E faaohipa anaˈe ma te paari i ta tatou mau papai bibilia
1, 2. Eaha te manaˈo o te taata e rave rahi i ta tatou mau papai, e eaha te uiraa e hiti mai?
1 “Mai 1965 mai â to ˈu taioraa i ta outou mau papai. E hiˈo vau i te Bibilia ia taio vau, e e tuati iho â te mau mea atoa i roto i ta outou mau papai i te Bibilia. Ua hinaaro noa vau e ite i te parau mau no nia i te Atua e ia Iesu, e e nehenehe mau â vau e parau e ua itea mai ia ˈu te mau pahonoraa mau i roto i ta outou mau papai e te Bibilia.” Tera ta te hoê taata i papai i te pu a te mau Ite no Iehova. I roto i taua noa rata ra, ua ani oia i te hoê haapiiraa bibilia.
2 Mai taua taata ra, e mirioni taata i te ao nei te mauruuru nei i te mau tauturu haapiiraa bibilia e horoahia ra e “te tavini haapao maitai e te paari.” (Mat. 24:45) I te mau matahiti atoa, te neneihia nei e rave rahi roa papai no te tauturu i te feia aau haavare ore ia “noaa te ite i te parau mau.” (Tim. 1, 2:4) E nafea tatou e nehenehe ai e faaohipa ma te paari i ta tatou mau papai bibilia?
3. E nafea tatou e nehenehe ai e ape i te haamâuˈa i ta tatou mau papai?
3 Eiaha tatou e haamâuˈa ˈtu: E rahi aˈe paha tatou i te haaputu i te papai i tei hinaarohia. I te mea e mea faufaa te reira, e nafea tatou e nehenehe ai e ape i te haamâuˈa ˈtu? E hinaarohia te haroaroaraa ia rave tatou i te mau papai no ta tatou taviniraa. Eiaha tatou e rave faarahi i taua noa papai ra ta tatou e pûpû, no te aha e ore ai e rave hoê noa aore ra e piti e e ani faahou ua operehia anaˈe tera i te mau taata? Eita ïa te papai e pue noa i te fare. Mai te peu atoa e mea rahi ta tatou vea aita i operehia, e mea maitai aˈe ia faaiti mai ta tatou aniraa vea.
4. Eaha ta te hoê amuiraa e nehenehe e rave ua rahi roa anaˈe te papai?
4 Ua pue noa te mau papai: Mai te peu e ua rahi roa ta te amuiraa te tahi mau papai, e nehenehe te taeae haapao buka e ani i te tahi atu mau amuiraa o te tuhaa fenua tapiri mai e nehenehe anei ratou e faaohipa i te reira. E nehenehe te feia poro e horoa i te mau papai tahito na te mau melo utuafare e ere i te Ite, na te mau piahi Bibilia, e na te tahi atu. E hinaaro atoa paha te feia mea apî i te apitiraa i te amuiraa, i tera mau papai tahito no ta ratou iho vairaa buka teotaratia.
5. E nafea tatou e nehenehe ai e faaite e te haafaufaa ra tatou i ta tatou mau papai?
5 E hinaaro tatou ia raea i ta tatou mau papai ta ratou fa: e tauturu i te feia haavare ore ia ite atu â i te mau opuaraa faahiahia a Iehova. Aita Iesu i haamâuˈa i te maa i toe mai i muri aˈe i te faatamaa-semeio-raa i te mau nahoa, e faaohipa maitai roa atoa anaˈe ïa i te mau papai bibilia i horoahia mai. (Ioa. 6:11-13) E poroi faaora to roto i ta tatou mau papai. E nafea râ taua poroi ra e haaputapû ai i te aau o te feia aau farii, mai te peu e tei nia noa te reira i ta tatou paˈepaˈe aore ra tei roto i ta tatou pute? No reira, ia rave au noa tatou i te mau papai no te taviniraa e ia faaohipa i te reira ma te paari no te maitai o to tatou taata-tupu.—Phil. 4:5.