E tauturu anaˈe i to tatou taata-tupu ia faahanahana ia Iehova
1 Te faaite-haere-hia ra te hoê poroi faufaa i te taata na te ao atoa nei: “A mǎtaˈu i te Atua, e faahanahana ˈtu ia ˈna; ua tae hoi i te hora faautuaraa na ˈna ra: e haamori outou ia ˈna, i tei hamani i te raˈi, e te fenua, e te tai, e te mau pape pihaa ra.” (Apo. 14:6, 7) Tei ia tatou ra te fanaˈoraa taa ê e apiti atu i roto i taua pororaa ra. Eaha te tia ia tatou ia haapii no nia ia Iehova no te aratai i to tatou mau taata-tupu ia mǎtaˈu e ia haamori ia ˈna?
2 To ˈna iˈoa: Ia nehenehe te taata e faataa ê, na roto i to ˈna iˈoa, i te Atua mau otahi ra i te mau atua haavare e rave rahi e haamorihia ra i teie mahana e tia ˈi. (Deut. 4:35: Kor. 1, 8:5, 6) Inaha, ua faaohipa te mau taata papai i te Bibilia hau atu i te 7 000 taime i te iˈoa hanahana o Iehova. Mai te peu e e titauhia te haroaroaraa no te maiti i te taime e faahiti ai tatou i tera iˈoa, eiaha roa ˈtu tatou e huna i te reira, eiaha atoa e taiâ i te faaohipa ˈtu. Te hinaaro ra iho â te Atua e ia itehia to ˈna iˈoa e te mau taata atoa.—Sal. 83:18.
3 To ˈna huru: Ia faahanahana ratou ia Iehova, e tia i to tatou mau taata-tupu ia ite eaha te huru Atua oia. E tia ia ratou ia ite i to ˈna here taa ê, to ˈna paari hau ê, ta ˈna parau-tia hape ore e to ˈna puai hope, tae noa ˈtu to ˈna aroha, to ˈna aau aroha e te tahi atu o to ˈna mau huru maitatai faahiahia. (Exo. 34:6, 7) E tia atoa ia ratou ia haapii i te faatupu i te hoê mǎtaˈu maitai i te Atua e i te faatura ˈtu ia ˈna, ma te ite maite e ua taaihia to ratou ora i ta ˈna farii maitai.—Sal. 89:7.
4 Te haafatataraa ˈtu i te Atua: Ia faaorahia ratou i te haavaraa a te Atua e piri maira, e tia ia tiaoro ia Iehova ma te faaroo. (Roma 10:13, 14; Tes. 2, 1:8) E titau te reira hau atu i te ite-noa-raa i te iˈoa e te tahi mau huru maitatai o te Atua. E tia ia tatou ia tauturu ia vetahi ê ia faatupu i te taairaa e Iehova, ia tiaturi ia ˈna ma to ratou mafatu atoa. (Mas. 3:5, 6) A faaohipa noa ˈi ratou i ta ratou e haapii ra, a pure ai ratou ia Iehova ma te haavare ore e a ite ai ratou i ta ˈna haaraa i roto i to ratou oraraa, e faatupu ratou i to ratou faaroo ia Iehova, ma te haafatata ˈtu ïa ia ˈna.—Sal. 34:8.
5 Ma te itoito, e faaite haere anaˈe i te iˈoa o te Atua e e tauturu anaˈe i to tatou mau taata-tupu ia tiaturi maite ia ˈna e ia mǎtaˈu atu. Peneiaˈe e aratai mai tatou e rave rahi atu â taata ia ite ia Iehova e ia faahanahana ia ˈna ei ‘Atua o to ratou ora.’—Sal. 25:5.