Te “mau ô taata” o te faaamu i te nǎnǎ a te Atua ma te aau tae

¹ Te “mau ô taata.” Auê ïa faanahoraa î i te here ta Iehova i rave na roto i te arai o ta ˈna Tamaiti e! (Eph. 4:8, 11, 12, MN) Mea rahi ta teie mau taata hopoia, te faaamuraa iho â râ i te nǎnǎ a te Atua ma te itoito e ma te aau tae. (Pet. 1, 5:2, 3) E fanaˈo tatou paatoa i teie faanahoraa faufaa. Noa ˈtu e te faaruru nei tatou i te mau fifi, mea apî to tatou apitiraa mai, mea paruparu aore ra mea atea ê i te amuiraa, te anaanatae mau ra teie mau taata i to tatou oraora-maitai-raa i te pae varua.—Phil. 2:4; Tes. 1, 5:12-14.

² Ua riro anaˈe te tahi mau tupuraa o te ao ei haapeapearaa, “mai te faarǔrǔraa i te vero ra, e mai te pupuniraa i te mataˈi rahi ra” teie mau tiai mamoe. Ua rohirohi anaˈe tatou aore ra ua paruparu, e tamǎrû ratou ia tatou “mai te pape rii tahe i te vahi pâpâmaro ra” aore ra “mai te mǎrǔ o te hoê mato rahi i te fenua paurâ.”—Isa. 32:2.

³ E faaitoito ratou i te feia aita e poro faahou ra: E rave te mau matahiapo i te hoê tutavaraa taa ê no te faaitoito i te feia aita e poro tamau ra aore ra aita e poro faahou ra, e no te tauturu ia ratou ia apiti tamau faahou i roto i te mau ohipa atoa a te amuiraa. Ua tauturu te mau tere î i te here a te mau tiai mamoe e rave rahi taata ia haere mai ma te tuutuu ore i te mau putuputuraa a te amuiraa e ia patu ia ratou i te pae varua, maoti te reira i nehenehe ai ratou e poro faahou. E faaiteraa te mau tutavaraa atoa ta te mau matahiapo e rave ra i te here o Iehova e te aratairaa itoito a Iesu Mesia, o tei faaite i te eˈa na roto i to ˈna tapitapiraa i te mau mamoe i hahi ê aore ra i moe.—Mat. 18:12-14; Ioa. 10:16, 27-29.

⁴ E haapao maitai te mau tiai mamoe i te mau tapao o te faaite i te hoê paruparu i te pae varua o to ratou mau taeae. Te hinaaro mau ra te hoê taata o te faaite i te mau tapao o te toaruaruraa, o te ore e haere tamau mai i te mau putuputuraa, aore ra o te faaiti ra i ta ˈna taviniraa, i te turu i te pae varua. E hinaaro te mau matahiapo e tauturu i te feia o te haamata ra i te faaite i te mau huru o te ao i roto i to ratou faaahuraa e faaneheneheraa rouru aore ra o te faatupu i te hoê feruriraa faaino i te amuiraa. Ma te anaanatae mau e ma te here hohonu, ua ineine te mau matahiapo i te ‘horoa ˈtu ia ratou’ ma te tutava i te tauturu i to ratou mau taeae e mau tuahine ia oraora faahou to ratou here no Iehova.—Tes. 1, 2:8.

⁵ I mutaa ihora, ua atea ê te tahi mau Kerisetiano i te amuiraa e aita i ohipa faahou i te pae varua no te mea ua teimaha ratou i te mau fifi i te pae o te ea, faaravairaa faufaa aore ra utuafare. Ma te ore e faahapa ia ratou, e haamanaˈo te mau matahiapo ia ratou e te haapao mau ra Iehova i ta ˈna mau mamoe atoa e e turu oia ia ratou i roto i te mau fifi. (Sal. 55:22; Pet. 1, 5:7) E tauturu te mau tiai mamoe vai ara noa o te nǎnǎ ia taa ia ratou e mai te peu e ‘e haafatata ˈtu ratou i te Atua, na ˈna e haafatata mai ia ratou,’ a fanaˈo atu ai i te tamahanahanaraa e te tamǎrûraa.—Iak. 4:8; Sal. 23:3, 4.

⁶ E poihere ratou i te feia e mero paruparu to ratou: Aita te mau matahiapo î i te here e haamoe ra i te feia o te nehenehe e ore e itehia. I roto i te mau amuiraa atoa, te vai ra te tahi mau Kerisetiano e mau mero paruparu to ratou aore ra tei roto i te mau fare utuuturaa maˈi. Te taa-maitai-hia ra e na to ratou tupuraa e taotia ra i to ratou apitiraa mai i roto i te pororaa i te poroi o te Basileia. Ta ratou noa mau taata e poro, oia hoi te feia ratere, te tahi atu mau taata maˈi aore ra te feia e haapao ra ia ratou. Teie râ, e turu faufaa te mau mea atoa tei maraa ia ratou i te rave i te ohipa pororaa. (Mat. 25:15) Noa ˈtu e e poro noa ratou 15 minuti, e tia ia tapaohia te reira, maoti te reira e nehenehe ai ratou e vai noa ei taata poro tamau i te Basileia.

⁷ E tâuˈa te “mau ô taata” i te mau hinaaro pae varua o to ratou mau taeae i te tau iho â râ o te Oroa haamanaˈoraa. E taime tano tera no te mau matahiapo ia rave i te hoê tutavaraa taa ê no te tauturu i te feia atoa o tei atea ê ia ite faahou ratou i te oaoa e te hau o te feruriraa ta te amuimuiraa mahanahana e te amuiraa e hopoi mai. E oaoa tatou i te ite i teie mau taata, “to te fetii faaroo,” ia haere mai i te mau putuputuraa e ia apiti mai i roto i te taviniraa, a faaite faahou atu ai i to ratou faaroo i te tusia taraehara.—Gal. 6:10; Luka 15:4-7; Ioa. 10:11, 14.