Te tahi mau mauhaa no te haapii, no te turai ia ohipa e no te haapaari

¹ E mau ravea faahiahia te reira no te faaite i te Bibilia e te mau Ite no Iehova. Ua turai te reira e rave rahi taata ia rave i te tiaraa papu no te parau mau. Maoti te reira, ua paari atu â te faaroo o te mau tavini pûpûhia a te Atua e ua mauruuru atu â ratou. Eaha ïa te reira? Te mau ripene video i tavirihia e te faanahonahoraa a Iehova. Ua mataitai pauroa anei outou i te reira? Mea maoro anei i teie nei? Te faaohipa ra anei outou i te reira i roto i ta outou taviniraa? I te tairururaa mataeinaa, ua faaitehia te matararaa mai o te 11raa o te ripene video na roto i te reo Beretane, Toute la communauté de nos frères. Ua poroi anei outou i ta outou? Nafea ia faaohipa maitai i teie mau mauhaa faahiahia?

² Te horoa ra te tumu parau “A haapii tamau i te Parau a te Atua e te utuafare” i teie manaˈo i roto i Te Pare Tiairaa o te 1 no Tiurai 1999: “[E nehenehe atoa outou] e faataa i te hoê taime i roto i ta outou haapiiraa no te mataitai i te hoê tuhaa o te mau ripene video a te Taiete . . . e e tauaparau i te reira i muri iho.” Ia au i teie aˈoraa maitai roa, e aparau tatou i te hoê ripene video taa ê i te Putuputuraa no te Taviniraa i te mau piti avaˈe atoa. Te faaitoito nei matou i te mau melo atoa o te amuiraa ia mataitai i te ripene i ǒ ratou hou a paraparauhia ˈi te reira i te Putuputuraa no te Taviniraa.

³ I teie avaˈe, e haamata tatou na roto i te ripene video matamua ta tatou i taviri, Les Témoins de Jéhovah: un nom, une organisation. A mataitai ai outou i te reira, a imi i te mau pahonoraa i te mau uiraa i muri nei:

◼ No teihea iho â râ tumu i matauhia ˈi te mau Ite no Iehova?

◼ No roto mai i teihea irava Bibilia te mau ohipa atoa e ravehia ra i te Betela?

◼ Eaha te aamu Bibilia ta outou i ite tei faanahohia, tei patahia e tei penihia no te faahohoˈa i te mau papai?

◼ Eaha tei haaputapû ia outou i roto i te faaineineraa o ta tatou mau papai?

◼ Mai te matahiti 1920 e tae atu i te matahiti 1990, ehia rahiraa papai i neneihia e te Taiete?

◼ O vai iho â râ i rotopu i te mau tavini a te Atua te tia ia tamata i te faaaravihi ia ˈna no te taviniraa i te Betela?—Mas. 20:29.

◼ I roto i teihea mau tuhaa e hiˈoraa maitai te utuafare o te Betela no te mau Ite no Iehova atoa?

◼ Eaha tei haamaere ia outou i roto i te ohipa e ravehia ra i te Betela ia rahi atu â te taata e faaroo i te parau apî maitai?

◼ Nohea mai te moni e faaohipahia no te ohipa na te ao atoa nei?

◼ Eaha te ohipa ta tatou e nehenehe e turu ma te itoito, e ma teihea huru feruriraa?—Ioa. 4:35; Ohi. 1:8.

◼ Eaha to outou iho manaˈo i te faanahonahoraa a te mau Ite no Iehova?

◼ Nafea ia faaohipa i teie ripene i roto i te pororaa?

I te avaˈe Titema, e paraparau tatou no nia i te ripene La Bible: un récit historique exact, des prophéties dignes de foi.