E haapao maitai anaˈe i te Parau a Iehova i te mau mahana atoa
1 Te haafifihia ra to tatou faaroo i te mau mahana atoa e mairi ra. E titau manihini mai te hoê hoa ohipa faahepo rahi ia haere outou na muri ia ˈna i te hoê po; e faaitoito te hoê orometua haapii ia titau outou i te hoê tiaraa ohipa teitei; e ani mai ta outou paoti ohipa ia faahau atu â outou i te hora ohipa; aore ra e peapea outou no to outou oraora-maitai-raa i te pae tino. E nehenehe taua mau tamataraa ra e fa mai i te mau taime atoa, e ere râ o tatou anaˈe. Te hinaaro ra Iehova e horoa mai i te paari e titauhia no te faaruru i te reira. E ravea maitai te tuatapaparaa i te irava mahana e te tatararaa i roto i te buka iti rairai ra E hiˈopoa anaˈe i te mau Papai i te mau mahana atoa no te tamaa-tamau-raa i te Parau a Iehova. Te faufaa ra anei outou i taua faanahoraa ra?
2 Te tauturu i roto i to tatou rima: Te parau ra te Isaia 30:20 e e “Orometua Rahi, MN” o Iehova e i pihai iho ia ˈna ta ˈna mau tavini e ite ai i te tauturu. Te pûpû maira oia i te mea iho â e hiaaihia e tatou i mua i te mau tamataraa. Nafea? Teie ta te irava i muri iho e faahiti ra: “E na to outou tariˈa e faaroo i te hoê reo i muri mai ia outou, i te na ôraa e, Teie te eˈa: e na reira i te haere.” I teie mahana, te faaite ra Iehova i ta ˈna “parau” maoti te mau Papai e te mau buka a “te tavini haapao maitai.” (Mat. 24:45) Ua î roa te mau tumu parau o Te Pare Tiairaa i neneihia i te roaraa o te mau matahiti i te paari e tuatapapa rii ra i te mau tuhaa atoa o te oraraa Kerisetiano. Ma te taio faahou i tei faahitihia i roto i te buka iti rairai ra E hiˈopoa anaˈe i te mau Papai, e rave rahi ïa ite faufaa roa to tatou i roto i te mau tamataraa huru rau atoa.—Isa.48:17.
3 E rave anaˈe i te taime: Noa ˈtu hoi te rahiraa ohipa i te mau poipoi, aita te hoê metua vahine i ere noa ˈˈe i te taime no te taio e te tauaparau i te irava e te tatararaa e ta ˈna tamaiti a inu ai raua i te taofe. Ua riro teie mau parau e te pure ei taˈo hopea ta ˈna e faaroo i te mau poipoi atoa hou oia e reva ˈi i te fare haapiiraa. Ua tauturu te reira ia ˈna ia patoi i te mau faaheporaa i te pae taatiraa, te amuiraa ˈtu e te here aiˈa e ia faaite ma te itoito i to ˈna faaroo i mua i to ˈna mau hoa haapiiraa e ta ˈna mau orometua haapii. Noa ˈtu e o oia anaˈe te Ite i roto i te fare haapiiraa taatoa, aita oia i moemoe noa ˈˈe.
4 E imi anaˈe i te mau aratairaa e aˈoraa a Iehova e ta ˈna Parau. E ihotaata mau ïa oia i roto i to tatou oraraa, mai te hoê hoa e nehenehe mau â e tiaturihia. E imi anaˈe ia ˈna i te mau mahana atoa! Ma te tahoê i te mau mirioni taata e hiˈopoa ra i te Parau a te Atua i te mau mahana atoa, e faaau anaˈe i to tatou mata ‘no te ite i te Orometua Rahi.’