Te pahono ra anei outou i te here o te Mesia?
1 Ma te haamanaˈo i te oraraa o to ˈna Fatu, ua papai te aposetolo Ioane e: ‘O Iesu tei [here] i ta ˈna taata i te ao nei, [here] noa ˈtura oia ia ratou e tae noa ˈtura i te hopea ra.’ (Ioa. 13:1; MN) I teie tau o te oroa Haamanaˈoraa, te manaˈo nei tatou i te faaiteraa faahiahia roa ˈˈe i te here o te Mesia. E nehenehe tatou e pahono i taua here ra na roto i te faaohiparaa i te faaroo i te hoo, te apitiraa ma te itoito i roto i te pororaa e, te faaoromairaa mai ia Iesu ‘e tae noa ˈtu i te hopea.’—Mat. 24:13; 28:19, 20; Ioa. 3:16.
2 E pahono anaˈe i te here o te Mesia: Ua haa rahi o Iesu i te hebedoma hopea o to ˈna oraraa i nia i te fenua. (Mat. 21:23; 23:1; 24:3) Ei feia o te pee i te hiˈoraa o te Mesia, te turai atoa ra te here ia tatou ia “faaitoito hua” i roto i te taviniraa no Iehova. (Luka 13:24) Ma te faaohipa i te tahi mau faanahoraa i ravehia no te hoê ohipa rahi i te avaˈe Eperera, eita anei outou e nehenehe e horoa rahi atu â i te taime i roto i te taviniraa i taua avaˈe ra?
3 I teie matahiti, e tupu te Amuraa maa a te Fatu i te po Mahana toru 19 no Eperera. Ehia taata e tae mai i taua po faufaa roa ra? Tei ia tatou noa ïa i nia i te hoê faito rahi. Ua papai anei tatou i te hoê tabula o te mau taata e titau manihini: te feia ta tatou e haapii ra i te Bibilia, aore ra te feia e anaanatae ra, te tahi mau fetii, mau hoa ohipa aore ra mau hoa haapiiraa? Ua farerei anei tatou ia ratou no te titau manihini maitai ia ratou? E faahaamanaˈo anei tatou ia ratou i ta tatou titau-manihini-raa tau mahana hou te oroa Haamanaˈoraa? E hinaaro anei ratou i ta tatou tauturu no te haere mai? E titau manihini atoa te mau matahiapo i te feia atoa aita e ohipa faahou ra. Noa ˈtu e e tupu te oroa Haamanaˈoraa i te afa hebedoma eiaha i te hopea hebedoma, mea faufaa atoa ia tae mai tatou.
4 E haere anaˈe mai ma te faaineine: Mea faufaa roa ia haere mai tatou i te oroa Haamanaˈoraa ma te faaineine ia tatou e ma te hoê huru feruriraa maitai. Ua aˈo Paulo i to ˈna mau taeae Kerisetiano eiaha e haamoe i te faufaaraa o te oroa. (Kor. 1, 11:20-26) E nehenehe outou e taio i te Evanelia a Ioane te mau pene 13 i te 17, i roto i ta outou haapiiraa Bibilia e te utuafare e e ui i te melo taitahi eaha te auraa o te tusia a Iesu no ˈna. Eiaha atoa e haamoe i te taio i te mau mahana atoa i te tuhaa Bibilia i faataahia no te hebedoma o te oroa Haamanaˈoraa.
5 Mea hohonu roa to tatou here no te Mesia e e tamau noa tatou i te faaite i te reira i muri aˈe atoa i te 19 no Eperera. Inaha, ua faaoti tatou e faaite i to tatou here no ˈna e a muri noa ˈtu, e e tauturu mai te oroa Haamanaˈoraa ia tapea maite tatou i ta tatou faaotiraa.