Nafea ia poro ma te manuïa na roto i te niuniu paraparau
1 Tatou, te mau Ite no Iehova, eita tatou e mauruuru noa i te poro i te parau apî maitai; e imi tatou i te faatae atu i te poroi o te Basileia i te feia rahi roa ˈˈe. (Ohi. 10:42; 20:24) Noa ˈtu e o te pororaa i tera e tera fare te ravea matamua e farerei ai i te taata, ua ite maite tatou e eita e navai e raea ˈi te taata atoa. No reira, no te ‘rave faahope roa i ta tatou taviniraa’ e ia itea mai te feia e au i te mamoe, e faaohipa tatou i te tahi atu â mau ravea, mai te pororaa na roto i te niuniu paraparau.—Tim. 2, 4:5.
2 I te mau vahi e rave rahi, e faaea te tahi mau taata i roto i te mau nohoraa paruru-maitai-hia, te mau fare tapiri tau utuafare to roto aore ra i te mau anairaa nohoraa mea opanihia te purumu. Mea fifi ia faaohipa i ta tatou ravea matauhia, oia hoi te pororaa i tera e tera fare, i reira. I roto atoa i te mau tuhaa fenua e nehenehe e haere i tera e tera fare, aita te rahiraa i te fare. Te noaa nei râ i te feia poro e rave rahi i te paraparau atu ia ratou na roto i te niuniu. I te roaraa o te hoê poipoi pororaa i tera e tera fare, ua taio te hoê taeae e ta ˈna vahine e iva fare aita e taata. Ua hoˈi raua i te Piha a te Basileia e ua maimi i ta ratou mau numera niuniu i roto i te hoê buka niuniu o te horoa i te mau numera na nia i te vahi nohoraa. Ua taniuniu raua i te mau taata e ua noaa mai ia raua e vau.
3 Te haamarirau ra anei outou i te poro na roto i te niuniu? Te faˈi ra te hoê taeae e: “Eita vau e au ia tamatahia i te hoo mai i te hoê mea na roto i te niuniu. No reira, eita ta ˈu e nehenehe e rave i taua huru pororaa ra.” I muri aˈe noa râ e piti taniuniuraa, ua na ô oia e: “Mea au roa na ˈu! Aita vau i tiaturi aˈenei, mea au roa râ na ˈu! I roto i te niuniu, e vai hau noa te taata, e tei pihai noa te mau mea atoa ta oe e hinaaro i to oe rima. Mea faahiahia roa!” Hoê â manaˈo to te hoê tuahine: “Aita vau e anaanatae roa ra e poro na roto i te niuniu. Oia mau, aita roa ˈtu vau e hinaaro ra e na reira. Ua tamata râ vau e ua itea mai ia ˈu e mea maitai roa. E 37 farerei-faahou-raa te tia ia ˈu ia rave i muri aˈe i teie pororaa e ua hau atu ta ˈu mau haapiiraa bibilia i ta ˈu e nehenehe e faatere!” A tamata na outou atoa, e manuïa mau â outou.
4 Nafea ia faanaho i te pororaa na roto i te niuniu: Na te tiaau o te taviniraa e tiaau i te ohipa pororaa a te amuiraa. Ia au i te mau hinaaro, e nehenehe te tino matahiapo e faaoti e ani i te tahi atu matahiapo aore ra i te hoê tavini tauturu aravihi e faanaho i te pororaa na roto i te niuniu ma te haa amui e oia. E faaara-atoa-hia te taeae e haapao ra i te tapura fenua, na ˈna hoi e horoa i te mau tuhaa fenua e e tapaopao maitai i te reira. E haapao atoa te tiaau haaati i te haereraa i mua o teie huru pororaa.
5 Mai te peu e, i roto i ta outou tuhaa fenua, eita e nehenehe e poro i tera e tera fare i te tahi mau vahi, a faaineine i te mau tuhaa fenua no te pororaa na roto i te niuniu. E haamau te taeae i faataahia i te reira na nia i te anairaa vahi nohoraa ta ˈna i tapura maitai. Ia huru nainai noa te reira, ia taniuniu-tamau-hia te taata. E tapaohia i nia i te mau tapura fenua atoa te vai ra te mau vahi mai tera e ua faataahia te reira no te pororaa na roto i te niuniu.
6 Nafea e noaa ˈi te mau numera niuniu? E itea mai paha ia outou te hoê buka niuniu o te horoa i te mau numera ia au i te mau vahi nohoraa i te fare vairaa buka a te oire. Mai te peu e te vai ra ta te hoê nohoraa tiaihia ta ˈna iho tapura numera, i reira paha ïa e noaa ˈi te mau numera. Aita anaˈe, e nehenehe ta outou e papai faahou i te mau iˈoa o te feia noho i nia i te tapura piahia i te pae uputa e e imi i te reira i roto i te hoê buka niuniu au noa.
7 E faaite te mau matahiapo i to ratou anaanatae no teie huru pororaa na roto i te aniraa i te feia poro aravihi ia haapii i te tahi atu, ei hiˈoraa i roto i te porotarama “Te tauturu nei te mau pionie ia vetahi ê.” E nehenehe i te tahi taime, i roto i te putuputuraa no te taviniraa, e rave i te tumu parau o te mau hinaaro o te amuiraa no te faaitoito i teie huru pororaa.
8 Ia rave te mau matahiapo i te hoê tere tiai mamoe i ǒ te mau Kerisetiano e mau noa i te fare aore ra e tino paruparu to ratou, e tia ia ratou ia faaitoito atu e poro na roto i te niuniu. E nehenehe te hoê matahiapo e taniuniu i te tahi mau taata i mua i te taata poro o te hinaaro paha i muri iho e na ˈna iho e taniuniu. Mea rahi tei haamata mai teie e mea au na ratou i teie mahana e pûpû tau minuti i te mau mahana atoa no teie ohipa.
9 Te tahi mau manaˈo no te manuïa: I to ˈna tonoraa i ta ˈna mau pǐpǐ e poro, ua “tatoopiti” Iesu “i te tonoraa ia ratou.” (Luka 10:1) No te aha? Ua ite oia e ia tatoopiti ratou i te poro, e haapii mai te tahi na roto i te tahi e e faaitoito te tahi i te tahi. Oia atoa no te pororaa na roto i te niuniu. Ia rave tatou i te reira e te tahi atu taata, e haapii mai tatou na roto i te tahi, e paraparau tatou no nia i te mau faahopearaa e e horoa tatou i te manaˈo te tahi i te tahi no to muri mai aparauraa. I te taime paraparauraa atoa, e nehenehe te tahi e tauturu i te tahi no te imi i te hoê parau.
10 Ia maramarama maitai to tatou mau manaˈo e ia mau maitai to tatou feruriraa, e parahi anaˈe i te hoê vahi e nehenehe tatou e tuu i ta tatou mau papai i mua ia tatou: te Bibilia, te buka Comment raisonner, te buka rairai Titau, te mau vea, e e rave rau atu â. E papai anaˈe i te tahi mau vauvauraa parau e e tuu anaˈe i te hoê vahi e ite-maitai-hia ˈtu. Ia ineine tatou i te rave i te mau tapaopaoraa tano e te tia, no nia iho â râ i te mahana e te hora ia papu ia tatou afea e haapao faahou atu ai i te anaanatae.
11 E pinepine te taata i te ara ia faaroo ratou i te hoê reo aita ratou i matau i roto i te niuniu. Ia mahanahana ïa tatou, ia riro ei hoa e ia haapao maitai i te parau. Tei to tatou noa reo e fafa ˈi te taata ta tatou e paraparau atura i to tatou huru e to tatou rotahi. E haamǎrû anaˈe i to tatou huru e e paraparau anaˈe ma to tatou mafatu. E haamaine anaˈe i te parau, ia maramarama e ia puai maitai ia faaroohia mai tatou. E vaiiho anaˈe i te taata ia faaite mai i to ˈna manaˈo. E faaite anaˈe i to tatou paˈeraa e to tatou iˈoa e te vahi i reira tatou e faaea ˈi. Aita tatou e hinaaro ra e ia manaˈo te taata e e feia hoohoo haere tatou. Eiaha tatou e parau e te taniuniu ra tatou i te mau taata atoa o te hoê fare teitei aore ra o te hoê tuhaa oire, e faaau anaˈe râ i te taata noa iho.
12 Mau vauvauraa parau i roto i te niuniu: E nehenehe e faaauhia te rahiraa o te mau omuaraa parau o te mau api 9 e tae atu i te 15 o te buka Comment raisonner i te pororaa na roto i te niuniu. E nehenehe tatou e parau e: “Te taniuniu atu nei au no te mea aita e ravea e farerei ai au ia oe. Te tumu i taniuniu atu ai au, o te uiraa ˈtu ïa i to oe manaˈo i te hoê tumu parau faufaa roa.” E ui anaˈe atu ai i te uiraa.
13 E nehenehe tatou e faaohipa i te omuaraa parau matamua o te upoo parau iti “Crime/sécurité” mai teie: “Ia ora na. O . . . teie e paraparau atu nei. Tei . . . to ˈu faaearaa. Te haapapu na mua ˈtu nei au e aita vau e hoo ra i te hoê noa ˈˈe mea e aita vau e rave ra i te hoê titorotororaa manaˈo. Te taniuniu atu nei au no te mea te haapeapea nei au no te oraraa panoonoo. Mea rahi te ohipa ino e tupu ra na pihai iho ia tatou, e haafifi te reira i to tatou oraraa. Te manaˈo ra anei oe e ia tae i te hoê mahana, e nehenehe tatou e hahaere i te po na nia i te purumu, ma te panoonoo ore? [E vaiiho anaˈe ia pahono mai te taata.] Te hinaaro nei au e taio atu eaha ta te Atua e tǎpǔ ra e rave.”
14 E pûpû tia ˈtu te vetahi i te haapiiraa bibilia i roto i te niuniu, e mea maitai roa tei noaa mai ia ratou. E nehenehe e faaite i roto tau minuti nafea e faaterehia ˈi te hoê haapiiraa. E pûpû anaˈe i te taata e haere atu e farerei ia ˈna i ǒ ˈna no te faahaere i teie haapiiraa i mua, aore ra, mai te peu e aita oia e anaanatae ra, e na reira na roto i te niuniu ia tae i te tahi mahana.
15 I te pae hopea o te hoê aparauraa, e feruri anaˈe i te hoê mea o te tauturu ia tatou ia farerei i te taata i ǒ ˈna aore ra ia hapono atu i te hoê papai. Ia haamarirau oia i te horoa mai i to ˈna vahi nohoraa, e pûpû atu anaˈe e taniuniu faahou. E hinaaro te vetahi ia taniuniuhia ˈtu e rave rau taime hou e tiaturi mai ai e e titau mai ai ia tatou i ǒ ratou.
16 E haamata anaˈe: Ua haamata te hoê tuahine 15 matahiti i ta ˈna pororaa i te poipoi na roto i te taniuniuraa. Ua tauaparau oia e te hoê vahine tei farii i te hoê buka Ite. I to te tuahine afairaa ˈtu i te reira, ua ui te vahine ra ia ˈna nafea te roaaraa ia ˈna ta ˈna numera niuniu, aita hoi te reira i roto i te buka niuniu. Ua hape to te tuahine taniuniuraa! Ua farii taua vahine ra i te hoê haapiiraa e e vahine poro bapetizo-ore-hia oia i teie nei.
17 Ua ani te hoê tuahine i te hoê tuhaa fenua taniuniuraa, aita râ oia i taniuniu i te hoê noa ˈˈe taata i te roaraa e toru hebedoma no te mea te mǎtaˈu ra oia. Eaha tei faaitoito ia ˈna e haamata? Ua haamanaˈo oia i te tumu parau ra ‘Ia paruparu vau ra, i reira vau e puai ai’ o te A ara mai na! o te 8 no Tenuare 1997. Te faatia ra te hoê vahine Kerisetiano e e poro oia na roto i te niuniu noa ˈtu to ˈna paruparu. Te na ô ra te tuahine e: “Ua pure au ia Iehova ia noaa ia ˈu te itoito. Ua ani au ia ˈna e horoa mai i te mau parau tano no ta ˈu omuaraa parau.” Eaha tei tupu i te mahana matamua i poro ai oia na roto i te niuniu? Te faatia ra oia e: “Ua pahono Iehova i ta ˈu pure. Ua faaroo mai te taata ia ˈu e ua noaa ta ˈu hoê farerei-faahou-raa.” I muri aˈe, ua haamata oia i te hoê haapiiraa bibilia maoti te pororaa na roto i te niuniu. Te faaoti ra oia e: “Ua haapii faahou mai â Iehova ia ˈu ia tuu i to ˈu tiaturiraa i nia ia ˈna, eiaha râ i nia ia ˈu.”—Mas. 3:5.
18 Ua riro mai te pororaa na roto i te niuniu ei ravea maitai no te faaite i te parau apî maitai. E faaineine maitai anaˈe ia tatou e e rave anaˈe i te reira ma te mafatu atoa. Eiaha tatou e toaruaru ia ore te taata e farii i te mau taniuniuraa matamua. E pure anaˈe ia Iehova e aratai mai ia tatou e e tauaparau anaˈe i to tatou mau manaˈo e te feia poro o te pûpû i te taime no teie ohipa faaoraora. Ia hinaaro tatou eiaha e haamoe i te hoê noa ˈˈe taata i roto i ta tatou tuhaa fenua e ia rave tatou i ta tatou taviniraa ma te ru.—Roma 10:13, 14.