A tamau i “te rave i te mea maitai roa”
1 E ohipa maitai roa ta outou i rave i to outou riroraa mai ei tavini a te Atua ra o Iehova. I teie nei râ, teie atura te fifi, te tamauraa ïa i “te rave i te mea maitai roa” i teie anotau fifi mau. (Gal. 6:9, MN) Noa ˈtu e e titauhia te tahi mau tutavaraa mau, e nehenehe outou e manuïa. Nafea?
2 A atuatu i te huru feruriraa o Iesu: Mai ia Iesu, e faaoromai outou i te mau tamataraa mai te peu e eita outou e haamoe i te tiaturiraa o te Basileia. (Heb. 12:2, 3) Ia papu ia outou e te here ra Iehova ia outou e te hinaaro ra oia e ite e e manuïa ta outou mau tutavaraa. (Pet. 2, 3:9) A tiaturi taatoa ia ˈna, ma te ite papu e e turu mai oia ia outou. (Kor. 1, 10:13) A tamau maite â i te pure, ma te ani ia Iehova ia tauturu mai ia outou ia faaoromai. (Roma 12:12) A oaoa i te iteraa e maoti to outou faaoromai e noaa ˈi ia outou te tiaraa taata fariihia e te Atua. (Roma 5:3-5) Mai te peu e e atuatu outou ma te haapao maitai ‘i te huru feruriraa ia au i to te Mesia ra o Iesu,’ e oaoa mau â outou e e faaoaoa outou i te mafatu o Iehova.—Roma 15:5, MN; Mas. 27:11.
3 A tamau i te rave i te mau ohipa maitatai: A haafaufaa roa i te mau faanahoraa ta Iehova e rave ra no te tauturu i to ˈna nunaa ia tamau i te rave i te mea maitai roa. A tapea maite i te hoê porotarama maitai no te taioraa taitahi i te Parau a te Atua, e te haapiiraa i te mau papai bibilia ta te pǔpǔ o te tavini haapao maitai e te paari e horoa ra. A faaineine maitai ia outou, a haere mai e a apiti mai i roto i te mau putuputuraa atoa a te amuiraa. Na mua ˈˈe e i muri aˈe i te mau putuputuraa Kerisetiano, a anaanatae atu i to outou mau taeae e mau tuahine pae varua. A haamau i te tahi mau fa e au no te poro ia au i tei maraa ia outou e no te faaite i te parau apî maitai ma te anaanatae roa ˈtu â.
4 Mea na reira outou e nehenehe ai e tamau i te rave i te mea maitai roa e, i te hoê â taime, e ite i te oaoa rahi. I roto i taua tuhaa ra, te na ô ra te hoê taeae Italia e: “Ua po anaˈe e ua hoˈi anaˈe au i te fare i muri aˈe i te hoê mahana i roto i te taviniraa a Iehova, ua rohirohi au, parau mau, mea oaoa râ, e e haamauruuru vau ia Iehova i te horoaraa mai i te hoê oaoa eita ta te hoê noa ˈˈe taata e nehenehe e faaore.” No reira, a tamau i te rave i te mea maitai roa, e o outou atoa, e fanaˈo outou i te hoê oaoa rahi!