Pahonoraa i ta outou mau uiraa

◼ Eaha ta tatou e haapao maitai ia poro tatou i te feia i roto i te fare tapearaa?

I te ao nei, e vau aˈe mirioni taata to roto i te fare tapearaa, i roto ia ratou te vai ra o te anaanatae ra i te parau apî maitai. (Tim. 1, 2:4) I te mau avaˈe atoa, e tae mai ta te hoê o ta tatou mau amaa fatata 1 400 rata a te feia i tapeahia aore ra a te tahi mau melo o to ratou utuafare, o te ani i te mau papai aore ra te hoê farereiraa. Mea rahi te feia i tapeahia e anaanatae mau ra, te faaite ra râ te tahi mau tupuraa e te haavarevare ra te tahi pae e te imi ra ratou i te tarere ma te miimii i te nunaa o te Atua. No reira, e mea titauhia ia pee tatou paatoa i te mau faaararaa i muri nei ia poro tatou i te feia i tapeahia.

E pinepine, e porohia te feia i tapeahia na roto i te rata. Te faaara-etaeta-hia ra te mau tuahine eiaha e papai i te mau tane i tapeahia, noa ˈtu e no te tauturu ia ratou i te pae varua. Na te mau taeae aravihi anaˈe tera hopoia. E nehenehe e ani i te mau tuahine aravihi ia papai i te rata na te mau vahine i tapeahia e anaanatae mau ra i te parau mau bibilia. Ia ani noa mai te hoê taata i tapeahia, eiaha e hapono atu i te moni e te ô na ˈna.

Ia anaanatae te hoê taata i tapeahia i te Bibilia, e faatae tatou i to ˈna iˈoa e to ˈna vahi nohoraa i te amuiraa i te tuhaa fenua o te fare tapearaa. I te rahiraa o te taime, ua ite te mau taeae aravihi o te amuiraa e e nafea ratou i mua i te mau huru tupuraa taa ê e nehenehe e fa mai. Mai te peu e aita outou i ite i te iˈoa o te amuiraa, e nehenehe outou e faatae i te mau haamaramaramaraa i te amaa ra.

Aita e fifi ia faatupu te mau taeae i maitihia i te mau putuputuraa e te feia i tapeahia, e nehenehe ai e rave rahi o ratou e haapii i te hoê â taime. Teie râ, eiaha e faatupu i roto i te fare tapearaa i te tahi mau putuputuraa taa ê, i reira te feia poro e amuimui noa ˈtu ai i te feia i tapeahia. Hau atu â, e ere i te haerea paari ia haere te feia poro i roto i te hoê fare tapearaa mai tera noa e ia amuimui roa ˈtu i te feia i tapeahia.

Ia poro tatou i te feia i tapeahia, eiaha roa ˈtu tatou e haamoe i te faufaaraa ‘ia paari tatou mai te ophi ra, e te hapa ore mai te uuairao ra.’—Mat. 10:16.