‘Ia horoa haere tatou, ia ineine i te opere’
1 E rave rahi senekele, ua ani o Paulo ia Timoteo ia faaitoito i to ˈna mau hoa Kerisetiano “ia hamani maitai, [ia taoˈahia i te mau ohipa maitatai], ia horoa haere, [ia ineine i te opere].” (Tim. 1, 6:18; MN) Ua papai atoa Paulo i te mau Kerisetiano Hebera eiaha e haamoe i te “hamani maitai e te opere na vetahi ê.” (Heb 13:16, MN) No te aha oia i horoa ˈi i teie mau faaueraa? No te mea ua ite oia e e noaa mai ‘te hinuhinu, te tura e te hau, i te taata atoa i rave i te maitai.’—Roma 2:10.
2 Ei Atua Poiete, o Iehova te Fatu o te mau mea atoa. (Apo. 4:11) Papu maitai e te mauruuru ra tatou i ta ˈna e rave ra no tatou e te mau mea na ˈna ra. Noa ˈtu te mauruuru ore o te taata e rave rahi, te faatia ra te Teitei roa ˈˈe i te taatoaraa ia fanaˈo ratou i te mau faanahoraa horoa maitai ta ˈna i rave no te ora noa. (Mat. 5:45) Ua pûpû atoa oia i ta ˈna Tamaiti here roa ˈˈe ei tusia, ia fanaˈo tatou i te ora mure ore. Eita anei ïa te here ta tatou e fanaˈo ra e titau ia tatou ia faaite i to tatou mauruuru ma te horoa haere na to tatou mau taata-tupu?—Kor. 2, 5:14, 15.
3 Eaha ta tatou e nehenehe e opere? Mea tano iho â ia faaohipa tatou i te mau fanaˈoraa atoa e vai ra ia tatou ma te huru e auhia mai e te Atua. Papu maitai e te hinaaro nei tatou e turu i te ohipa a te Basileia na te ao nei i te pae materia e pae varua. Parau mau, e taoˈa faufaa roa ˈˈe te parau apî maitai e nehenehe e noaa i te hoê taata, no te mea o “te mana” te reira “o te Atua [no te faaoraraa].” (Roma 1:16; MN) Mai te peu e i te mau avaˈe atoa e faaohipa tatou ma te horoa noa i to tatou taime e ta tatou mau faufaa i roto i te ohipa pororaa e haapiiraa, e noaa ia tatou i te opere i taua taoˈa faufaa i te pae varua ra, ia nehenehe te tahi atu mau taata e fanaˈo i te ora mure ore.
4 Te oaoa roa ra Iehova ia tauturu tatou i te feia mea iti ta ratou faufaa. Te tǎpǔ ra oia e e haamaitai mai oia ia tatou e te haamanaˈo maira atoa oia e: “Aita e faufaa to te taoˈa i te mahana e tupu ai te riri ra; area te parau-tia ra, e ora ïa i te reira e ore e pohe.” (Mas. 11:4; 19:17) E turu anaˈe i te ohipa a te Basileia i te pae materia e e apiti rahi atu â anaˈe i roto i te pororaa i te parau apî maitai: e faaite ïa tatou e e taata horoa haere mau tatou, tei ineine i te opere.