A haaputapû i te mafatu o ta outou taata haapii
1 Na mua ˈˈe oia a mauê ai i te raˈi, ua parau Iesu i ta ˈna mau pǐpǐ ia haapii i to ratou mau taata-tupu ia “haapao” i te mau mea atoa ta ˈna i faaue. (Mat. 28:19, 20) Ia “haapao” te hoê taata i te mau faaueraa a te Mesia, ia haaputapû ïa te mea ta ˈna e haapii ra i to ˈna mafatu e tia ˈi. (Sal. 119:112) Nafea outou e nehenehe ai e haaputapû i te mafatu o te hoê taata ta outou e haapii ra i te Bibilia?
2 A pure ia noaa mai te aratairaa a Iehova: Na te Atua te ohipa e faariro i te taata ei pǐpǐ. Mea titauhia te haamaitairaa a te Atua, eiaha to tatou mau aravihi, no te manuïa mai. (Ohi. 16:14; Kor. 1, 3:7) Mea faufaa ïa ia pure ia Iehova ia tauturu mai oia ia tatou ia haapii i te parau mau ia vetahi ê.—Isa. 50:4.
3 A haroaroa i te mau tiaturiraa o te taata haapii: Ia ite tatou eaha ta te taata e tiaturi ra e no te aha oia e tiaturi ai, e nehenehe tatou e haroaroa i te mea e tia ia parau no te haaputapû i to ˈna mafatu. No te aha te hoê taata haapii e anaanatae taa ê ai i te tahi haapiiraa? Na te aha i haapapu ia ˈna e mea mau te reira? E tauturu taua ite ra ia tatou ia paraparau ma te tano.—Ohi. 17:22, 23.
4 A horoa i te tahi mau haapapuraa bibilia e te tano: Ia riro te parau mau ei mea faito noa no te hoê taata haapii. (Ohi. 17:24-31) E tia ia horoa i te mau tumu papu maitai o to tatou tiaturiraa. (Pet. 1, 3:15) E na reira noa râ tatou ma te faaoromai e te hamani maitai.
5 A paturu i ta outou haapiiraa maoti te mau faahohoˈaraa: Eita noa te mau faahohoˈaraa e faaohie i te maramarama o te taata haapii, e haaputapû atoa râ i to ˈna mau manaˈo o te aau. E ohipa te reira i nia i te feruriraa e te mafatu. Ua faaohipa pinepine Iesu i te reira. (Mar. 4:33, 34) Parau mau, no te manuïa mai, e tia i te hoê faahohoˈaraa ia tuati i te manaˈo e aparauhia ra e te oraraa o te taata haapii.
6 A faaite i te mau haamaitairaa e fanaˈohia ia fariihia te parau mau: E hinaaro te mau taata e ite i te mau haamaitairaa e noaa mai ia ratou ia faaohipa ratou i te mea ta ratou e haapii ra. A tauturu ïa i ta outou taata haapii ia haroaroa i te paari o te mau parau a Paulo i roto i te Timoteo 2, 3:14-17.
7 Eiaha outou e toaruaru mai te peu e aita vetahi pae e faaohipa ra i te mea ta outou e haapii ra ia ratou. Eita te mau mafatu atoa e farii. (Mat. 13:15) E riro mai râ te tahi mau taata ei feia faaroo. (Ohi. 17:32-34) Ia nehenehe outou, na roto i ta outou mau tutavaraa e haaputapû i te mafatu o te mau taata i te parau apî maitai, e tauturu e rave rahi ia farii e ia “haapao” i te mea ta Iesu i faaue!