E haapao anaˈe i te mau ohipa faahiahia a te Atua
1 I roto i na mahana faahiahia e toru, ua putuputu mai tatou i te Tairururaa Mataeinaa “Feia rave i te Parau a te Atua.” Ua tuu tatou i to tatou mau haapeapearaa o te mau mahana atoa i te hiti no te haamau i to tatou feruriraa i nia i te mau ohipa faahiahia a Iehova. Te faaitoito ra te porotarama e ia rahi atu â to tatou faaroo i te Atua e i ta ˈna Parau, ia haapaari i to tatou mau taairaa e o ˈna e ia rahi atu â to tatou itoito no te pororaa. I nia i teihea faito e haafaufaa ˈi tatou i te mau mea ta tatou i haapii?—Ioa. 13:17.
2 Mau utuafare o te faaroo i te Parau a te Atua: Ua tauturu mai te oreroraa parau tatuhaahia “A faaroo i te Parau a te Atua” ia tatou ia hiˈopoa i te huru pae varua o to tatou utuafare. Mea au na te mau tamarii ia haapii. Ua faaitoitohia ïa te mau metua ia faariro i te haapiiraa Bibilia e te utuafare ei niu no te patu i te hoê utuafare puai i te pae varua. E hiˈopoa te mau upoo utuafare e rave rahi i te buka rairai apî E nehenehe oe e riro ei hoa no te Atua! e ta ratou mau tamarii rii. Maoti te reira, e nehenehe ratou e faatupu i te tahi mau taairaa oaoa e te tiaturi e o Iehova. E te mau metua, a haapii i ta outou mau tamarii nafea ia tâuˈa i te manaˈo o te Atua. A faaite i to outou iho here i te Atua e to outou hinaaro i ta ˈna mau ohipa. (Sal. 103:2) A ohipa amui no te haamau i te tahi mau fa pae varua e ia naea te reira, e ia horoa ia outou taatoa i roto i te taviniraa a Iehova.
3 E turama te Parau a te Atua i to tatou eˈa: Te oaoa ra tatou i te fanaˈoraa i te tuhaa matamua o te buka La prophétie d’Isaïe, lumière pour tous les humains. Ua tapae ta outou taioraa ihea? Te faaite ra te buka a Isaia i te haavaraa riaria e roohia i nia i te mau nunaa paieti ore e te mau haamaitairaa oaoa ta te Basileia e hopoi mai i nia i te nunaa o te Atua. (Isa. 34:2; 35:10) E patu atoa te reira i te faaroo e te tiaturi ia Iehova e i ta ˈna huru ohiparaa.—Isa. 12:2-5.
4 Na roto i te taioraa i te buka Prophétie d’Isaïe, Volume 1, e tapao oioi outou e, noa ˈtu e ua haaatihia oia i te feia iino, aita o Isaia i taiva ia Iehova. I to ˈna titau-manihini-raahia e riro ei vea o te Atua, ua pahono o Isaia e: “Teie au; o vau ta oe e tono.” (Isa. 6:9) E tauturu te feruriruriraa i nia i to ˈna huru feruriraa tauturu ia tamau outou i te poro i te parau apî maitai ia “ite te mau fenua atoa.”—Mat. 24:14.
5 E faahanahana tatou i te rahi o Iehova ma te haapao i ta ˈna mau ohipa. E poihere anaˈe ïa i te fanaˈoraa taa ê e riro ei feia e rave i te Parau a te Atua!