A horoa i te faaiteraa na roto i te riroraa ei taata tapiri maitai
1 Ua parau Iesu e: “E aroha ˈtu oe i to taata-tupu, mai to aroha ia oe iho na.” (Mat. 22:39) Peneiaˈe te ‘hamani maitai ra outou’ i to outou mau taeae, teie râ, e nehenehe anei ta outou e faatae i to outou aroha i nia i to outou feia tapiri? (Gal. 6:10) Nafea?
2 Na roto i te faaiteraa o vai mau outou: Ua ite anei to outou feia tapiri e e Ite no Iehova outou? Aita anaˈe, no te aha e ore ai e haere e hiˈo ia ratou i roto i te pororaa? E maere paha outou i te faahopearaa! Mai te peu e mea au aˈe na outou, a poro atu ma te faanaho-ore-hia. Mai te peu e tei rapae outou e te rave ra to outou feia tapiri i te ohipa rii i roto i te aua aore ra te hahaere ra i nia i te purumu, a ataata ˈtu ma te mahanahana e a haamata i te tauaparau atu ia ratou. A tamata i te paraparau no nia i ta outou mau tiaturiraa, te vahi to reira te Piha a te Basileia e te mea e tupu i reira; mai te peu e te haere atoa ra te tahi atu taata tapiri i ǒ, a faaite atu. A titau atu ia ratou i te mau putuputuraa. A faaoti maite e poro faahope i te parau apî maitai i te feia atoa ta outou i matau.—Ohi. 10:42; 28:23.
3 Na roto i te hoê haerea maitai roa: E faaite rahi to outou haerea tauturu i to outou huru mau e maoti te reira e nehenehe ai i te tahi taime e horoa i te faaiteraa. Hau atu â, e ‘faanehenehe te reira i te parau a te Atua.’ (Tito 2:7, 10) A tâuˈa ˈtu i to outou feia tapiri ma te haavare ore. A riro ei hoa e a faaea hau noa e ratou. A faatura i to ratou tiaraa e imi i te moemoe e te hau. Ia maˈihia te hoê o ratou, a pûpû i ta outou tauturu ma te manaˈo e hamani maitai. Ia haere mai te hoê utuafare e noho i roto i te tuhaa oire, a manava ˈtu. E haaputapû taua mau ohipa maitatai ra i te taata, e mea oaoa na Iehova.—Heb. 13:16.
4 Na roto i te araraa i te huru o to outou fare: Te riroraa ei taata tapiri maitai, o te atuatu-atoa-raa ïa i to ˈna nohoraa. E faaiteraa ma te parau ore te hoê fare e te hoê aua mâ e te au mau. I te tahi aˈe pae, e faaino te hoê fare reporepo e te hoê aua ua î i te mau mea faaruehia i te poroi o te Basileia. Mea faufaa roa ia ara i te vai-mâ-raa e te vai-maitai-raa o to outou fare e te mau vahi e haaati ra e to outou atoa pereoo.
5 E tapao no te aroha i te taata-tupu te anaanataeraa ˈtu i te mau taata no rapaeau i te amuiraa Kerisetiano. Eaha te faahopearaa o te reira? Peneiaˈe o te riro e ‘ia hiˈo ratou i ta outou parau maitai, e haamaitai te tahi pae i te Atua.’—Pet. 1, 2:12.