E faatupu anaˈe i to tatou puai feruriraa i te rahi

¹ Ua hopoi mai te mau mahana hopea ahoaho ta tatou e ora nei i te mau faaheporaa rahi e te mau tamataraa ino e rave rau i nia i te mau tavini a te Atua i te mau vahi atoa. (Tim. 2, 3:1-5) E hinaaro tatou paatoa i te faaitoitoraa ia mau papu tatou i roto i te faaroo. (Kor. 1, 16:13) E mau papu tatou maoti te tauturu a Iehova a tamau noa ˈi tatou i te amu i ta ˈna Parau, i te turui i nia i to ˈna varua, e i te vai piri noa i ta ˈna faanahonahoraa.—Sal. 37:28; Roma 8:38, 39; Apo. 2:10.

² Ua tano maitai te hohoraraa te porotarama o te mahana tairururaa taa ê i te matahiti i mahemo i te manaˈo tumu “Ei taata paari outou i te puai maramarama,” no roto mai i te Korinetia 1, 14:20 (MN), teie hoi ta te aposetolo Paulo i papai: “E au mau taeae, eiaha outou ei tamarii i te [puai maramaramaraa]; area i te ino ra, ei tamarii aruaru ïa outou, i te [puai maramaramaraa] râ, ei taata paari ïa outou.” Eaha to outou manaˈo i te porotarama?

³ “Mea faaitoito mau â!” “Tera iho â ta tatou i hinaaro!” Tera te huru pahonoraa ta tatou i faaroo. Ua haere atoa mai te hoê papa e ere i te Ite i te mahana tairururaa taa ê no te ite i te bapetizoraa o ta ˈna tamahine 12 matahiti, e ua parau oia e ua maere roa oia i te porotarama e ua nehenehe oia e ite e e faufaa-mau-hia to ˈna utuafare. Tera atoa anei to outou manaˈo? E haamanaˈo mai tatou i te tahi mau manaˈo faufaa o taua porotarama ra.

⁴ Mea faufaa te ite mau no te faaohipa i to tatou puai feruriraa: I roto i te oreroraa parau matamua, “A faatupu i to outou puai maramarama i te rahi i teie nei,” eaha te mea faufaa ta te taeae orero i haamataratara no te faaruru i te mau fifi i teie mahana? Eita e navai te ite. E tia ia tatou ia faatupu i te rahi e ia faahohonu i to tatou puai maramarama i te Bibilia ia ore tatou e noaahia i te ino atoa ta tatou e farerei nei. E hinaaro hoi tatou i te aratairaa a te Atua ia noaa mai taua maramaramaraa ra. Mai te papai salamo, e tia ia tatou ia ani ia Iehova na roto i te pure ia haamaramarama mai oia ia tatou i ta ˈna mau ture e ta ˈna mau haamanaˈoraa, ia nehenehe hoi tatou e tavini ia ˈna ma te aau taatoa.—Sal. 119:1, 2, 34.

⁵ I roto i te oreroraa parau i muri iho, ua faaite mai te tiaau haaati e te horoa maira Iehova, na roto i ta ˈna Parau e ta ˈna faanahonahoraa, i “te tahi mau tauturu no te riro ei taata paari i te puai maramaramaraa i te Bibilia.” Ua faataahia te maramaramaraa mai teie: “Te hiˈoraa i roto i te hoê mea e te iteraa eaha to roto i taua mea ra na roto i te haroaroaraa i te mau taairaa i roto i to ˈna mau tuhaa e to ˈna taatoaraa, ia taa hoi ia tatou te auraa o tera mea.” O vai te nehenehe e tauturu mai ia tatou ia faatupu i teie mea i te rahi? Ua horoa mai Iehova i te mau ô taata no te tauturu ia tatou ia haere i mua i te pae varua. (Eph. 4:11, 12) Te faaitoito maira ta ˈna faanahonahoraa i nia i te fenua ia tatou ia taio i te Parau a te Atua i te mau mahana atoa e ia haere tamau i te mau putuputuraa atoa a te amuiraa. (Sal. 1:2) Ua faataahia mai nafea ia faaohipa i te Bibilia e te mau papai Kerisetiano i roto i te haapiiraa taitahi e te utuafare, i roto atoa i te faaineineraa i te mau putuputuraa e te taviniraa. Te faaohipa ra anei outou i teie mau faanahoraa atoa? Te pee ra anei outou i te hoê porotarama taioraa bibilia tamau na outou iho? Mea faufaa roa te reira ia ore tatou e hema i te mau hinaaro o teie nei ao, ta ˈna mau peu apî roa, ta ˈna mau philosophia, e ta ˈna mau ohiparaa haavare.—Kol. 2:6-8.

⁶ E faaohipa anaˈe i to tatou puai feruriraa: I roto i ta ˈna oreroraa parau matamua, “A paruru i to outou huru pae varua ma te faaohipa i to outou puai feruriraa,” ua faataa te taeae orero ratere e aita te feia o teie nei ao i ite i te faataa ê i te mea maitai e te mea ino, no te mea te patoi ra ratou i te farii e i te haapao i te mau faito parau-tia a te Atua. (Isa. 5:20, 21) Area tatou ra, o tei haapiihia e te faanahonahoraa a Iehova i te pae varua, te farii ra ïa i te mau faito a te Atua, o te aratai hoi i ta tatou mau ohipa e to tatou haerea. No reira, e nehenehe ta tatou e faataa ê i te mea maitai e te mea e fariihia e Iehova, i te mea e tuati i to ˈna hinaaro tia roa.—Roma 12:2.

⁷ No te ape i te huru feruriraa feaapiti o te ao e te hotu ino ta ˈna e faatupu, mea titauhia ia faaohipa tamau tatou i to tatou puai feruriraa. Nafea? I roto i te Hebera 5:12-14, ua haamataratara te aposetolo Paulo i te faufaaraa eiaha tatou ia amu noa i te “û” o te parau. E hinaaro tatou i te maa varua etaeta, mai ta tatou e fanaˈo ra i roto i te haapiiraa i te parau tohu a Isaia i roto i te haapiiraa buka. Ia oti, mea titauhia ia faaohipa tatou ma te aau tae i ta tatou e haapii ra i roto i to tatou oraraa. Ia na reira tatou, ua papu ïa ia tatou e mea tia ta Iehova mau faaueraa tumu e ta ˈna mau faito, e e faaohipa ïa tatou i to tatou puai feruriraa no te faataa ê maite i te mea maitai e te mea ino.

⁸ Tera noa râ, ua hiˈa te tahi pae i te pae varua. No te aha? Aita ratou i haamau i to ratou ara-maite-raa i nia i te mea maitai e te mea tia i mua i te aro o Iehova. Ei faahopearaa, ua hema ratou i te mau paraparauraa aita e tuati ra i te mau Papai i roto i te ratio aore ra te afata teata, i te upaupa faufau, aore ra i te mau ohiparaa iino i roto i te mau reni paraparauraa roro uira. Ia ohipa tatou ma te paari, eita ïa tatou e hema i te feia iino, te maamaa, aore ra te morare ore.—Mas. 13:20; Gal. 5:7; Tim. 1, 6:20, 21.

⁹ Ia riro te feia apî ei ‘tamarii aruaru i te ino’: E piti tuhaa o te porotarama o tei faaitoito taa ê i te feia apî ia faatupu i to ratou puai feruriraa i te rahi. Ua faataa te mau taeae orero e te auraa o te riroraa ei ‘tamarii aruaru i te ino,’ oia ïa te vai-noa-raa ei mea ite ore, oia hoi hapa ore mai te tamarii aruaru, i te mau mea viivii i mua i te aro o Iehova. (Kor. 1, 14:20) Ua faaitoitohia tatou paatoa ia ara nafea tatou e faaohipa ˈi i to tatou taime ia ore hoi tatou e û atu i te mau huru ino atoa e ia ore tatou e peehia i te reira. (Eph. 5:15-17) Ua faaitoitohia tatou ia numera ehia rahiraa taime ta tatou e faataa ra no te taio i te mau mea aita e tauturu roa ra ia tatou ia haere i mua i roto i te maramaramaraa i te mau mea pae varua. Ua na reira anei outou? Eaha ta outou i ite? Taa ê atu i te taioraa i te Bibilia i te mau mahana atoa, ia faaoti papu atoa tatou i te tamau i te taio i te mau papai ta te faanahonahoraa e horoa maira. E tauturu ïa te reira ia tatou paatoa, te feia apî atoa, ia ‘titau i te maramaramaraa.’—Mas. 4:7-9, MN.

¹⁰ “Te faufaaraa ia faaohipa i te mau faaueraa tumu bibilia ma te maramarama”: Tera te manaˈo tumu o te oreroraa parau hopea o te porotarama o te mahana tairururaa taa ê. Ua faataa te taeae orero ratere e o Iehova te Tumu o te maramarama o te horoa i te ora e o tei hau ê roa i to te taata. A feruri noa na i te ravea maitai e fanaˈo ai outou i te maramaramaraa o Iehova! Te horoa noa maira oia i te reira na te feia e imi atu ra ma te haehaa e e ani atu ra ma te faaroo. (Mas. 2:3-5, 9; 28:5) Te faaohipa roa ra anei outou i ta ˈna e pûpû maira?

¹¹ Ua faaitoitohia tatou ia haapii i te faataa eaha te mau faaueraa tumu i roto i ta tatou taioraa bibilia. (Tim. 2, 3:16, 17) A haapii maite i te reira ia noaa mai te maramaramaraa mau o te manaˈo o Iehova. A faataa i te taime no te feruriruri e te haamau i te reira i roto i to outou feruriraa e to outou aau. E faaineine te reira i to outou puai feruriraa ia rave outou i te mau faaotiraa maitatai i roto i te oraraa. (Ios. 1:8) E hiˈo mai tatou i te tahi mau tupuraa matauhia e nafea te mau faaueraa tumu bibilia e tauturu ai ia tatou ia rave i te mau maitiraa maitatai.

¹² ‘E tia anei ia farii au i te tahi huru faaahuraa aore ra faaneheneheraa?’ E pinepine, e faaite mai te mau peu apî a teie nei ao i te pae o te faaahuraa e te faaneheneheraa, i te hoê huru feruriraa orure hau. E turai tera huru feruriraa i te taata ia oomo i te mau ahu haapaoraa ore, te au ore, aore ra o te faaaraara i te hinaaro e taati. Eaha te mau faaueraa tumu bibilia e tauturu ia tatou ia patoi i taua mau peu ra? Mai te peu e e faaohipa tatou i to tatou puai feruriraa, e haapao ïa tatou i te faaueraa tumu i roto i te Timoteo 1, 2:9, 10, o te aˈo maira ia tatou ia ahu “ma te faaieie ore, e te haapao maitai . . . , o tei au ïa i te mau [taata] i mau i te paieti ra.” Te vai ra te tahi atu â mau faaueraa tumu e tano i roto i te Korinetia 2, 6:3 e te Kolosa 3:18, 20.

¹³ ‘Eaha ta ˈu e nehenehe e rave ia paari maitai to ˈu mau taairaa e te utuafare?’ Mea faufaa roa te hoê aparauraa maitai i roto i te mau melo utuafare. Te na ô maira te Iakobo 1:19 e: “Ia ru te taata atoa i te faaroo, ia haere maine i te parau, ia haere maine hoi i te riri.” E tia i te mau melo utuafare ia faaroo e ia paraparau atoa te tahi i te tahi, no te mea i roto i te aparauraa utuafare, e ere hoê noa te paraparau. Noa ˈtu e mea tano ta tatou parau, tera râ, ia parau tatou ma te aroha ore, te faaoru, aore ra te teoteo, e riro te reira i te haamauiui maori râ i te tauturu. No reira, e tane aore ra e vahine faaipoipo anei tatou, e metua aore ra e tamarii, ei parau ‘mǎrû maitai noa rapaauhia i te miti’ ta tatou.—Kol. 4:6.

¹⁴ ‘Ua hema anei au i te nounou taoˈa?’ Ua riro te nounou taoˈa ei faaheporaa a teie nei ao o te haafifi i te oraraa. E ere na te reira e horoa mai i te oaoa. Aita te huru maitai o to tatou oraraa i taaihia i ta tatou mau taoˈa materia. (Koh. 5:10; Luka 12:15; Tim. 1, 6:9, 10) No te tauturu ia tatou ia ape i te marei o te nounou taoˈa, ua haapii mai Iesu ia tatou i teie manaˈo tumu faufaa: ia haehaa noa te mata. No te ora i te hoê oraraa faito noa e ere i te mea tafifi roa, mea titauhia ia tiatonu tatou i te mau faufaa a te Basileia, e tuu atu ai i te toea o te mau mea atoa i te piti o te parahiraa.—Mat. 6:22, 23, 33.

¹⁵ Eaha ta tatou fa? I roto i te Parau a te Atua e fanaˈo ai tatou i te hoê tumu papu maitai o te mau faaueraa tumu parau-tia no te aratai ia tatou ia rave i te mau faaotiraa. Mea hinaarohia ia ite tatou i teie mau faaueraa tumu, ia feruriruri atu e ia taa ia tatou nafea ia faaohipa i te reira i roto i to tatou oraraa. Mai te peu e e faaohipa tatou i ‘to tatou puai feruriraa haamatarohia ia faataa ê i te maitai e te ino,’ e fanaˈo ïa tatou i te mau haamaitairaa e e faahanahana tatou ia Iehova.—Heb. 5:14.