Te parareraa o te haamoriraa mau i Europa Hitia o te râ
1 E mau taata poro itoito i te Basileia te mau Kerisetiano i te senekele matamua. Ua oaoa ratou i te iteraa i te mau amuiraa ‘e tupu ra i te rahi, aita e mahana tuua.’ (Ohi. 16:5) Na roto i ta ratou pororaa itoito, ua afai ratou i te haamoriraa mau i Asia, Afirika e Europa, o tei horoa mai hoi i te hoê auhune rahi taata haamori.
2 A ora noa ˈi tatou i te anotau hopea, te parare noa ra te haamoriraa mau, i Europa Hitia o te râ iho â râ. I roto i te tahi mau fenua i opanihia hoi te ohipa pororaa e te faatereraa e tae roa ˈtu i te omuaraa o te mau matahiti 90, te itehia nei te hoê maraaraa faahiahia. Te faaite ra te Annuaire 1999 e i roto e piti o taua mau fenua ra, Rusia e Ukraine, hau atu i te 100 000 feia poro i apiti atu i roto i te taviniraa. I roto i na 15 tuhaa fenua a te Hau Rusia tahito, hau atu i te 220 000 tei pûpû ia ratou no Iehova e tei bapetizohia mai te matahiti 1991 mai â! Ua titau teie maraaraa oioi ia patuhia e rave rahi Piha no te Basileia e te mau Piha tairururaa, oia atoa ia faarahihia te mau fare a te mau amaa e rave rahi.
3 Te horoa-tarahu-hia nei te hoê tuhaa o te Faufaa a te Taiete no te mau Piha no te Basileia i te mau amuiraa i roto i te mau fenua e hinaaro ru ra i te mau Piha no te Basileia, ua taotiahia râ to tatou mau hoa i te pae moni aore ra te faaruru ra ratou i te mau fifi ino mau i te pae faanavairaa faufaa. I rotopu i te mau avaˈe Mati 1996 e Atopa 1998, ua farii te Taiete e 359 aniraa moni tarahu no te mau Piha no te Basileia no ǒ mai i te tahi mau amaa e tiaau ra i te ohipa pororaa i roto 11 fenua no Europa Hitia o te râ. E faaohipahia te mau ô i horoahia i taua faufaa ra no te hoo mai i te tahi mau fenua e mau tauihaa no te patu i te mau piha apî aore ra no te faarahi i te mau fare e vai ra. Te faaite nei te mau hohoˈa i nia i teie mau apî i te hoê hiˈoraa o te mau ohipa i ravehia maoti te mau ô i horoahia i te Faufaa a te Taiete no te mau Piha no te Basileia i te mau Hau Amui no Marite e i te tahi atu mau fenua, e ta to tatou mau taeae i Europa Hitia o te râ hoi i fanaˈo.
4 I te matahiti 1998, ua ite o Bulgarie i te hoê maraaraa 12 %, e ua oaoa roa te mau taeae i te avariraahia ta ratou Piha no te Basileia matamua i te avaˈe Eperera. Ua naeahia i Croatie te hoê maraaraa e 4 %, e te patu nei te mau taeae i teie nei i te mau piha apî no te faahaere i te haamoriraa mau i mua. I Honederia, te farii ra fatata e 80 Piha no te Basileia 144 amuiraa. Oia hoi, i nia i na 235 amuiraa i taua fenua ra, e 61 % e vahi putuputuraa ïa ta ratou. I Makedonia, ua tauturu te porotarama paturaa i te mau Piha no te Basileia ia oti e piti piha apî, e te rave-noa-hia ra te tahi atu mau paturaa. I te tau veavea o te matahiti 1999, ua oti te hoê Piha no te Basileia toopiti pae i te oire pu no Skopje. E nehenehe taua piha ra e farii e ono aˈe amuiraa.
5 I Rusia, i te matahiti i mairi aˈenei, ua bapetizohia i te faito au noa e 260 taata i te hebedoma! Ma te pee i te hiˈoraa e ravehia ra i te tahi atu mau fenua, ua haamau te amaa no Rusia 12 tomite paturaa no te pae fenua i roto i taua tuhaa fenua rahi ra o te apiti i roto i te mau paturaa no a muri aˈe i te mau Piha no te Basileia. I te hoê tuhaa i te pae apatoerau no Saint-Pétersbourg, te patu ra te mau taeae i te Piha Tairururaa matamua o te fenua, no te hoê faito 1 600 parahiraa. Te vai atoa ra i roto i taua fare ra e pae Piha no te Basileia e 200 parahiraa to te piha taitahi. No te pahono i te mau hinaaro pae varua o to tatou mau taeae e to te mau taata e rave rahi e anaanatae ra i te parau mau i Ukraine, ua oti e 84 piha e te patuhia ra e 80.
6 Aita anei te maraaraa ta te mau fenua no Europa Hitia o te râ e ite ra e faaî ra i to tatou mafatu i te oaoa? Noa ˈtu te vahi ta tatou e faaea ra, te faahaamanaˈo maira te parareraa o te haamoriraa mau e eita te Atua e haapao i te huru o te taata e, to ˈna faaoromai, o te faaoraraa ïa o te “feia rahi roa.” (Apo. 7:9; Pet. 2, 3:9) Auê ïa haamaitairaa nehenehe te horoaraa tatou i te tahi turu iti i te pae materia ia haere to tatou taata-tupu i mua i te pae varua, i te mau fenua atea roa atoa ia tatou! Mai ta te Maseli 28:27 e haapapu maira, “o tei horoa i te taata rii ra eita oia e ere.” E itehia to tatou hinaaro e turu i te pae moni i taua mau paturaa ra na roto i te hoê ‘faitoraa’ i te pae materia, ia nehenehe te taatoaraa e ite i te oaoa e horoa e te parareraa o te haamoriraa mau i te ao atoa nei.—Kor. 2, 8:14, 15; Ohi. 20:35.
[Picture on page 3]
Săcele, Roumanie
[Picture on page 3]
Maardu, Estonie
[Picture on page 3]
Sevnica, Slovénie
[Picture on page 3]
Tiszavasvári, Honederia
[Pictures on page 4]
Jurmala, Lettonie
[Pictures on page 4]
Tallinn, Estonie
[Picture on page 4, 5]
Taurage, Lituanie
[Pictures on page 4, 5]
Belgrade, Yougoslavie
[Pictures on page 5]
Prievidza, Slovaquie
[Picture on page 5]
Mátészalka, Honederia
[Pictures on page 6]
Vranov nad Topl’ou, Slovaquie
[Picture on page 6]
Ruma, Yougoslavie
[Pictures on page 6]
Tornakalns, Lettonie