“[E haere] tatou i te fare o Iehova!”

¹ Ua pahono o Davida i te titauraa ma te haamarirau ore: “[E haere] tatou i te fare o Iehova!” (Sal. 122:1). Te “fare” o Iehova, oia hoi te hiero, o te hoê ïa vahi i reira e putuputu ai tei hinaaro e haamori i te Atua mau. O te hoê vahi haumǎrû. I teie mahana, o te amuiraa kerisetiano na te ao atoa te “fare” o te Atua, “te pou e te tumu o te parau mau ra”. (Tim. 1, 3:15.) Mea na roto mai te mau faanahoraa taatoa i ravehia no te ora i taua arai ra. No reira “e tairuru atoa mai te mau nunaa atoa ra i reira” mai te peu e e hinaaro ratou e ite i te mau haamaitairaa tǎpǔhia o te tapao i te faatereraa o te Basileia o te Atua. — Isa. 2:2.

² Te vai nei i roto i taua “fare” ra e hau atu e 69 000 amuiraa i roto e 229 fenua e motu. Te matara noa ra te mau uputa o te mau Piha o te Basileia na te ao atoa, e hau te maha mirioni taata rave ohipa itoito o te pii nei i teie titauraa: “E haere mai. (...) E tei hinaaro ra, a rave noa mai oia i te pape ora, [ma te tamoni ore].” (Apo. 22:17). E rave rahi taata tei faaroo i taua titauraa ra e ua pahono atu ma te oaoa. Ua faaroo vetahi aita râ i haere mai atura i te fare o Iehova; e ere ïa ratou no te amuiraa kerisetiano. E mau “hinaaro pae varua” to ratou o te haamâha-noa-hia e te mau faanahoraa ravehia i roto i te amuiraa (Mat. 5:3). Te ora ra tatou i roto i te hoê tau fifi mau, no te mea te piri oioi maira te hopea o teie nei faanahoraa. Te haamâuˈa nei te haapao ore aore ra te faataupupuraa i te hoê taime faufaa roa. E tia i te mau taata ia tutava ma te ore e haamaoro i te ‘haafatata i te Atua’ ma te tapiriraa ˈtu i ta ˈna faanahonahoraa (Iak. 4:8). Nafea tatou ia tauturu ia ratou?

³ E aratai tatou i te feia i ineine maitai i te faanahonahoraa: I te aparauraa matamua iho â e te feia i ineine maitai, e tia ia aratai tatou i to ˈna ara-maite-raa i te faanahonahoraa. E ite paha tatou i te mau irava i roto i te Bibilia e faataa te mau haapiiraa tumu, tera râ e ere no ǒ mai ia tatou ra taua ite ra. No ǒ mai te mau mea atoa ta tatou i haapii i te faanahonahoraa, e te haapararehia ra na roto i te arai o te pǔpǔ tavini o te horoa ra i te “maa i te hora mau ra”. (Mat. 24:45-47.) I te omuaraa, e tia i te feia o te anaanatae ra i te parau mau ia taa e aita te haamoriraa viivii ore i taotiahia ia tatou nei, e ere atoa i te amuiraa o ta tatou tuhaa fenua; te vai ra te hoê pǔpǔ taata faanahohia, teotaratia e na te ao nei, o te faaterehia ra e Iehova.

⁴ Te aratai ta tatou e fanaˈo ra no ǒ mai ïa ia Iehova ra, o tei tǎpǔ mai i te aratai e te haapii mai ia tatou (Sal. 32:8; Isa. 54:13). Te haaparare-matamua-hia nei taua haapiiraa ra maoti te mau buka. Mai te peu e aratai tatou i te feia i ineine ia haafaufaa i te mau buka, ia taa e itehia i reira te ite faufaa, e ineine hau atu â ratou i te taio, i te faaohipa te mau aˈoraa e vai ra i roto, e eita ïa ratou e faarue oioi noa i te mau aˈoraa. E tia ia faaite noa tatou e ia faaohipa i ta tatou mau buka mai te hoê huru o te faatupu i te faatura no ˈna. E haapii ïa tatou i te feia apî e haere maira ia haafaahiahia i te faanahonahoraa e ia tiaturi i te mau faanahoraa ta ˈna e rave ra.

⁵ E faaara tatou i tei anaanatae ra i te parau mau e te vai nei i pihai iho i to ratou faaearaa te hoê vahi putuputuraa i reira e horoa-tamau-hia ˈi te haapiiraa. E faaite atu i te vahi faaearaa o te Piha o te Basileia e te hora o te mau putuputuraa. E faataa tatou ia ratou te mau taa-ê-raa i roto i ta tatou mau putuputuraa e te mau tairururaa faaroo o ta ratou i apiti na i tahito ra. E farii-popou-hia te taata tataitahi, aita e imiraa moni, e aita e anihia i te taata iho no te mau ô. Te haapao nei te mau tavini nominohia i te tereraa o te mau putuputuraa, tera râ e nehenehe te taata tataitahi e apiti atu ma te horoaraa i te mau pahonoraa aore ra ma te vauvauraa te tahi mau tumu parau. Te fariihia ra te mau utuafare ma te oaoa; te apiti nei te mau tamarii i ta tatou mau aparauraa bibilia. Aita ta tatou mau tavini e amo nei i te mau ahu perepitero aore ra te mau ahu taa ê. Te faanehenehehia nei te Piha o te Basileia ma te au e aita e itehia ra i reira te mau mori meri, te mau tii, te mau hohoˈa faaroo. Te noho nei te rahiraa o te feia e tae mai i pihai iho noa.

⁶ E aratai maine tatou i te anaanatae i roto i te mau haapiiraa bibilia: Te tapao matamua o te hoê haapiiraa bibilia o te haapiiraa ïa i te taata haapii te parau mau hutihia mai roto mai i te Parau a te Atua. E tia atoa i te haapiiraa ia aratai ia ˈna ia haafaahiahia te faanahonahoraa a Iehova e ia faataa ia ˈna te faufaaraa ia riro mai ei melo no ˈna. Ua huti mai te ohipa rahi ravehia i te senekele matamua e Iesu e ta ˈna mau pǐpǐ i te mau taata aau rotahi e ua tahoê ia ratou ia rave amui i te ohipa i raro aˈe i te aratairaa o te hoê tino aratai. I roto i te mau oire i reira te rahiraa o te taata o tei farii i te parau mau, ua haamauhia te mau amuiraa no te horoa ˈtu te hoê faaineineraa e te hoê haapiiraa tamau. Ua haapaarihia te feia i taai na i taua mau amuiraa ra i te pae varua, ua nehenehe ratou e faaruru i te mau tau o te haamauiuiraa (Heb. 10:24, 25; Petero 1, 5:8-10). I to tatou nei mau mahana, te tapao a Iehova o te “amui (...) i te mau mea atoa i te Mesia ra”. (Eph. 1:9, 10.) No reira, e ‘utuafare hui taeae tatou’. — Petero 1, 2:17.

⁷ Te vai ra i roto i te haapiiraa bibilia tahebedoma te hoê haapiiraa o te aratai te mau taata haapii ia haafaahiahia te faanahonahoraa e ia fanaˈo i te faanahoraa i ravehia no to ratou ora. E horoa tatou i te hebedoma tataitahi te tahi noa minuti no te faahiti aore ra no te faataa te hoê manaˈo no nia i te faanahonahoraa aore ra to ˈna tereraa. E ite tatou i te tahi mau manaˈo ia hiˈopoahia i roto i Te Pare Tiairaa o te 1 no mati 1985. Te faaite ra te mau vea iti Les Témoins de Jéhovah du XX^e siècle e Te mau Ite o Iehova—Tahoêhia no te faatupu i te hinaaro o te Atua i nia i te fenua taatoa nei i te faanahonahoraa i roto i to ˈna mau reni rarahi e te mau haamaitairaa o ta tatou e huti mai. E ani tatou i te feia haapii ia mataitai te ripene video Te Ite no Iehova: hoê iˈoa, hoê faanahonahoraa; e ite ïa ratou iho te ohipa i ravehia. E rave mai tatou i te mau faaiteraa e te mau aamu o te faaite ra te mau haereraa i mua o te ohipa na te mau fenua ěê aore ra i roto i te tahi atu â mau ihotumu. E faaohipa atoa tatou i te tahi atu mau buka. Ia au i te taime, e faataa tatou i te feia haapii, ei hiˈoraa, no te aha tatou e haere ai i tera e tera fare, te tapao o ta tatou mau putuputuraa, te ravea ta tatou e faaohipa ra no te pae faufaa e te aanoraa o te taviniraa na te ao nei.

⁸ Ia matau anaˈe te feia o te haapii ra i te Bibilia aita i maoro aˈenei i te tahi mau Ite, e faaitoito te reira ia ratou, no te mea te faarahi nei oia i to ratou ite o te amuiraa. No te reira, e titau manihini anaˈe i te tahi taime te feia poro taa ê ia apiti i te haapiiraa. E aratai te farereiraa i te hoê melo o te amuiraa hoê â tumu aore ra hoê â mau opuaraa ia ite i te parau mau i roto i te hoê faito ê. E opua tatou ia apee mai te hoê matahiapo no te haamatau atu i te taata haapii. Ia apiti mai te tiaau haaati aore ra ta ˈna vahine i te hoê haapiiraa bibilia, e mea faahiahia roa te reira. Mai te peu e te faaea ra te mau Ite i pihai iho noa mai, e faaite tatou i te taata ra: e faaitoitoraa hau atu no te apiti mai i te mau putuputuraa a te amuiraa.

⁹ E faaitoito tatou i te feia i ineine maitai ia apiti mai i te mau putuputuraa: E mea faufaa ia haru mai te feia i ineine maitai i te faufaaraa ia apiti i te mau putuputuraa. E faaitoito ïa tatou i te faaara i to ratou anaanatae. E huti tatou i to ratou ara-maite-raa i nia i te mau tumu parau o te hiˈopoahia i te haapiiraa o Te Pare Tiairaa. E faahiti noa tatou i te mau manaˈo anaanatae o te vauvauhia i te Haapiiraa o te taviniraa teotaratia aore ra i te haapiiraa buka. E parau tatou e e te haafaahiahia ra tatou i te mea o ta tatou e haapii nei i taua mau putuputuraa ra e no te aha tatou i faaoti ai e mea faufaa roa ia apiti atu. Mai te peu e nehenehe, e ani atu e afai tatou ia ratou. E faaitoito hau atu â te hoê noa niuniu hou te putuputuraa ia apiti mai.

¹⁰ Ia haere mai te hoê taata haapii i te Bibilia i te hoê putuputuraa, e farii popou atu. E haamatau ia ˈna i te tahi atu feia poro, te mau matahiapo iho â râ. Mai te peu e e apiti o ˈna i te oreroraa parau huiraatira, e haafarerei ia ˈna i te taeae orero. E faaiteite atu ia ˈna te Piha o te Basileia. E faataa tatou ia ˈna te tapao o te mau iri hooraa o te mau buka e te mau vea, o te mau afata ô, te vairaa buka e te irava o te matahiti. E parau tatou ia ˈna e e ere noa te Piha o te Basileia i te hoê noa vahi no te haamoriraa, o te hoê pu atoa râ mai reira mai te pororaa i te faanahohia i te mau vahi fatata mai.

¹¹ E faataa tatou i te taata haapii te tereraa o te mau putuputuraa. E faaite anaˈe ia ˈna te mau buka e faaohipahia. E haapapu atu o te Bibilia te buka matamua o te mau faahororaa. E nehenehe te taata atoa e apiti mai, te mau tamarii atoa. E faaite tatou ia ˈna e na te mau Ite no Iehova i fatu i te pehe e te mau parau o te buka o te mau himene no ta tatou haamoriraa. E faaite tatou ia ˈna e mea taa ê te mau tumu o te feia e haere mai ra i te mau putuputuraa. E paraparau tatou ma te aau tae o te auhoa e te farii popou e vai ra i rotopu ia tatou. E riro taua anaanatae hamani maitai ra, ma te aau rotahi, ei hoê paha o te mau tuhaa matamua o te faaoti i te taata haapii ia hoˈi faahou mai.

¹² No te aha vetahi e haamarirau ai: Te faaite pinepine nei te tahi mau taata, noa ˈtu te mau tutavaraa, i to ratou au ore i te haafatata i te faanahonahoraa. Eiaha tatou e tuu oioi noa to tatou rima i raro. E tamata tatou i te rave i to ratou parahiraa. E tae roa mai i teie nei, aita paha ratou e hinaaro ra e haere i te mau pureraa, i te mau tupuraa taa ê noa râ. Te tamata nei paha te mau melo o to ratou utuafare aore ra te mau hoa i te faataui i to ratou manaˈo. Te haamǎtaˈuhia nei paha ratou e te mau faainoraa o te mau taata tapiri. E, mai tei matauhia, ua haafifihia paha ratou e te mau ohipa atoa e te mau hoa aore ra te mau faaanaanataeraa manaˈo, peneiaˈe te mau aua o te ore e nehenehe e paiuma i to ratou hiˈoraa. E tauturu ïa tatou ia ratou ia rave mai te hoê manaˈo tia e ‘ia faaô mai te mau mea i hau i te maitai ra’. — Phil. 1:10.

¹³ E faaite tatou ia ratou te mau tumu bibilia ia tamau noa. E tuu anaˈe i te tapao i nia i te tumu e te hinaaro rahi nei tatou e ia tauturuhia e ia faaitoitohia tatou i te pae varua, o ta te amuimuiraa ïa i te mau taeae kerisetiano e hopoi mai (Roma 1:11, 12). Ua faaite maitai o Iesu e ere te patoiraa a te utuafare i te hoê otoheraa ia ore tatou e farii i te parau mau (Mat. 10:34-39). Ua tauturu mai o Paulo ia tatou ia ore ia haama i te faaiteraa ˈtu ia tatou ei mau pǐpǐ a Iesu (Tim. 2, 1:8, 12-14). E anihia i te hitahita ore i roto i ta tatou iho mau opuaraa e te mau faaanaanataeraa manaˈo, ia ore anaˈe e riro mai ïa ratou ei mau herepata (Luka 21:34-36). No te fanaˈo i te haamaitairaa a Iehova, e tia ia tavini ia ˈna ma to ˈna [nephe] atoa, eiaha râ ma te mafatu feaapiti (Kol. 3:23, 24). Ia nehenehe te mau taata e taa maitai i taua mau faaueraa tumu bibilia ra, e turai paha tatou ia ratou ia haere i mua i te pae varua.

¹⁴ Te matara nei te mau uputa: Tei nia roa te fare o te haamoriraa mau a Iehova i te tahi atu. I roto e 229 fenua e motu te piihia nei teie titauraa manihini e: “E haere mai, e haere tatou i nia i te mouˈa o Iehova (...); e na ˈna e haapii mai i ta ˈna haapaoraa, e haere tatou na te eˈa ta ˈna e faaite maira.” (Isa. 2:3). E haapapu te feia o te farii atu i to ratou ora. Hoê o te mau ravea maitatai roa ˈˈe no te tauturu ia ratou o te aratairaa ïa ia ratou i te faanahonahoraa a Iehova.