Te poro ra anei tatou ma te hoê tapao?
1 E mau tapao ta te Atua ra o Iehova (Isa. 55:10, 11) e te faaitoitohia ra tatou ia pee i to ˈna hiˈoraa. (Eph. 5:1) E tano iho â râ te reira i te huru raveraa i ta tatou taviniraa. No reira, teie te uiraa: “Te poro ra anei tatou ma te hoê tapao?”
2 Ua riro te pororaa i tera e tera fare, te pororaa faanaho-ore-hia e te opereraa i te mau papai ei tuhaa no te hoê taviniraa te vai ra te hoê tapao. E haamanaˈo anaˈe râ e ere ta tatou hopoia i te poro-noa-raa, te faariroraa atoa râ i te taata ei pǐpǐ. (Mat. 28:19, 20) I muri aˈe i te ueueraa i te mau huero o te parau mau no nia i te Basileia, e tia ia tatou ia hoˈi e pîpî e ia haapao tamau i te reira, ma te tiaturi ia Iehova no te faatupu. (Kor. 1, 3:6) E tia ia tatou ia rave maite i te mau hoˈi-faahou-raa e farerei e ia tutava i te haamata i te mau haapiiraa Bibilia.
3 E faaaano anaˈe i ta tatou taviniraa: E oaoa noa iho â tatou ia hiˈo tatou i muri i te mau ohipa i ravehia e tatou i roto i te taviniraa e ia nehenehe tatou e parau e: “Ua noaa ia ˈu te tapao ta ˈu i haamau.” Ia au i te Timoteo 2, 4:5 [MN], ua aˈo o Paulo e: “E rave faahope roa i [ta oe taviniraa].” E titauhia râ te mau tutavaraa no te haapao i te mau anaanatae atoa. I roto i te taime ta outou e manaˈo ra e faaohipa i roto i te taviniraa i te hebedoma taitahi, a faaherehere i te hoê taime papu no te mau hoˈi-faahou-raa e farerei. A tutava i te haamata i te hoê haapiiraa Bibilia e te mau taata mea au na ratou te parau-tia. O te tapao ïa te tia ia tatou ia haamau i roto i te taviniraa.
4 A ani i te tahi feia poro eaha to ratou huru i to ratou iteraa ˈtu i te feia ta ratou i haapii na i te Bibilia i te bapetizoraahia i te hoê tairururaa. Ua oaoa ratou, peneiaˈe hoê â faitoraa e te feia bapetizohia. Oia mau, ua noaa ia ratou te hoê tapao nehenehe mau! Ua faaite te hoê vahine Kerisetiano tei faariro i te taata ei pǐpǐ i to ˈna mau manaˈo hohonu ma te parau e: “Ia faariro tatou i te taata ei pǐpǐ, e rahi atu â ïa te feia arue ia Iehova. E noaa atoa te ora i te feia e farii i te parau mau. Mea au roa na ˈu ia haapii i te parau mau ia vetahi ê—e mea faahiahia mau! . . . E rave rahi feia e here ra ia Iehova i teie nei o tei riro ei mau hoa here roa no ˈu.”
5 A feruri na e ua nehenehe outou e tauturu i te hoê taata ia riro mai ei tavini no Iehova. Auê ïa te oaoa e! E ooti tatou i teie mau hotu ia rohi tatou i roto i te taviniraa ma te hoê tapao.—Kol. 4:17.