E feruriraa haapae anei to outou?
1 E tia i to tatou mauruuru no te ohipa miimii ore ta Iesu Mesia i rave no te huitaata ia turai ia tatou paatoa ia faaohipa i to tatou aravihi, to tatou itoito e to tatou puai ma te haapae ia tatou iho. Te taparu maira te mau Papai ia ‘pûpû tatou i to tatou mau tino ei tusia ora, e te moˈa, e te au hoi i te Atua ra, [ei taviniraa moˈa].’ (Roma 12:1; MN) E tauturu mai te hoê hiˈopoaraa tamau ia tatou iho ia ite e te faaite rahi ra anei tatou i taua feruriraa haapae ra ia au i to tatou huru tupuraa.
2 I roto i te maimiraa i te ite Bibilia: Te faataa ra anei outou i te taime no te taio e no te haapii tamau outou iho i te Bibilia? Te pee ra anei outou i ta outou porotarama? Ua matau anei outou i te faaineine maitai i te mau putuputuraa? Mai te peu e e upoo utuafare outou, te haapii tamau ra anei outou i te Bibilia e to outou utuafare? No reira, e tia paha ia outou ia haapae i te taime e mâuˈa ra i mua i te afata teata aore ra te matini roro uira, aore ra i te tahi atu mau ohipa. E haapaeraa iti mau â râ teie, i te mea e ua ite tatou e e tauturu mai te taime e horoahia no te Parau a te Atua ia fanaˈo tatou i te ora mure ore.—Ioa. 17:3.
3 I roto i te haapiiraa i ta outou mau tamarii: O te tamarii-rii-raa te taime tano roa ˈˈe no te haapii i te faaohipa i te feruriraa haapae. A haapii atu i ta outou mau tamarii e e taime to te hauti, e taime atoa râ to te rave i te ohipa e to te apiti i roto i te mau ohipa teotaratia. (Eph. 6:4) A horoa i te tahi mau ohipa faufaa i te fare na ratou. A haamau i te hoê porotarama tamau ia nehenehe outou e apiti i roto i te taviniraa e o ratou. A haapapu i ta outou haapiiraa na roto i to outou hiˈoraa maitai.
4 I roto i te mau ohipa a te amuiraa: E ruperupehia te hoê amuiraa ia ineine te mau melo taitahi i te rave i te mau haapaeraa no te maitai o te taatoaraa. (Heb. 13:16) E nehenehe anei outou e horoa hau atu â i te taime i roto i te pororaa i te Basileia e te ohipa e faariro i te taata ei pǐpǐ? E nehenehe anei outou e tauturu i te feia maˈi aore ra te mau ruhiruhia, ma te ani paha e na outou e afai ia ratou i te mau putuputuraa?
5 Hou oia a pûpû ai i to ˈna ora ei taata, te tusia teitei roa ˈˈe, ua aˈo Iesu i ta ˈna mau pǐpǐ ia tiatonu maite i te mau faufaa a te Basileia e ia tuu i te tahi atu mau mea atoa i te piti o te parahiraa. (Mat. 6:33) Ia faaite tatou i teie feruriraa haapae, e tamau noa ïa tatou i te tavini ia Iehova ma te oaoa, a fanaˈo atu ai i te oaoaraa rahi roa ˈˈe.