E horoa Iehova i te puai
1 Eaha to outou manaˈo no nia i te aposetolo Paulo? Ia taio tatou i te buka Ohipa, e ite tatou i to ˈna itoito i te taviniraa ia Iehova. Nafea te noaaraa ia ˈna i te na reira? Te pahono ra oia e: “E tia ia ˈu te mau mea atoa nei [ia ˈna], tei tauturu mai ia ˈu ra.” (Phil. 4:13; MN) E nehenehe atoa tatou e fanaˈo i te puai ta Iehova e horoa. Nafea? Na roto i te faaohiparaa i na faanahoraa e ono ta ˈna i rave no te faaitoito e no te haapuai ia tatou i te pae varua.
2 Te Parau a te Atua: Mai ia tatou e tia ia tamaa no te atuatu i to tatou puai i te pae tino, e tia atoa ia tatou ia amu i te Parau a te Atua ia vai ora noa tatou i te pae varua. (Mat. 4:4) Te horoa ra te Bibilia i te puai o te turu ia tatou. Ia itoito e ia anaanatae noa tatou i te parau mau, e tia ia tatou ia haapii e ia feruriruri maite i te mau mahana atoa ia nehenehe anaˈe.—Sal. 1:2, 3.
3 Te pure: Mea faufaa ia atuatu i te mau taairaa piri e o Iehova, i te mau taime fifi iho â râ. Maoti to ˈna varua, e horoa oia i te puai na te feia e ani ra ia ˈna na roto i te pure. (Luka 11:13; Eph. 3:16) Te faaitoito maira te mau Papai ia “tamau uˈana maite â i te pure.” (Roma 12:12) Te na reira ra anei outou?
4 Te amuiraa: E riro atoa te mau putuputuraa a te amuiraa e te auhoaraa mahanahana o to tatou mau taeae e mau tuahine ei puai e ei faaitoitoraa. (Heb. 10:24, 25) Ia peapea tatou, e faaitoito e e tauturu to tatou mau hoa ia tatou ma te here.—Mas. 17:17; Koh. 4:10.
5 Te pororaa: E tauturu te apiti-tamau-raa tatou i roto i te pororaa ia haamau i to tatou feruriraa i nia i te Basileia e ta ˈna mau haamaitairaa. Ia tauturu tatou i te tahi atu mau taata ia haapii no nia ia Iehova, e faaoaoa te reira ia tatou. (Ohi. 20:35) Eita te taata atoa e nehenehe e haere e tavini i te vahi e hinaaro-rahi-hia ra te feia poro aore ra e rave i te taviniraa taime taatoa, e nehenehe râ tatou e apiti rahi i roto i te pororaa na roto i te tahi atu â mau ravea.—Heb. 6:10-12.
6 Te mau tiaau Kerisetiano: Te fanaˈo ra tatou i te mau faaitoitoraa e te tauturu a te mau matahiapo. Te ani ra Iehova ia ratou ia faaamu i te nǎnǎ ta ˈna i tuu atu na ratou e tiai. (Pet. 1, 5:2) Mai ia Paulo i to ˈna ra tau, e patu te mau tiaau ratere i te mau amuiraa ta ratou e tavini ra.—Roma 1:11, 12.
7 Te hiˈoraa o te mau Kerisetiano haapao maitai: Mea anaanatae ia hiˈo i te mau hiˈoraa maitai o te mau hoa haapao maitai no mutaa ihora aore ra no teie mahana. (Heb. 12:1) Ia hinaaro outou e ia itoitohia outou, no te aha e ore ai e taio i te tahi o te mau aamu faaitoito o te oraraa neneihia i roto i ta tatou mau vea, te hoê faatiaraa faaanaanatae manaˈo i roto i te Annuaire aore ra te tahi mau tuhaa anaanatae o te aamu o te mau Ite no Iehova i papaihia i roto i te buka Prédicateurs?
8 Ua ite te hoê taeae paari hau atu i te 90 matahiti to ˈna i teie nei, o tei farii i te parau mau a tamaiti iti noa ˈi oia, i te tamataraahia to ˈna faaroo a vai apî noa ˈi â oia. Na mua, ua faarue te tahi mau melo itoito roa o te amuiraa i te faanahonahoraa a Iehova. Te vai atoa ra te pororaa i tera e tera fare ta ˈna i manaˈo e mea fifi roa. Teie râ, ua tamau noa oia i te turui i nia ia Iehova, e ua au ihora oia i te pororaa. E i teie mahana? Noa ˈtu â e mea maˈimaˈi oia, e melo noâ oia o te utuafare o te Betela i Brooklyn e o te Tino Aratai. Aita oia i tatarahapa i te ati-maite-raa i te faanahonahoraa a Iehova.
9 Ua bapetizohia te hoê tuahine, melo o te utuafare o te Betela i Beretane, i te 13raa o to ˈna matahiti e i te matahiti i muri iho, ua rave oia i te taviniraa pionie e to ˈna taeae. Hoê matahiti i muri aˈe, a tupu ai te Piti o te Tamaˈi Rahi, ua tapeahia to ˈna metua tane no to ˈna tiaraa amui ore. Ma te turui noa i nia ia Iehova ia noaa mai te puai, ua tamau noa oia te tavini i te Atua mau. I muri aˈe, ua faaipoipo oia i te hoê taeae haapao maitai, e ua tamau noa raua i te rave i te hinaaro o Iehova. I muri aˈe e 35 matahiti faaipoiporaa, ua pohe taue ta ˈna tane. Ma te ani faahou i te puai ia Iehova ra, ua tamau noa oia i te tavini ia ˈna e tae roa mai i teie nei, ma te tiaturi e na reira e a muri noa ˈtu i roto i to ˈNa utuafare i te fenua nei.
10 E tauturu e e faaitoito Iehova i ta ˈna mau tavini haapao maitai. “Te horoa nei oia i te itoito no [tei rohirohi]; e te faarahi nei oia i te etaeta no tei paruparu ra.” E nehenehe tatou e fanaˈo i taua pu puai pau ore ra na roto i te faaohiparaa i na faanahoraa e ono i faaitehia i nia nei. A haamanaˈo: “O te feia . . . e tiaturi ia Iehova, e noaa ïa te etaeta apî . . . E horo ratou, e e ore e rohirohi.” (Isa. 40:29-31; MN) Ua tiaturi rahi o Paulo ia Iehova no te fanaˈo i te puai ta ˈna i hinaaro; e tia ia tatou ia na reira atoa.