Te porotarama nunaa rau o te paturaa i te mau Piha a te Basileia i te tahi mau fenua no Europa
1 I te mau fenua e rave rahi no Europa, no Europa Hitia o te râ iho â râ, tau ahuru matahiti aˈenei, e pinepine, ua haafifi-etaeta-hia te ohipa a te mau Ite no Iehova. No reira, e mea fifi ia faatupu i te mau putuputuraa i mua i te taata, e fatata aita i nehenehe e faaohipa i te mau Piha a te Basileia. Teie râ, tau matahiti aˈenei, “e ohipa rahi ta Iehova i rave ia matou nei; i oaoa ˈi matou nei.”—Sal. 126:3.
2 Mai te matahiti 1983 atu, ua haamata te mana haavî i nia i te mau Ite i te iti mai. I te matahiti 1989, ua haamana na fenua Poronia e Honegeria i te mau Ite. I te matahiti 1991, ua na reira atoa te fenua Rusia e, mai reira mai, te ruperupe ra te ohipa i taua fenua ra e i te mau repupirita tahito o te hau amui Soviétique. I rotopu ia Mati 1996 e Atopa 1998, ua farii te Tino aratai e 359 aniraa i te moni tarahu no te mau Piha a te Basileia a te mau amaa o te haapao ra 11 fenua no Europa.
3 A hiˈopoa maite ai outou i te mau hohoˈa o teie api hau, a feruri e ua rave o Iehova i te mau ohipa rahi e te faahiahia na ta ˈna mau tavini. (Sal. 136:4) E oaoa outou i te iteraa e te faaohipa-maitai-roa-hia ra te mau ô a te mau taeae na te ao atoa nei, ia au i ta Iesu i parau i roto i te Ioane 13:35: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.”
4 Te fenua Rumania atoa tei fanaˈo i te porotarama tauturu o te paturaa i te mau Piha a te Basileia i te mau fenua ravai ore i te pae faufaa. Mai Tiurai 2000, ua patuhia e 36 piha i reira. I Ukraine atoa, na roto i te peeraa i te hoê â hohoˈa fare fatata no te taatoaraa, ua patuhia e 61 piha i te matahiti 2001, e e 76 i te matahiti 2002. Maori te moni i horoahia na te Faufaa no te mau Piha a te Basileia, tau hanere paturaa tei oti i Bulgarie, i Croatie, i Makedonia, i Moldavie, i Rusia e i Serbie-Monténégro.
5 I te tahi mau fenua, e mea titauhia ia faaruru i te mau fifi hou a haamata ˈi i te ohipa. E pinepine, e mea roa te faaineineraa i te paturaa. Hau atu â, e mea moni roa ˈˈe te paturaa i te hoê piha i tera tuhaa o Europa i te mau vahi i Afirika aore ra i Marite Apatoa. Teie râ, no te mea te maraa noa ra te numera o te feia haamori ia Iehova, e hinaaro-faahou-hia tau hanere piha i te mau fenua ravai ore i te pae faufaa no Europa!
6 E mea putapû ia ite e rave rahi Piha a te Basileia ia tia mai i te mau vahi e rave rahi. Mai ta te mau aamu e rave rahi e faataa ra, ua horoahia te hoê faaiteraa maitai na pihai iho i te mau vahi paturaa. I te tahi mau vahi, ua faahiahia te mau apooraa oire i te ru o te mau Ite e faatura i te ture i te pae o te paturaa.
7 Ua tano te manaˈo o Isaia ma te tohu i te maraaraa o te haamoriraa mau i to tatou nei tau. Na roto ia ˈna, ua tohu te Atua e: “Na ˈu, na Iehova, e faatupu etaeta i te reira, i to ˈna tau.” (Isa. 60:22) Aita e feaaraa e ua riro na matahiti hoê ahuru i mahemo ei taime hinaarohia e Iehova no te maraaraa i Europa Hitia o te râ. Ia tamau oia i te haamaitai rahi i ta tatou mau tutavaraa e haavitiviti i te patu i te mau piha i te mau fenua e rave rahi maori ta tatou turu tamau i te Faufaa no te mau Piha a te Basileia! No reira, e rahi noa ˈtu â te mau Piha a te Basileia i te mau fenua ravai ore i te pae faufaa, e maori te reira e maraa ˈi te haamoriraa viivii ore i te mau fenua rarahi o Europa e e horoahia ˈi te hoê faaiteraa rahi “e tae noa ˈtu i te hopea o te fenua ra.”—Ohi. 13:47.
[Hohoˈa i te api 3]
Pueraa Piha a te Basileia, Moscou, Rusia
[Hohoˈa i te mau api 4-6]
Te mau Piha a te Basileia apî i Europa Hitia o te râ
Strumica, Makedonia
Daruvar, Croatie
Bitola, Makedonia
Sokal, mataeinaa no Lviv, Ukraine
Sofia, Bulgarie
Krasnooktyabrskiy, tuhaa fenua o Maïkop, Rusia
Bački Petrovac, Serbie-Monténégro
Plovdiv, Bulgarie
Tloumatch, mataeinaa no Ivano-Frankivsk, Ukraine
Rava-Ruska, mataeinaa no Lviv, Ukraine
Stara Pazova, Serbie-Monténégro
Zenica, Bosnie-Herzégovine
Sokal, mataeinaa no Lviv, Ukraine
Jydatchiv, mataeinaa no Lviv, Ukraine