E aratai te mau farerei-faahou-raa i te mau haapiiraa bibilia
1. No te aha e mea faufaa ˈi te mau farerei-faahou-raa?
1 Aita noa o Iesu i faaue i ta ˈna mau pǐpǐ ia poro, ‘ia faariro atoa râ i te taata ei pǐpǐ, ma te haapii atu ia ratou.’ (Mat. 28:19, 20) Eita noa te orometua haapii e faaite: e haapii oia i te taata, e faataa e e horoa i te mau haapapuraa. Te hoê ravea no te haapii o te farerei-faahou-raa ïa i te mau taata aau farii maitai, ma te opua e haamata i te hoê haapiiraa bibilia e o ratou.
2. O vai ta tatou e farerei faahou?
2 O vai ta tatou e farerei faahou? O te mau taata atoa o tei farii i te hoê papai aore ra o tei anaanatae rii i te parau apî maitai. Mai te peu e te anaanatae ra te tahi ia poro tatou i te vahi taata, e tamata tatou e ia noaa mai to ˈna vahi nohoraa aore ra ta ˈna numera niuniu. E tapea tatou i te hoê feruriraa maitai no nia i te neheneheraa e haamata i te mau haapiiraa bibilia. Mai te peu e e imi noa tatou i te mau taata o te farii i te haapiiraa bibilia, peneiaˈe e itea mai ia tatou.—Mat. 10:11.
3, 4. E nafea ia rave i te mau farerei-faahou-raa manuïa?
3 E anaanatae roa anaˈe i te taata: E faaineinehia te hoê farerei-faahou-raa manuïa i te aparauraa matamua. E tapao te tahi mau taata poro i ta te taata e anaanatae e e faaohipa ˈtu ratou i muri aˈe. E noaa mai ia ratou te mau faahopearaa maitai roa. Te manaˈo nei te tahi pae e mea maitai ia ui i te hoê uiraa i te pae hopea o te aparauraa no te faaara i te ara-maite-raa o te taata no te farereiraa i mua. E turai to tatou anaanatae haavare ore i te mau taata ia manaˈo ia ratou, i muri aˈe atoa i te vaiihoraa ia ratou, e ia farerei oioi faahou ia ratou. Mai te peu e e nehenehe, e hoˈi anaˈe e farerei a anaanatae noa ˈi ratou peneiaˈe hoê aore ra e piti mahana i muri iho.
4 Ia rave tatou i te hoê farerei-faahou-raa, e patu anaˈe i nia i to na mua ˈtu aparauraa. Ia riro te faahitiraa hoê aˈe manaˈo bibilia faaitoito ei fa na tatou e ia ineine tatou i te faaroo i te taata. E haapii anaˈe i te haamatau atu â ia ˈna. I te mau farerei-faahou-raa i mua, e tufa anaˈe ia ˈna i te pue parau mau o te Parau a te Atua e tano roa ia ˈna.
5. Eaha te raveraa ohie ta tatou e nehenehe e faaohipa no te haamata i te mau haapiiraa bibilia?
5 Ia taa ia tatou te faufaaraa e haamata i te mau haapiiraa bibilia: E rave anaˈe i ta tatou mau farerei-faahou-raa ma te opua e haamata i te hoê haapiiraa bibilia. E nafea ïa? E faataa anaˈe i te taata e e hinaaro tatou i te tufa ia ˈna i te hoê manaˈo anaanatae e e faaite anaˈe ia ˈna i te hoê paratarafa o te buka Ite aore ra o te buka rairai Titau o ta tatou e manaˈo e e tano. E taio anaˈe i te paratarafa e te uiraa atoa, e i muri iho e hiˈopoa anaˈe hoê aore ra e piti irava bibilia e vai ra. E tupu taua raveraa ra i roto e pae e tae atu hoê ahuru minuti e e nehenehe te reira e ravehia i te pae opani. E opani anaˈe ma te tuu atu i te uiraa o te paratarafa i muri iho e e faataa anaˈe i te hoê farerei-faahou-raa no te tamau i te aparauraa.
6. E nafea tatou e faaite ai e ua taa ia tatou te faufaaraa o te mau farerei-faahou-raa?
6 O te atuaturaa i te anaanatae atoa te hoê tuhaa faufaa roa o ta tatou taviniraa. No reira, e faaineine anaˈe i te faataa i te mau hebedoma atoa i te taime no te mau farerei-faahou-raa. E manuïa aˈe ïa tatou e e oaoa roa tatou.