‘E ere i te mea faufaa ore ta outou ohipa’
1 Auê ïa manaˈo faaitoito e! E ere i te mea faufaa ore ta outou ohipa i roto i te taviniraa a Iehova. (Kor. 1, 15:58) I te tahi aˈe pae, a feruri na i te ohipa a te rahiraa o te taata: e faarohirohi ratou ia ratou no te haamaitai i to ratou tiaraa totiale aore ra to ratou tupuraa i te pae moni. E haere vetahi i te mau haapiiraa teitei e rave rahi matahiti i te maoro aore ra e rave ratou i te ohipa mai te mau tîtî ra ia noaa mai te mau faufaa materia. Ia roohia râ ratou e “[te taime e te] tupuraa manaˈo-ore-hia,” eita roa e raea ia ratou te toroa ta ratou e tapi ra aore ra e tia ia ratou ia mauruuru rii aˈe i ta ratou e tiaturi ra i te pae materia. Mai te ‘[tapaparaa] i te mataˈi ra,’ mea faufaa ore ta ratou mau tutavaraa. (Koh. 1:14; 9:11; MN) E ere anei i te mea au roa ˈˈe ia rahi te rave i roto i te ohipa otahi e ere i te mea faufaa ore, e mea faufaa maoro râ?
2 Te ohipa faufaa mau: O te pororaa i te parau apî maitai o te Basileia o te Atua te ohipa faufaa roa ˈˈe e ravehia ra i te fenua nei. O te ohipa ïa e tia ia ravehia, ia faaroo te taata aore ra eita. E hinaaro tatou e parau, mai ia Paulo, e: “Aore roa o ˈu viivii i te toto o te taata atoa nei. Aore roa aˈenei hoi vau i huna, ua faaite hua ˈtu hoi au ia outou i te hinaaro atoa o te Atua.”—Ohi. 20:26, 27.
3 Ia faaroo te tahi mau taata i te poroi o te Basileia e ia haapao maite i te reira, e oaoa tatou. Ei hiˈoraa, ua pohe te mama fetii o te hoê vahine apî. Ua uiui oia e ua haere to ˈna mama fetii ihea: i nia i te raˈi aore ra i roto i te po auahi? Ua pure oia i te Atua ia tauturu mai ia ˈna ma te faahiti i to ˈna iˈoa, o Iehova, mai ta to ˈna tuahine i haapii atu ia ˈna. Aita i maoro, ua haapii oia i te Bibilia e ua haere i te mau putuputuraa Kerisetiano. Ua noaa ia ˈna te hoê manaˈo apî no nia i te oraraa e ua tâpû i to ˈna mau taairaa e te mau pǔpǔ taata ta ˈna e amuimui ra. Ua faaea oia i te puhipuhi i te avaava, i te rave i te raau taero e i te eiâ. Te farii ra oia e: “Maoti anaˈe te here ia Iehova i nehenehe ai au e faarue i te hoê huru oraraa ino roa. Ahiri e aita o Iehova e to ˈna aroha rahi, aita ïa to ˈu e tiaturiraa o te ora mure ore.” Aita oia e ora faahou ra no te tahi mau fa faufaa ore.
4 Ia ore atoa te taata e faaroo ia tatou, te rave ra tatou i te tahi ohipa faufaa. A tahi, ua ite ratou e ua haere mai te mau Ite no Iehova e farerei ia ratou. A piti, te faaite ra tatou i to tatou taiva ore, to tatou haapao maitai e to tatou here. Mea faufaa ore anei ïa te ohipa a te Fatu ta tatou e rave ra? Aita roa ˈtu!