Hoê mauhaa apî no te haamata i te mau haapiiraa!
1 Ua turu noa te hoê vahine Katolika rahi no Marite i te mau haapiiraa a te Ekalesia. Ua rave atoa oia i te hoê tere pereninaraa i te Vaticana. Tera râ, i to te hoê Ite no Iehova haereraa ˈtu i to ˈna fare, ua farii oia i te hoê haapiiraa bibilia i to ˈna fare. No te aha? No te mea ua hinaaro oia e ite eaha ta te Bibilia e parau ra, e no te mea aita ta ˈna Ekalesia e pûpû ra i te hoê haapiiraa bibilia i te fare o te taata. Eaha te haapiiraa ta tatou e huti mai? Oia ïa, aita tatou i ite o vai paha te farii i te hoê haapiiraa bibilia tamoni ore.—Koh. 11:6.
2 Ua haamarirau ê na anei outou i te parau atu i te hoê taata e te pûpû ra tatou i te hoê haapiiraa bibilia na te feia e hinaaro? Ua ite anei te taata atoa o to outou vahi e te pûpû ra tatou i teie tauturu tamoni ore? Nafea e papu ai ia tatou te reira? Na roto ïa i te faaohiparaa i te hoê mauhaa apî! O te hoê ïa api parau nehenehe e ono api, teie te tumu parau E hinaaro anei outou e ite hau atu â no nia i te Bibilia? E faahohonu mai tatou i teie api parau, tera upoo parau iti i muri i tera upoo parau iti.
3 “No te aha e taio ai i te Bibilia?” Mea anaanatae roa te mau tumu ta te api parau e horoa ra. Te faataahia ra e “e haapiiraa î i te here no ǒ mai i te Atua ra” to roto i te Bibilia, o te faaite ra nafea ia haafatata ˈtu ia ˈna na roto i te pure no te ani i te tauturu e nafea ia noaa mai ta ˈna ô oia hoi te ora mure ore. (Tes. 1, 2:13) Te faahiti ra te api parau i te “mau parau mau [bibilia rau] o te horoa mai i te maramarama,” ei hiˈoraa eaha te tupu ia pohe tatou e no te aha te fifi e rahi ai i te fenua nei. Te faataahia ra “te mau faaueraa tumu bibilia i horoahia mai e te Atua” e ia faaohipahia te reira, e maitaihia tatou i te pae tino e e tupu mai te oaoa, te tiaturiraa, e te tahi atu â mau huru au maitai. Te faahiti ra te api parau i te tahi atu â tumu e tia ˈi ia tatou ia taio i te Bibilia: te mau parau tohu no nia i te tau no a muri aˈe e fatata maira.—Apo. 21:3, 4.
4 “Tauturu ia taa ia outou te Bibilia”: Te haamahitihiti ra te api parau e “e hinaaro tatou paatoa i te tauturu ia maramarama tatou i te Parau a te Atua.” I muri iho, te faataahia ra ta tatou raveraa e haapii: “E pinepine, mea maitai aˈe ia haapii mǎrû noa i te Bibilia, ma te haamata e te mau haapiiraa tumu.” I muri aˈe i te faataa-maitai-raa e “o te Bibilia te aratai,” e faahiti te api parau i te buka rairai Titau ei ravea o te tauturu i te taata haapii “ia taa [ia ˈna] te mau faahororaa o te mau Papai no nia i te mau tumu parau rau.” E faahiti te upoo parau iti i muri iho i te hoê uiraa no te taata taitahi.
5 “E hinaaro anei outou e horoa i te taime i te mau hebedoma atoa ia taa ia outou te Bibilia?” Te faataa ra te api parau e e nehenehe e faanaho i te haapiiraa bibilia i te hoê taime e te hoê vahi e tano i te taata haapii, i to ˈna anei fare aore ra na roto atoa i te niuniu paraparau. O vai te nehenehe e apiti mai? Te pahono ra te api parau e: “To outou utuafare taatoa. E nehenehe atoa te mau hoa ta outou e maiti i te titau manihini e apiti mai. Aore ra o outou anaˈe te paraparauhia mai te peu e tera ta outou e hinaaro.” Eaha te maororaa o te haapiiraa? Te na ô faahou ra te api parau e: “Mea rahi o te faataa hoê hora i te mau hebedoma atoa no te haapii i te Bibilia. Mai te peu e e nehenehe ta outou e faataa hau atu â aore ra e faaiti mai i te taime i te mau hebedoma atoa, e haavata ïa te mau Ite ia ratou no te tauturu ia outou.” Tera te manaˈo faufaa: ua ineine tatou i te faaau atu i te mau huru tupuraa o te taata haapii taitahi.
6 “Te hoê titau-manihini-raa ia haapii”: I nia i te api parau, te vai ra te hoê parau aniraa e faaî ia noaa mai te buka rairai Titau aore ra ia haere mai te hoê taata e faataa i ta tatou porotarama haapiiraa bibilia tamoni ore i te fare. Ua neneihia te api rapaeau o te buka rairai Titau ma te mau peni. Te ite ra anei outou no te aha teie apî parau e faaitoito atu â ˈi i te feia aau haavare ore ia farii i ta outou tauturu? E hiˈo mai râ tatou nafea ia faaohipa maitai aˈe i teie mauhaa apî.
7 E pûpû i te api parau na vai? E nehenehe e tuu roa ˈtu i te api parau i roto i te rima o te taata aore ra i te mau fare aita e taata. E nehenehe e opere haere na tera e tera fare, i roto i te aroâ, e i roto i te tuhaa fenua tapihoo. A pûpû atu na te taata e farii i ta tatou mau papai aore ra eita. A tuu atu i roto i te mau vea aore ra te tahi atu mau papai ta outou e opere. Eiaha e haamoe atu ia poro outou na roto i te rata. A hapono aore ra a afai atu na te feia ta outou i taniuniu. A rave noa mai e rave rahi mau api parau ta outou e opere ia haere outou e hoohoo mai, ia rave outou i te pereoo mataeinaa, e ia poro outou ma te faanaho-ore-hia. A horoa ˈtu na te taata e patoto mai i to outou uputa. A pûpû atu na to outou mau fetii, mau taata tapiri, mau hoa ohipa, mau hoa haapiiraa, e te tahi atu mau taata ta outou i matau. A faaitoito i te tuu atu i teie api parau i roto i te rima o te taata atoa ta outou e farerei! Eaha ˈtu ai?
8 Ia pahono oioi mai te taata: E pahono oioi mai te tahi mau taata ma te ani mai i te hoê haapiiraa bibilia. No reira, ia haere outou i roto i te taviniraa, a rave noa e piti buka rairai Titau: hoê na te taata haapii e hoê na outou. Ia hinaaro te taata, a haamata oioi i te haapiiraa. A iriti i te buka rairai i te api piti, e a taio “Nafea ia faaohipa i teie vea iti.” Ia oti, a rave mai i te haapiiraa 1 e a faaite nafea ia faatere i te haapiiraa. E ere anei i te mea ohie roa?
9 Ia hinaaro te taata e feruri: Eiaha e haamaoro roa, a faaitoito i te farerei faahou ia ˈna. A hiˈo maitai te vai ra anei ta outou te buka rairai Titau. A faaite atu i te tapura tumu parau i te api 2. A vaiiho ia ˈna ia maiti i te tumu parau ta ˈna e anaanatae roa ˈˈe. A hiˈo atu e a haamata i te tauaparau i nia i te tumu parau ta ˈna i maiti.
10 I muri aˈe i te vaiihoraa i te tahi mau vea: Mai te peu e ua vaiiho outou i te api parau e te tahi mau vea, e nehenehe outou e na ô atu ia farerei faahou outou i te taata e: “I te taime i mairi aˈenei i to ˈu haereraa mai, ua oaoa vau i te vaiiho mai i te hoê vea o Te Pare Tiairaa na oe. Ua tapao paha oe i te upoo parau taatoa o te vea, oia hoi Te Pare Tiairaa e faaite ra i te Basileia o Iehova. I teie mahana, e hinaaro vau e faataa ˈtu eaha teie Basileia e eaha to ˈna auraa no oe e to oe fetii.” A iriti i te buka rairai Titau i te haapiiraa 6. A haamata e te paratarafa matamua, a taio e a tauaparau atu ia au i te taime vata o te fatu fare. I muri iho, a faanaho i te farerei faahou ia ˈna i te tahi atu mahana no te faaoti i te haapiiraa.
11 Ia navai noa ta tatou mau api parau: I roto i te amuiraa, e ara te tiaau no te taviniraa e te mau taeae haapao i te mau papai e ia navai noa te api parau E hinaaro anei outou e ite hau atu â no nia i te Bibilia? A tuu i te tahi i roto i to outou pute ahu aore ra ta outou pute moni, i to outou pereoo, i ta outou vahi raveraa ohipa, i te fare haapiiraa, i pihai i te tomoraa o to outou fare—i te mau vahi atoa e nehenehe e rave mai. Parau mau, a tuu i te tahi i roto i ta outou pute pororaa no te mau taime e farerei ai outou i te tahi taata ta outou e nehenehe e tauaparau atu no nia i te Bibilia.
12 Ia haamaitai Iehova i ta tatou mau tutavaraa: E hinaaro rahi to te mau Kerisetiano atoa e haapii i te parau mau ia vetahi ê. (Mat. 28:19, 20) E haapiiraa bibilia anei ta outou? Mai te peu e e, e nehenehe anei outou e faaô mai i te tahi atu i roto i ta outou porotarama tahebedoma? Mai te peu e aita ta outou e haapiiraa bibilia i teie nei, eita e ore e e hinaaro outou i te tahi. A pure ia Iehova ia haamaitai mai i ta outou mau tutavaraa e ite i te tahi taata ta outou e nehenehe e haapii atu, e a ohipa ia au i ta outou mau pure.—Ioa. 1, 5:14, 15.
13 E mauhaa apî ta tatou no te haamata i te mau haapiiraa! A faataa i te taime no te haamatau i te reira. A opere rahi atu. Ia nehenehe outou paatoa e “hamani maitai, ia taoˈahia i te mau ohipa maitatai, ia horoa haere, ia au i te opere” i ta outou i haapii no nia i te Parau a te Atua.—Tim. 1, 6:18, MN.
[Tumu parau tarenihia i te api 4]
MAU TAIME MAITATAI NO TE OPERE I TE API PARAU
◼ I roto i te mau aparauraa i te mau mahana atoa
◼ Ia farii te hoê taata i ta tatou mau papai
◼ Aita anaˈe e taata i te fare
◼ I roto i ta tatou mau farerei-faahou-raa
◼ Ia poro tatou i roto i te aroâ
◼ Ia poro tatou i te feia tapihoo
◼ Ia poro tatou ma te faanaho-ore-hia
◼ Ia papai tatou i te rata
◼ Ia rave tatou i te pereoo mataeinaa
◼ Ia haere mai te hoê taata e farerei ia tatou
◼ Ia paraparau tatou e te fetii, te feia tapiri, te mau hoa ohipa, te mau hoa haapiiraa, e te tahi atu mau taata ta tatou i matau