“E tapea maite au! E tapea maite au! E tapea maite au!”
1 Te haamanaˈo ra teie mau parau haaputapû a te hoê Kerisetiano haapao maitai o tei ora mai i te Taparahiraa a te mau Nazis i te faaotiraa papu a tera mau tausani Ite—i pohe aore ra i ora mai—o tei mau maite i mua i te hamani-ino-raa Nazi. (Eph. 6:11, 13) Te faaitehia ra te aamu oraora mau o to ratou itoito e to ratou upootiaraa i roto i te ripene video haaputapû La fermeté des Témoins de Jéhovah face à la persécution nazie. Te faaitoitohia ˈtu nei te mau melo atoa o te amuiraa ia mataitai i te reira, e ia faaite i to ratou mau manaˈo e mau huru hohonu o te aau no nia i taua tumu parau ra.
2 E nehenehe outou e faaohipa i teie mau uiraa no te faaara i to outou feruriraa: (1) No teihea mau tumu i patoi maite ai te mau Ite no Iehova i te mau Nazis? (2a) Eaha te mau manaˈo aita e tuea ra no nia i te faahanahanaraa ia Hitler, e no te aha? (2b) Eaha te mau faahopearaa i tupu i nia i te mau utuafare o te mau Ite? (3) Ehia rahiraa Ite i afaihia i roto i te mau aua faatîtîraa, eaha te tapao o te faataa ê ia ratou i te tahi atu mau taata i tapeahia, eaha te huru o te Gestapo i nia ia ratou? (4) Eaha te hoo ta to tatou mau taeae i ore i hinaaro e aufau ia tiamâ mai ratou? (5a) Anafea e nafea to te mau Ite no Iehova patoiraa i te mau ohipa riaria a te faatereraa a Hitler? (5b) Ua nafea o Hitler? (6) Nafea te tahoêraa o te nunaa o Iehova i faaora mai ai ia ratou e ia vetahi ê, i te pae tino tae noa ˈtu i te pae varua? (7) Eaha te himene tei papaihia i roto i te hoê aua faatîtîraa? (8) Eaha te mau hiˈoraa o te mau tane, mau vahine e mau taurearea haapao maitai o te faaitoito ia outou ia tapea i to outou taiva ore i mua ia Iehova noa ˈtu eaha te ohipa e tupu mai? (Hiˈo atoa i te Annuaire 1999, mau api 144-147.) (9) Ei Ite no Iehova, eaha to outou manaˈo no nia i teie ripene video no nia i te oreraa e amui e to teie nei ao?
3 E nehenehe te hiˈoraa faaitoito o te mau Ite no Iehova e faatiahia ra i roto i te ripene ra Fermeté e tauturu i te feia apî, noa ˈtu e e ere ratou i te Ite, ia feruriruri i te mau tumu parau faufaa mai te faaoromai ore, te faaheporaa a te mau hoa e te manaˈo haava. Mai te peu e tei te fare haapiiraa tuarua outou, no te aha e ore ai e pûpû atu i ta outou mau orometua ia faaohipa i teie ripene i te piha haapiiraa? E nehenehe paha outou e horoa ˈtu i te tahi na ratou e e faaite i te reira mai te hoê faatiaraa i nia i te hoê tuhaa matau-ore-hia o te Tuatapaparaa aore ra mai te hoê hohoˈa ma te hoê haapiiraa i te pae morare.
4 E mauhaa maitai roa te ripene video ra Fermeté no te faaite nafea te haapiiraa a te Atua e horoa ˈi i te puai pae varua na tatou no te faaoaoa i te Atua ma te tapea maite i te mea tia. (Kor. 1, 16:13) Eiaha tatou e haamarirau i te faaite atu i te reira i te feia atoa o te anaanatae ra i te parau mau.