitairaa rahi ta tatou e e melo tatou o te fetii taeae mau hoê roa nunaa rau i te fenua nei i teie mahana. (Pet. 1, 5:9) Ua ite roa aˈenei tau tausani taata i taua auhoêraa ra i te mau tairururaa nunaa rau “A faahanahana i te Atua.” E tutava paatoa anaˈe i te paturu i taua auhoêraa faufaa mau ra ma te taio i te Parau a te Atua i te mau mahana atoa, ma te faaafaro i te mau fifi ma te here e ma te poro i te parau apî maitai “ma te aau hoê.”—Roma 15:6.