Ia rahi atu â to outou oaoa i roto i te pororaa
1 Te ite ra anei outou i te oaoa ia poro outou i te parau apî maitai? Ia ore tatou e haapao, e nehenehe te ao ino e haaati ra ia tatou e haamǎtaˈu ia tatou e e faaere ia tatou i te oaoa i roto i te taviniraa. E nehenehe atoa te tâuˈa-ore-raa o te feia o te hoê tuhaa fenua e haaparuparu i to tatou itoito. Eaha te mau ravea e au i te rave no te ite hau atu â i te oaoa i roto i te pororaa?
2 Ei manaˈo maitai to tatou: E tauturu mau te atuaturaa i te hoê manaˈo maitai. No reira, e feruriruri anaˈe i ta tatou fanaˈoraa taa ê rahi e riro ei ‘hoa rave ohipa no te Atua.’ (Kor. 1, 3:9) Tei pihai iho atoa o Iesu ia tatou no taua taviniraa ra. (Mat. 28:20) E te turu mai ra oia ia tatou na roto i te arai o te hoê nuu melahi. (Mat. 13:41, 49) Ia papu ïa ia tatou e na te Atua e aratai ra i ta tatou mau tutavaraa. No reira, noa ˈtu te huru o te taata, e faatupu ta tatou taviniraa i te oaoa rahi i nia i te raˈi!
3 E faaineine maitai anaˈe ia tatou: E tauturu atoa te faaineine-maitai-raa ia oaoa tatou. E ere i te ohipa rahi te faaineineraa no te poro. E titau-noa-hia tau minuti no te feruri i te hoê manaˈo no roto mai i te mau vea apî aore ra i te buka e pûpûhia i te reira avaˈe no te haamata i te aparauraa. A maiti i te tahi omuaraa parau i roto i te tumu parau “E nafea ia pûpû i te mau vea” i roto i Ta tatou taviniraa i te Basileia. A hiˈopoa i te “Mau manaˈo tauturu no nia i te mau faaiteraa no te taviniraa” i neneihia i roto i te api hau no Tenuare 2002 aore ra a maiti i te hoê omuaraa o te ohipa i roto i te buka Haaferuriraa. Ia fifihia outou e te hoê patoiraa matauhia i faahitihia mai e te feia i roto i te tuhaa fenua, a faaineine ia outou no te pahono e a huti i to ratou ara-maite-raa i nia i te tahi uiraa o te nehenehe e faatupu i to ratou anaanatae. No reira, mea faufaa roa te buka Haaferuriraa. Ia faaohipahia taua mau mauhaa ra, e noaa ia tatou te oaoa ia poro ma te papu.
4 E tamau anaˈe i te pure: Ua riro te pure ei taviri no te oaoa tamau. I te mea hoi e e ohipa tera na Iehova, e tia ia tatou ia maimi i to ˈna varua o te faahotu atoa i te oaoa. (Gal. 5:22) E horoa mai Iehova i te puai no tatou no te poro ma te tuutuu ore. (Phil. 4:13) E tauturu te pure no te pororaa ia tapea tatou i te hoê manaˈo maitai noa ˈtu te mau tupuraa au ore. (Ohi. 13:52; Pet. 1, 4:13, 14) Ia mǎtaˈu rii tatou, e tauturu te pure ia tatou ia tutava ma te mǎtaˈu ore e te anaanatae.—Ohi. 4:31.
5 E faatupu anaˈe i te mau ravea: Oia mau, e oaoa ˈtu â tatou i te taviniraa ia farerei tatou te taata e ia poro atu tatou. E manuïa ˈtu â paha tatou ia faatano tatou i ta tatou tapura ohipa no te haere e poro i tera e tera fare i te mau hora taa ê, i te hopea avatea anei aore ra i te ahiahi. I te mau taime atoa tei nia tatou i te purumu, te hoo haere mai ra, tei nia i te pereoo mataeinaa aore ra te hahaere noa ra i roto i te hoê aua, e farerei noa tatou i te taata. No te aha e ore ai e faaineine i te hoê faaomuaraa poto e opua ˈtu ai e paraparau i te feia mata ataata? Aore ra, ma te paraparau haere noa e te hoê taata i nia i te eˈa o te ohipa aore ra o te fare haapiiraa, e raea ia tatou te ravea no te poro, na roto noa i te tuuraa ˈtu i te hoê uiraa bibilia o te faatupu paha i to ˈna anaanatae. E rave rahi mau manaˈo tauturu i roto i Ta tatou taviniraa i te Basileia no Tenuare 2002 i te api matamua o te api hau. Ia peehia taua mau aˈoraa ra, e ite tatou i te oaoa rahi atu â i roto i te pororaa.
6 E mea faufaa roa ia tapea i to tatou oaoa no te faaoromai. Te tiai maira te hoê haamaitairaa rahi ia tatou i te pae hopea o te ohipa pororaa, o te ore e rave-faahou-hia. Na teie noa tiaturiraa e faarahi atu â i to tatou oaoa i te pororaa.—Mat. 25:21.