Mea maitai aˈe e faaohie noa
1 No te aha e pinepine ai i te mau maitai mai i te feia poro apî te ara-maite-raa o te mau taata ta ratou e poro atura i te poroi o te Basileia? Taa ê atu i te tahi mau mea, no te mea mea ohie noa ta ratou mau parau. Te manaˈo ra paha te tahi feia poro e no te manuïa i roto i te pororaa, e tia ia paraparau ma te aravihi rahi. Te faaite nei râ te mau tupuraa e mea maitai aˈe ia ohie e ia maramarama noa te vauvauraa parau.
2 Ua poro Iesu i te Basileia o te Atua ma te ohie e te haapeu ore, e ua faaineine oia i ta ˈna mau pǐpǐ ia na reira atoa. (Mat. 4:17; 10:5-7; Luka 10:1, 9) I faatupu na oia i te anaanatae o te feia e faaroo ra ia ˈna e i haaputapû na oia i to ratou mafatu i te mau omuaraa parau, te mau uiraa e te mau hiˈoraa e taa-maitai-hia. (Ioa. 4:7-14) Mea maitai ia pee tatou ia ˈna na roto i te faaohiparaa i te mau vauvauraa parau e taa-ohie-hia.
3 Te “evanelia o te basileia,” o te poroi ïa e tia ia tatou ia poro. (Mat. 24:14) Ia rave tatou i te Basileia ei tumu parau rahi, e vai ohie noa ta tatou vauvauraa parau. E paraparau anaˈe no nia i te mau mea e au i te taata. E pinepine, mea anaanatae aˈe na te mau vahine to ratou utuafare i te mau tumu parau poritita. E tapitapi na mua te hoê metua tane no ta ˈna ohipa e te maitairaa o to ˈna utuafare. E haapeapea te feia apî no to ratou a muri aˈe; e manaˈonaˈo te feia paari i te ea maitai aˈe e te panoonoo ore. Mea tâuˈa aˈe na te taata te mau mea e tupu ra i ǒ ratou i to te mau fenua atea. I muri aˈe i te tauaparauraa e ratou i te hoê tumu parau ta ratou paha e anaanatae, e huti anaˈe i to ratou ara-maite-raa i nia i te mau haamaitairaa ta te mau taata faaroo e fanaˈo i raro aˈe i te faatereraa a te Basileia o te Atua. Te tahi mau parau ohie, i maiti-maitai-hia, i amuihia ˈtu i te hoê irava bibilia, tera te mau ravea maitai roa ˈˈe no te faatupu i te anaanatae o te taata e faaroo maira ia tatou.
4 E nehenehe e haamata i te tauaparauraa mai teie:
◼ “E farii paha oe e te haamǎtaˈu-noa-hia ˈtura tatou e te mau maˈi ora ore e rave rahi. Ua ite anei râ oe e ua tǎpǔ te Atua e faaore roa a muri nei i te mau huru maˈi atoa e te pohe atoa?” E vaiiho anaˈe ia pahono mai te taata, e taio anaˈe atu ai i te Apokalupo 21:3, 4.
5 Na roto i te mau vauvauraa parau ohie e te maramarama, ia nehenehe tatou e haaputapû i te feruriraa e te mafatu o te feia rahi atu â o ta tatou tuhaa fenua, a tauturu atu ai i te ite ia Iehova e te tiaturiraa o te ora mure ore!—Ioa. 17:3.