Eaha te fa?
1 No te aha tatou e faatere ai i te mau haapiiraa bibilia i te fare o te taata? No te horoa noa anei i te ite, no te haamaitai i te oraraa o te taata aita ra no te haamaramarama i to ratou oraraa no a muri aˈe? Eita. Ta tatou fa matamua, o te faariroraa ïa i te taata ei pǐpǐ a Iesu Mesia. (Mat. 28:19; Ohi. 14:21) No reira e tia ˈi i te mau taata ta tatou e haapii ra ia apiti mai i te amuiraa. Ua taai-roa-hia to ratou haereraa i mua i te pae varua e to ratou ati-maite-raa i te faanahonahoraa Kerisetiano.
2 Nafea e naea ˈi te reira: I te haamataraa iho â, a tamau i te faaitoito i te taata haapii ia haere mai i te mau putuputuraa a te amuiraa. (Heb. 10:24, 25) A faataa ia ˈna e e haapuai te reira i to ˈna faaroo, e tauturu ia ˈna ia rave i te hinaaro o te Atua e ia fanaˈo oia i te amuimuiraa maitai o te tahi atu mau taata e hinaaro atoa ra e arue ia Iehova. (Sal. 27:13; 32:8; 35:18) Na roto i te faaiteraa i to outou here e to outou mauruuru no te amuiraa e no te mau putuputuraa, e faaitoito outou ia ˈna ia haere atoa mai oia i te Piha a te Basileia.
3 E tia i te mau taata tae apî mai ia taa e e huitaeae nunaa rau te faanahonahoraa a Iehova. A haamataitai ia ratou i te mau ripene video Les Témoins de Jéhovah: un nom, une organisation e Toute la communauté de nos frères (Beretane). A tauturu ia ratou ia ite e te faaohipa nei Iehova, na te ao atoa nei, e mau mirioni taata o tei pûpû ia ratou na ˈna no te faatupu i to ˈna hinaaro. A faaite i teie mau taata tae apî mai e te titau-manihini-atoa-hia ra ratou ia tavini i te Atua.—Isa. 2:2, 3.
4 Mea oaoa roa ia ite i te hoê taata haapii i te Bibilia ia riro mai ei pǐpǐ mau a Iesu. Tera ta tatou fa!—Ioa. 3, 4.