‘Ia taoˈahia outou i te mau ohipa maitatai’
1 I te roaraa o te mau matahiti hopea o ta ˈna taviniraa itoito rahi, ua haa amui te aposetolo Paulo e o Timoteo raua o Tito. Hoê â mau parau faaitoitoraa ta ˈna i papai na raua. Ua parau oia ia Tito e mea titauhia ia ‘rave tamau maite te feia i faaroo i te Atua i te mau ohipa maitatai.’ (Tito 3:8) Ua parau oia ia Timoteo e e tia i te feia e tiaturi ra i te Atua ia ‘taoˈahia i te mau ohipa maitatai.’ (Tim. 1, 6:17, 18) E mau aˈoraa maitai roa teie no tatou paatoa! Tera râ, eaha te turai ia tatou ia rave i te mau ohipa maitatai i roto i to tatou oraraa? E eaha te tahi mau ohipa taa maitai ta tatou e nehenehe e rave i mua nei?
2 Na to tatou tiaturi ia Iehova, to tatou here ia ˈna, e te tiaturiraa faahiahia ta ˈna e horoa maira e turai ia tatou ia taoˈahia i te mau ohipa maitatai. (Tim. 1, 6:19; Tito 2:11) I teie iho â râ taime o te matahiti, e haamanaˈo tatou e ua tono mai Iehova i ta ˈna Tamaiti ra o Iesu i nia i te fenua no te faatia ia ˈNa e no te horoa na te taata atoa e au i te ravea e fanaˈo i te ora. (Mat. 20:28; Ioa. 3:16) E faataa-maitai-roa-hia te reira i te Oroa haamanaˈoraa i te poheraa o te Mesia i te 28 no Mati. Ei haamauruururaa no ta tatou tiaturiraa e fanaˈo i te ora mure ore, aita anei tatou e hinaaro ra e rave i tei maraa ia tatou ia ‘taoˈahia tatou i te mau ohipa maitatai’? Oia iho â ïa! Eaha te tahi mau ohipa ta tatou e nehenehe e rave?
3 Mau ohipa maitatai e rave mai te avaˈe Mati atu: Papu maitai, e haere tatou i te Oroa haamanaˈoraa—te oroa faufaa roa ˈˈe o te matahiti no te mau Ite no Iehova o te ao atoa. (Luka 22:19) E hinaaro râ tatou ia fanaˈo atoa e rave rahi atu â taata i te oaoa o taua oroa ra. Ia hiˈo outou i te tapura taviniraa i roto i te Annuaire 2002, e ite outou e te rahiraa taata i tae mai i te Oroa haamanaˈoraa i te mau fenua e rave rahi i te matahiti i mahemo, e toru ïa, e maha, e pae taime o te numera o te feia poro—e hau atu â i te tahi taime! Eita e ore e ua faaitoito roa te mau amuiraa i te opere i te mau titau-manihini-raa no te Oroa haamanaˈoraa i roto i te tuhaa fenua taatoa. No reira, mai teie atu nei e tae roa i te 28 no Mati, e hinaaro tatou e faataa i te taime rahi atu â no te titau manihini i te taata i te Oroa haamanaˈoraa, ia ite atoa ratou i te tiaturiraa o te faaoraraa.
4 Nafea tatou e faaohipa ˈi i te mau taime maitatai ia ‘taoˈahia tatou i te mau ohipa maitatai’? Na roto ïa i te tamauraa i te poro i te parau apî maitai ma te aau tae, a faaite atu ai i te ‘itoito rahi no te mau ohipa maitatai.’ (Tito 2:14; Mat. 24:14) Mai te peu e eita outou e nehenehe e riro ei pionie tauturu i te avaˈe Mati, e nehenehe anei outou e na reira i te avaˈe Eperera e/aore ra i te avaˈe Me? E mai te peu e e pionie outou i te avaˈe Mati, e nehenehe anei outou e tamau â i te mau avaˈe i muri mai?
5 Ua itea mai i te tahi feia poro e e nehenehe ratou e poro hoê hora ia haere ratou i ta ratou ohipa: e poro ratou ma te faanaho-ore-hia aore ra e paraparau ratou i te feia e rave ra i te ohipa i roto i te mau fare toa o te matara i te poipoi roa. E faataa te tahi pae i te taime tamaaraa no te poro e no te faatere atoa i te hoê haapiiraa bibilia e te hoê hoa ohipa. Mea rahi o to tatou mau tuahine o te faaea i te fare, e rave ïa ratou i te taviniraa a haere ai ta ratou mau tamarii i te haapiiraa. I te tahi taime, e tia oioi ratou i nia no te haapao i te tahi mau ohipa fare, mea rahi atu â ïa to ratou taime i te roaraa o te mahana no te poro e no te haapii i te taata.—Eph. 5:15, 16.
6 Noa ˈtu e eita outou e riro ei pionie tauturu no to outou huru tupuraa, e nehenehe outou e faanaho ia outou iho no te apiti atu â i roto i te taviniraa, a rave atu ai i tei maraa ia outou no te ‘hamani maitai, ia taoˈahia i te ohipa maitatai ra, no te horoa haere, ia au i te opere’ na roto i te faaiteraa i te parau mau ia vetahi ê.—Tim. 1, 6:18, MN.
7 Eiaha e haamoe i te ohipa maitai e faariro i te taata ei pǐpǐ: I te mau matahiti atoa, e haere mai te tahi mau taata e anaanatae ra i te Bibilia i te Oroa haamanaˈoraa. E nehenehe anei te tahi feia poro i roto i te amuiraa e haapao i tera mau taata aita e haapii ra i teie taime? E nehenehe anei ratou e farerei ia ratou no te tauturu atu ia haere ratou i mua i te pae varua? Peneiaˈe e fetii te tahi pae o te tae mai no te tahi mau Ite. I haapii na paha te tahi atu e e hinaaro noa ratou i te tahi faaitoitoraa no te haapii faahou e no te haere tamau i te mau putuputuraa. E oaoa roa ïa tatou ia ite ia ratou ia tavini ia Iehova ma te itoito rahi e o tatou!
8 Papu roa, na roto i te apitiraa ˈtu â i roto i te taviniraa mai te avaˈe Mati atu, e farerei faahou tatou e rave rahi atu â mau taata e anaanatae ra. E tamata tatou i te vaiiho atu ia ratou ma te hoê uiraa. E parau tatou e e hoˈi mai tatou no te faaite i te pahonoraa. Ia na reira tatou, te haamarari ra ïa tatou i te eˈa no te hoê farerei-faahou-raa. Mea maitai aˈe e farerei oioi faahou ia ratou. Mai te peu e aita tatou i haamata i te hoê haapiiraa i te farereiraa matamua, e tamata roa ïa tatou i te haamata hoê i muri mai.
9 Ia poro tatou i roto i te aroâ, e tutava tatou i te haamata i te mau aparauraa e te taata. Ua noaa mai i te feia poro e rave rahi te iˈoa, te vahi nohoraa e te numera niuniu a te tahi mau taata ta ratou i farerei i roto i te aroâ. Mai te peu e aita te taata ta outou i farerei e faaea ra i roto i ta outou tuhaa fenua, a rave ïa i te api parau Veuillez suivre l’intérêt (S-43) i te Piha a te Basileia, a faaî atu e a horoa ˈtu i te papai parau o ta outou amuiraa, o te faatae atu i te amuiraa e haapao ra i te tuhaa fenua i reira te taata e faaea ˈi. Aita anaˈe, e hapono atu ïa te papai parau i te amaa ra o te haapao i te reira. Mea na reira te anaanatae e atuatuhia ˈi.
10 Mai te peu e ua noaa mai te numera niuniu eiaha râ te vahi nohoraa, a taniuniu ïa i te taata no te farerei faahou ia ˈna. A faaineine ia outou na mua. A tuu mai i ta outou buka Haaferuriraa i pihai ia outou no te hiˈo oioi atu i roto. Te manuïa ra te tahi pae i te faatere i te tahi mau haapiiraa na roto i te niuniu paraparau, ei hiˈoraa, e te feia mea fifi ia farerei atu i ǒ ratou. Ua faaoti te hoê tuahine e ani i te numera niuniu a te tahi mau vahine ta ˈna i paraparau i roto i te pororaa na te mau fare. Faahopearaa: ua haamata oia e piti haapiiraa bibilia.
11 E turu anaˈe i te mau matahiapo na roto i te tautururaa i te feia aita e poro faahou ra: E hinaaro te mau matahiapo e haapao ma te here i tera mau taeae e mau tuahine. Ua hoˈi aˈena e rave rahi o tera mau taata aita e poro faahou ra i te mau putuputuraa a te amuiraa. Ua taa ia ratou te faufaaraa ia vai piri roa i te faanahonahoraa a Iehova no te fanaˈo i te panaˈonaˈo ore pae varua e faataahia ra i roto i te Salamo 91. Ua ineine te tahi pae o ratou i te rave faahou i te taviniraa. Mai te peu e e tae mai te tahi atu i te Oroa haamanaˈoraa i te avaˈe Mati, e farii paha ratou i te hoê haapiiraa bibilia. Ia tupu te reira, e rave ïa te mau matahiapo i te tahi mau faanahoraa ia haapii te hoê taata poro e te feia e hinaaro ra i te tauturu. Ia anihia ia outou e tauturu atu, e haafaufaa-rahi-hia ta outou turu.—Roma 15:1, 2.
12 A “rave tamau maite i te mau ohipa maitatai”: E rave rahi, o tei rave i te taviniraa pionie tauturu hoê avaˈe aore ra hau atu, tei ite e ua maraa ta ratou ohipa pororaa i te mau avaˈe i muri mai. Ua farerei ratou i te mau taata e anaanatae ra i ta tatou poroi e ua manaˈo ratou e mea maitai ia farerei faahou ia ratou. Ua faaitoito te reira ia ratou ia tutava ˈtu â i te poro pinepine atu â e i te farerei faahou i tera mau taata. Ua haamata te tahi pae i te tahi mau haapiiraa, a apiti hau atu â ˈi i roto i te taviniraa.
13 No te mea ua oaoa roa te tahi atu i te rave atu â i te pororaa e i te ohipa e faariro i te taata ei pǐpǐ, ua faaoti ratou e hiˈopoa i ta ratou mau fa matamua. Mea na reira ïa to te tahi pae faaitiraa mai i to ratou taime ohipa no te tavini ei pionie tauturu tamau. Ua rave te tahi atu i te taviniraa pionie tamau. Ua tuu ratou i to ratou tiaturiraa i nia i te Atua eiaha râ i nia i te mau mea ta te ao e pûpû mai. Ua itea mai ia ratou e ua hopoi mai te ‘horoa-haere-raa, ia au i te opere’ i te mau haamaitairaa rahi no ǒ mai ia Iehova ra e ua haapaari i to tatou tiaturiraa e fanaˈo i “te ora mau.” (Tim. 1, 6:18, 19, MN) Papu roa, ia maraa te numera o te mau pionie i roto i te hoê amuiraa, o to ˈna mau melo atoa te maitaihia. E hinaaro te mau pionie e faatia mai i te tahi mau ohipa i tupu i roto i te taviniraa e e ani i te tahi atu ia poro e o ratou, e e faatupu te reira i te hoê huru pae varua ˈtu â i roto i te amuiraa.
14 Ia ‘taoˈahia ïa tatou paatoa i te mau ohipa maitatai’ i te tau o te Oroa haamanaˈoraa e i muri mai na roto i te apiti-rahi-raa i roto i te taviniraa Kerisetiano! E faaite anaˈe i to tatou mauruuru no te tiaturiraa ta Iehova e horoa maira, oia hoi e ora e a muri noa ˈtu i nia i te hoê fenua apî i reira te parau-tia e vai ai.—Pet. 2, 3:13.