Ia mauruuru tatou i te mea e vai nei ia tatou
1 “Ua faarahi râ te Atua i to ˈna aroha ia tatou nei, i te mea te vai taata hara noa nei â tatou, i pohe ai te Mesia no tatou nei.” (Roma 5:8). E tia mau â ia tatou ia mauruuru no te tusia rahi ta Iehova e ta ˈna Tamaiti i rave no tatou! Maoti te toto haamaniihia o te Mesia e nehenehe ai tatou e fanaˈo i te haamaitairaa o te ora mure ore, hoê haamaitairaa eita te hoê noa ˈˈe taata e nehenehe e pûpû mai no tatou.
2 Nafea tatou e nehenehe ai e faaite i to tatou mauruuru? E rave rahi taata e hiaai ra i te ite mau e vai ra i roto anaˈe i te Parau moˈa a te Atua. Te hinaaro o Iehova oia hoi ia ite ratou i te parau mau (Tim. 1, 2:4). E haapapu ïa tatou e te haafaufaa rahi nei tatou i te parau mau na roto i te ‘faaiteraa i te parau apî maitai o te basileia o te Atua.’ (Luka 4:43.) Te faaite ra to tatou apitiraa ma te mafatu taatoa i roto i taua ohipa ra e te taa ra ia tatou e ua pohe te Mesia no tatou e te hinaaro nei tatou e pee i to ˈna hiˈoraa na roto i te auraroraa ma te haapao maitai i ta ˈna faaueraa e faariro i te mau taata ei pǐpǐ.—Mat. 28:19, 20.
3 Teihea mau taime tatou e nehenehe ai e poro? E nehenehe anei tatou e rave i te taviniraa pionie tauturu i te tahi mau taime? I muri aˈe i te numeraraa i te haamâuˈaraa, e feruri vetahi e e nehenehe e rave roa i te taviniraa pionie tamau. O te reira hoi te mau ravea faahiahia roa no te horoa rahi atu â i te taime no te haaparare i te parau apî maitai o te Basileia. Ua opua na paha outou e faaî i te hoê parau aniraa, tera râ ua haapeapea te tahi mau fifi ia outou. Ua taui paha to outou huru oraraa i teie nei. Mai te peu e e, ua opua maite anei outou e rave i te taviniraa pionie aore ra e riro mai ei pionie tauturu?
4 Ia hiˈopoa anaˈe tatou i te mau mea e haaati ra ia tatou, e rahi atu â to tatou mauruuru. Te maraa noa ˈtura te haavîraa uˈana, te feii e te mau aroraa na te ao nei. Ua faariro o Paulo i to tatou nei tau mai te ‘anotau hopea e te fifi.’ (Tim. 2, 3:1.) Noa ˈtu râ taua huru tupuraa peapea ra, e rave rahi mau parau apî maitai ta tatou no te faaite ia vetahi ê. Te vai ra ia tatou nei e piti vea faahiahia roa, Te Pare Tiairaa e te A ara mai na! I teie avaˈe, e nehenehe tatou e pûpû atu, na roto i te tamatahitiraa, aore ra te mau numera tataitahi. Te vai atoa ra ta tatou mau vea iti o te tuatapapa ra e rave rahi tumu parau. E tamǎrû iho â taua mau buka ra i te feia e taio atu. E tia i to tatou mauruuru ia turai ia tatou ia opere rahi atu.—Heb. 13:16.
5 I to outou vahi nohoraa, e ere paha te mau taata i te mea anaanatae roa no te mau ohipa i te pae varua. I te tahi râ pae, e mea hotu roa te tahi mau tuhaa fenua. Mai te peu e mea ite outou i te paraparau na roto i te reo farani e te reo tahiti, e nehenehe anei outou e haere atu i roto i te hoê tuhaa fenua i reira e hinaaro-mau-hia ra ta outou tauturu mai te mau motu? E mea papu e horoa ˈtu te tiaau o ta outou tuhaa haaati i te tahi mau manaˈo tauturu i roto i taua tuhaa ra.
6 Te vai ra iho â te mau tumu e mauruuru ai tatou i te mea e vai nei ia tatou; e mea rahi hoi ta tatou mau ohipa maitatai. E nehenehe tatou e arue ma te maitai atu â ia Iehova na roto i te faaiteraa ia vetahi ê i to ˈna iˈoa e ta ˈna mau opuaraa.—Isa. 12:4, 5.