Ei haerea maitai noa to tatou o te faahanahana i te Atua

¹ I te mau vahi atoa e haere ai tatou, e faaite to tatou haerea e to tatou huru faaneheneheraa o vai tatou e o vai te Atua ta tatou e haamori ra. E parau mau iho â te reira i roto i te mau putuputuraa rarahi o te nunaa a te Atua, i reira e rave rahi mau taata e hiˈopoa ˈi ia tatou. Mai te peu e e haerea maitai to tatou, e faahanahanahia ïa te iˈoa o Iehova. (Pet. 1, 2:12) Area râ, e nehenehe te mau haerea iino aore ra te mau ohipa maamaa o te tahi noa mau taata e faaino i te iˈoa o te Atua e to ˈna nunaa. (Koh. 9:18b) Ma te ite papu e te haava ra te feia e haaati ra ia tatou i ta tatou faanahonahoraa e te Atua ta tatou e haamori ra na nia i to tatou haerea, e tia ia tatou ia haapao maitai ia ‘rave [i te mau mea atoa] no te haamaitai i te Atua.’—Kor. 1, 10:31; MN.

² Te hoê haerea maitai i te hotela: Mea pinepine, e maere roa ino te feia rave ohipa o te mau hotela i te naho, i te mau peu maitatai e te mâ o te mau Ite no Iehova. No nia i te mau utuafare Ite no Iehova i parahi na i ta ˈna hotela, ua faaite te hoê faatere e: “To te mau tamarii a te mau Ite no Iehova te haerea maitai roa ˈˈe ta ˈu i ite aˈenei! Mea faanehenehe-maitai-hia ratou, mea faatura, e te faaite i te mau peu maitatai, e aita ratou i haafifi noa ˈˈe. E tia mau â ia haapopouhia outou no ta outou mau tamarii. Ua oaoa matou i te fariiraa ia ratou i ǒ matou.” Ia parau roa mai te tahi mau taata ta tatou e farerei ra i teie mau manaˈo, te tapao ra ïa ratou i te here e te faatura e vai ra i rotopu i te mau tavini a te Atua.

³ I te tahi aˈe pae, te faaite ra te tahi mau manaˈo e horoahia ra e te feia rave ohipa a te tahi atu mau hotela e te farerei noa nei â tatou i te hoê fifi e vetahi e haerea feruri ore to ratou aore ra o te titau hua i te mau taviniraa manihinihi e pûpûhia ra e te mau hotela. E faatupu te reira i te tahi mau fifi e te mau faahaparaa e ore hoi e tia ia faahitihia. Te amuamu ra te tahi mau faatere e e maniania e e hauti te mau taurearea e te mau tamarii, aore ra ua vaiihohia ratou ma te ore e haapaohia e to ratou mau metua i te vahi hopuraa pape aore ra i te tahi atu mau vahi faaanaanataeraa.

⁴ E pia te rahiraa o te mau hotela i te hoê faatureraa e tia i te feia tarahu piha ia faatura. Ua ofati te tahi mau taeae i taua mau faatureraa ra ma te ore e faatura i te hau o te mau vahi aore ra ma te tunu i te maa i roto i te mau piha. Ua faaite te tahi mau faatere i te Taiete e, te tunuraa i te maa o te opanihia hoi i roto i te mau piha, o te tumu ïa o te ino e ite-pinepine-hia ra. I te tahi mau taime, e tuinohia te tahi mau piha, a tahi ïa, a piti, no te mau hauˈa e vai noa ra, eita roa e tia ia tarahuhia te piha tau mahana e tae noa ˈtu tau hebedoma i te maoro. Eita ïa tatou e tunu i te maa i roto i te mau piha mai te peu e eita e faatia-mau-hia.

⁵ Ia tutava mau ïa tatou i te turu maite i te mau fatu hotela. Papu maitai e eita tatou e hinaaro e horoa i te hoê hiˈoraa ino no nia i te nunaa o Iehova. Ei Kerisetiano, ei haerea haavare ore to tatou e tia ˈi i te mau taime atoa. Eiaha tatou e rave i te ahu aore ra te tahi atu mau “taoˈa haamanaˈoraa” a te hotela, e ohipa eiâ hoi te reira; i te taime e tapao ai i te piha aore ra te tahi mau parau tapaeraa, eiaha atoa tatou e faaite i te hoê rahiraa taata no te piha o te ore e tuea i te mea mau.

⁶ Te hoê faaneheneheraa e au i te tairururaa: Noa ˈtu eaha te vahi e faaohipahia ra, e tia ia tatou ia faariro i te reira i te roaraa o te tairururaa mai te hoê Piha rahi a te Basileia. Ia omono noa mai ïa tatou i te hoê ahu e tano mai ia tatou e haere i te mau putuputuraa i roto i ta tatou amuiraa. I te roaraa o te mau taime rururaa e i muri aˈe, e tia i te mau taeae e mau tuahine ia ape i te mau ahu au ore aore ra huru ê e pee ra i te huru feruriraa o teie ao a ore atu ai te tahi mau taata hiˈopoa e manaˈo e mea taa ê tatou i te auraa mau. E tia i te mau tuahine ia ara e ia au noa te huru e te roa o to ratou ahu. (Tim. 1, 2:9, 10) Tei te tairururaa anei tatou, te fare tamaaraa aore ra te hoohoo-haere-raa, e tia ia tatou ia faaite i te mau taime atoa e e tavini tatou no te Atua o te ore roa ˈtu e faaturori.—Kor. 2, 6:3.

⁷ E tupu te mau bapetizoraa i te poipoi Mahana maa. Te faataa ra Te Pare Tiairaa o te 1 no Eperera 1995 i te api 30 i te haerea e tia ia faatupu i taua taime ra. Te faahiti ra oia e e tia ia tatou “ia faariro i te bapetizoraa ma te paari e tano. E ere i te hoê taime faahitiraa parau horuhoru, arearearaa, aore ra ata-taue-raa. E ere atoa râ i te hoê taime peapea aore ra oaoa ore.” Eita e tano e ia omono mai te feia e bapetizohia ra, tane aore ra vahine, i te mau ahu hopuraa pape e faaite tahaa roa ˈtu i te tino aore ra e piri roa i nia i te tino. E tia ïa ia turu te taatoaraa e ia riro te bapetizoraa Kerisetiano ei taime tura e te oaoa.

⁸ Te haamanaˈo maira Petero e, ‘mai te aha to tatou huru e tia ˈi i te [haerea viivii ore] e te paieti.’ (Pet. 2, 3:11; MN) Ia vai ara tatou i te roaraa o ta tatou mau Tairururaa Mataeinaa ‘Feia rave i te parau a te Atua’ e ia tauturu ta tatou mau parau e mau ohipa i te feia hiˈopoa aau rotahi ia ite e ia haamori i to tatou Atua Rahi, e au hoi ia ˈna te hanahana e te tura atoa.—Kor. 1, 14:24, 25.