Te tamaa maitai ra anei tatou i te pae varua?
1 E parauhia i te tahi taime e: “A faaite mai na oe eaha ta oe e amu, e faaite atu vau o vai oe.” Oia mau, ua taaihia to tatou puai e to tatou ea pae tino i ta tatou mau peu tamaaraa. Oia atoa, e nehenehe ta tatou mau peu tamaaraa pae varua e haamaitai mai aita ra e faaino mai ia tatou, mai ta te mau parau a Iesu e faaite ra: “E ore te taata e ora i te maa anaˈe ra, i te mau mea atoa râ i haapaohia e te Atua.” (Mat. 4:4) Eaha ïa te huru o ta tatou tamaaraa pae varua? Mea fifi anei no tatou? Te tamaa vitiviti ra anei tatou? Aita ra te rave ra anei tatou i te taime no te haafaufaa i te mau tamaaraa pae varua tamau, te vai faito noa e te maitai?
2 E hiˈopoa anaˈe i ta tatou huru tamaaraa: Te horoa ra Iehova i te “maa i te horoa mau ra,” oia atoa te hoê “oroa amuraa maa maitatai,” na roto i “te tavini haapao maitai e te paari.” (Mat. 24:45; Isa. 25:6) No te haafaufaa maite i teie mau faanahoraa î i te here, e tia ia tatou ia rave i te tutavaraa no te faatamaa maitai ia tatou i te pae varua.
3 E nehenehe tatou e ui ia tatou iho e: ‘Te taio ra anei au i te irava mahana e to ˈna tatararaa i te mau mahana atoa? E peu matau anei na ˈu ia taio e ia feruriruri i te Bibilia i te mau mahana atoa? Te faaineine ra anei au ia ˈu no te mau putuputuraa a te amuiraa ma te haapii oioi i te mau tumu parau? Ua taio anei au i ta tatou mau papai hopea nei, oia atoa na buka ra La prophétie d’Isaïe, lumière pour tous les humains?’
4 Ua tǎpǔ Iesu e: “E ao to tei ite i to ratou veve i te pae varua . . . E ao to tei poia e tei poihâ i te parau-tia, e haamâhahia hoi ratou.” (Mat. 5:3, 6, MN) E ara ïa tatou i ta tatou tamaaraa pae varua ma te faatamaa i to tatou mafatu e to tatou feruriraa i te ite i te Atua.