E faaitoito anaˈe i te farerei i te feia tariˈa turi o ta tatou tuhaa fenua
1 Te faatae ra Iehova i teie titau-manihini-raa i te taata taitahi: “E haere mai. . . . E tei hinaaro ra, a rave noa mai oia i te pape ora.” (Apo. 22:17) Te rahi noa ˈtu ra te feia tariˈa turi o te farii ra i teie titau-manihini-raa, no reira i haamauhia ˈi na te ao nei e rave rahi amuiraa e pǔpǔ reo ǎparaa rima i teie mau matahiti i mairi aˈenei.
2 Noa ˈtu e i roto i ta ratou ohipa pororaa te haamau ra taua mau amuiraa e mau pǔpǔ ra i ta ratou mau tutavaraa i nia i te imiraa i te feia tariˈa turi o ta ratou tuhaa fenua, mea rahi â o te tia ia itea mai e ia porohia ˈtu.
3 Eaha te tauturu ta outou e nehenehe e horoa? Te ite ra anei outou i te tahi mau vahi taata i te tahi mau taata o te faaohipa ra i te reo ǎparaa rima? I ta outou vahi raveraa ohipa aore ra i te fare haapiiraa, ua matau anei outou i te hoê taata e tariˈa turi hoê melo o to ˈna utuafare? I roto i ta outou mau ohipa i te mau mahana atoa, ia ite oioi outou i te feia tariˈa turi. Nafea râ e papu ai ia outou e e fanaˈo ratou i te hoê faaiteraa no nia i te Basileia?
4 Ia horoahia te faaiteraa: I roto i te mau tuhaa fenua e mau amuiraa aore ra mau pǔpǔ reo ǎparaa rima to reira, e faatae atu te feia poro i te mau vahi nohoraa o taua feia tariˈa turi ra. E haapii oioi aˈe e rave rahi o ratou i te parau mau mai te peu e e nehenehe ratou e apiti atu i te tahi mau Ite tariˈa turi o te haere ra i te mau putuputuraa a te hoê amuiraa reo ǎparaa rima. Na te papai parau o te amuiraa e faatae i te mau vahi nohoraa o te feia tariˈa turi atoa i farereihia i roto i te tuhaa fenua. I teie nei taime, i Polinesia Farani nei, aita e amuiraa, aita atoa e pǔpǔ reo ǎparaa rima.
5 Eaha ˈtura ïa mai te peu e aita e taata tapiri i ǒ outou o te nehenehe e horoa i te tahi tauturu pae varua na te hoê taata tariˈa turi? Nafea outou e tauturu ai ia ˈna? No te aha e ore ai e farerei ia ˈna e e paraparau i te mau melo e ere i te tariˈa turi o to ˈna utuafare? A pûpû i te pataraa o te hoê ripene video reo ǎparaa rima o te nehenehe e faaara i te anaanatae o te taata tariˈa turi. Ua haapii atoa te tahi mau taata poro i te reo ǎparaa rima no te tauturu ma te aravihi roa ˈtu â i te feia tariˈa turi. (Ohi. 16:9, 10) Te vai ra te mau ripene video o te buka rairai Titau e te buka Ite na roto i te reo ǎparaa rima (Farani no te buka rairai ra Titau; Marite no te buka ra Ite). Ua manuïa maitai roa aˈena te tahi mau haapiiraa bibilia i te faaohiparaahia teie mau ravea.
6 Ma te ite oioi i te feia tariˈa turi o ta outou tuhaa fenua, e nehenehe outou e pûpû atu ia ratou i te ravea e rave i te pape ora ma te tamoni ore.—Mat. 10:11.