Te tahi mau mauhaa eiaha ia haafaufaa-ore-hia
1 I to ˈna raveraa i te tahi mau faanahoraa no te tataî i te hiero, ua haapopou te arii ra o Iosia i te feia o tei rave i te ohipa na roto i teie mau parau: “Aita . . . i taiohia te moni i tuuhia ˈtu i to ratou rima, no te mea, ua haapao ratou i te mea au ra.” (Arii 2, 22:3-7) Te itehia ra te haafaufaa ra teie mau taata i te mau mea moˈa na roto i ta ratou faaohiparaa i te tahi mau ravea i horoahia ia ratou ra. Tatou o te rave nei i teie mahana i te ohipa moˈa o te parau apî maitai a te Atua, e tia atoa ia tatou ia faaohipa ma te haapao maitai i te mau mauhaa i horoahia mai na tatou.
2 I roto i te pororaa: Te haafaufaa rahi nei tatou i ta tatou mau papai, ma te ite maite i te poroi faufaa ta te reira e faaite ra e te haamâuˈaraa no te neneiraa. Eiaha tatou e vaiiho i ta tatou mau buka na te taata aita e au mau ra i te poroi o te Bibilia. Mai te peu e eita te hoê taata e anaanatae rahi i te parau apî maitai, e pûpû anaˈe i te hoê api parau eiaha râ i te hoê buka.
3 Ia opere tatou i te tahi mau papai, eiaha tatou e haafaufaa ore i te reira. Eiaha tatou e vaiiho atu i te mau vahi taata a itehia ˈtu to raro. No te ape i te haamâuˈaraa, e taio anaˈe ehia rahiraa buka ta tatou hou a ani faahou atu ai. Mai te peu e e toe noa mai ta tatou vea, e haamanaˈo anaˈe i te faaiti mai i ta tatou aniraa.
4 Te mau buka ta tatou iho e faaohipa: E tia ia tatou ia ani i te mau buka anaˈe ta tatou e hinaaro mau. Ia vai faito noa iho â râ tatou ia ani tatou i te tahi mau Bibilia faanehenehe, te tahi mau Bibilia ma te faahororaa, e te tahi atu mau buka faito rahi, mai te Concordance, te Index, te Étude perspicace, e te buka ra Prédicateurs, no te mea mea moni rahi ia nenei atu.
5 Te tapao maite ra anei tatou i to tatou iˈoa e to tatou vahi nohoraa i roto i te mau buka ta tatou iho e faaohipa? E faaiti mai te reira i te mau aniraa buka no te mono atu i tei moe. Mai te peu e ua moe ia tatou te hoê buka himene, te hoê Bibilia, aore ra te hoê buka haapiiraa, to roto paha ïa te reira i te mau taoˈa i itehia i te Piha a te Basileia aore ra i te vahi tairururaa.—Luka 15:8, 9.
6 E tutava anaˈe i te faaohipa i ta tatou mau buka ma te paari. E faaite ïa tatou i to tatou haapao maitai i roto i te faaohiparaa i te mau mauhaa ta Iehova e horoa ra na tatou.—Luka 16:10.