Mahana tairururaa taa ê: te porotarama apî

I teie mahana, te fanaˈo nei tatou e rave rahi haamaramaramaraa no te atuatu i te ea o to tatou mafatu pae tino, ia maitai aˈe e ia maoro atu â te oraraa. E mea faufaa roa ˈtu â râ te ea o to tatou mafatu taipe. Mea tano roa ïa te manaˈo tumu o te mau mahana tairururaa taa ê e tupu mai Tetepa 2003 atu: “E haamori anaˈe ia Iehova ma te aau mau.” (Par. 1, 28:9) Eaha ta tatou e haapii mai?

E vauvau mai te tiaau haaati i te orero “E tauturu anaˈe ia vetahi ê ia haamori ia Iehova ma te aau tia roa.” E haamahitihiti te mau uiuiraa manaˈo i te oaoa ta tatou e fanaˈo ia atuatu i te anaanatae e ia faatere i te mau haapiiraa bibilia e te feia e hinaaro ra e haamori ia Iehova. Ma te feaa ore e tamahanahanahia e e faaitoitohia te taatoaraa e te orero matamua a te taeae orero ratere, “E paruru anaˈe i to tatou aau i roto i te hoê ao arepurepu.” E faaoti te rururaa poipoi na roto i te orero o te bapetizoraa.

I te taperaa mahana, e haamanaˈo mai te tumu parau “E tauturu anaˈe ia vetahi ê” e nafea tatou e tauturu ai ia vetahi ê. Eaha ta te mau metua e nehenehe e rave no te paruru i te mafatu o ta ratou mau tamarii i te mau haaatiraa iino e no te tauturu ia ratou ia haafatata ˈtu ia Iehova? E horoa te tumu parau “A tauturu i ta outou mau tamarii ia hinaaro ia Iehova” ia ratou i te mau manaˈo au ia faaohipa e e faaite e nafea ia naea roa ˈtu.

E haafaufaa anei tatou i te mau ravea atoa ta Iehova i tuu mai ia maitai e ia puai noa to tatou mafatu taipe? E haamahitihiti te taeae orero ratere i roto i ta ˈna orero hopea, “E haamori noa anaˈe ia Iehova ma te aau mau,” e maha tuhaa faufaa o ta tatou porotarama no te atuatu i to tatou ea pae varua. Ehia taime e tutavaraa ta tatou e rave no te pure haavare ore, te haapiiraa i te Parau a te Atua, te pororaa ma te itoito rahi e te amuimuiraa i te tahi atu mau Kerisetiano? E nehenehe anei tatou e haamaitai i te hoê o taua mau tuhaa ra?

Teie te titau-manihini-raa a Iehova ia tatou: “E fariu maite i to aau i te aˈo, e to tariˈa i te parau e noaa ˈi te ite ra.” (Mas. 23:12) E rave anaˈe i teie nei i te mau faanahoraa no te apiti atu i taua mahana ra î i te mau haapiiraa bibilia. I reira ïa tatou e itoitohia ˈi no te haamori tamau ia Iehova ma te aau mau e te tia roa.