E pee anaˈe i te huru pae tahi ore o Iehova
1 E tapitapi Iehova i te mau taata. Ma te huru pae tahi ore, e farii oia i te taata atoa e rave i to ˈna hinaaro. (Ohi. 10:34, 35) Ia poro oia i te mau taata, eita atoa Iesu e faatia paetahi. (Luka 20:21) E tia ia tatou ia pee i to raua hiˈoraa mai ia Paulo tei papai e: “Hoê â Fatu i nia i te taata atoa nei, o te taoˈahia no te taata atoa e tiaoro atu ia ˈna ra.”—Roma 10:12, MN.
2 Ia faaite tatou i te parau apî maitai o te Basileia o te Atua i te feia atoa ta tatou e farerei, te faahanahana ra tatou i te Atua. E tia ia tatou ia tamau i te tufa i teie poroi faahiahia i to tatou mau taata-tupu, noa ˈtu eaha to ratou nunaa, tiaraa totiale, faito ite aore ra huru i te pae materia. (Roma 10:11-13) Te auraa ra, e poro ïa i te feia e hinaaro mau e faaroo: te mau tane, vahine, taurearea e te feia ruhiruhia. E tia ia tatou ia patoto i te mau opani atoa ia nehenehe te taata taitahi e faaroo i te parau mau.
3 E anaanatae anaˈe i te taatoaraa: E imi tatou i te farerei i te rahiraa o te mau taata. Ma te haamanaˈo maite i te reira, ua manuïa te tahi feia poro i ta ratou pororaa i roto i te mau piha ohipa a te mau taote, te mau fare maˈi, te mau fare faafaaearaa e te mau fare maˈi faaoreraa i te taero. Ua horoa atoa vetahi feia poro i te poroi i te feia tanu maˈi, te feia faatere fare haapiiraa, te feia tauturu i te mau orometua haapii e te mau haava. Ia tauaparauhia i taua mau taata ra, mea maitai ia faaite i to tatou mauruuru no ta ratou ohipa faufaa roa. E faaite tatou i te faatura e e maiti tatou i te mau tumu parau tano e tuati ra i ta ratou ohipa e te mau fifi i taaihia i te reira.
4 Ei hiˈoraa, ua nehenehe te hoê tuahine e tauaparau i te hoê haava i roto i ta ˈna piha ohipa. I muri aˈe i te hoê aparauraa oraora maitai, teie ta te haava i faahiti: “Ua ite anei oe eaha te mea ta ˈu e au i ǒ i te mau Ite no Iehova? O te mea ïa e e mau faaueraa tumu papu maitai ta ratou, e eita roa ˈtu ratou e faarue i te reira.” E faaiteraa maitai roa tei horoahia i taua taata mana ra.
5 Eita tatou e nehenehe e hiˈo i roto i te mafatu o te mau taata. Ia tauaparau râ tatou i te feia atoa ta tatou e farerei, te faaite ra ïa tatou i to tatou faaroo i te mana o te Atua o te aratai i ta tatou ohipa. Hau atu â, te pûpû ra tatou i te haamaitairaa e faaroo e e farii i te poroi o te tiaturiraa na ratou. (Tim. 1, 2:3, 4) E faaohipa anaˈe ïa ma te paari i te taime e toe ra, e e tutava anaˈe i te pee i te huru pae tahi ore o Iehova ma te faaite i te parau apî maitai i te rahiraa o te mau taata.—Roma 2:11, Eph. 5:1, 2.