Te haereraa i te haapiiraa e ta outou mau fa i te pae varua
1 E tauturu te hoê haapiiraa maitai i te haapiiraa tuatahi i to outou apîraa ia outou ia taio e ia papai maitai, e ia noaa te hoê ite rahi i te pae teotarafia, aamu, matematika e aivanaa. E i te roaraa o te mau matahiti, e haapii outou i te feruri maite, i te hiˈopoa i te mau tupuraa, i te faatitiaifaro i te mau fifi e i te faahiti e rave rahi mau manaˈo. E faufaahia outou i teie haapiiraa i roto i to outou oraraa atoa, tera râ eaha to ˈna taairaa e ta outou mau fa i te pae varua i roto i te oraraa, e nafea te reira e nehenehe ai e tauturu ia outou ia noaa “te paari maitai e te haapao”?—Mas. 3:21, 22.
2 Ia faufaa mau outou i roto i te taviniraa a te Atua: I te fare haapiiraa, a faaroo maite i te mau haapiiraa e i te fare, a rave maite i ta outou mau ohipa haapiiraa. Mai te peu e e haapii maite outou i te taio e e haamatau maitai outou i te haapii, e tuatapapa ohie ïa outou i te Parau a te Atua e e vai puai noa outou i te pae varua. (Ohi. 17:11) E tauturu te hoê haapiiraa aano ia outou ia taa maite i te mau taata e rau to ratou tiaraa totiale, ta ratou haapaoraa mau anaanataeraa, ta outou e nehenehe e farerei i roto i te taviniraa. Mea faufaa te ite e noaa ia outou i te fare haapiiraa no te amo i te mau hopoia Kerisetiano i roto i te faanahonahoraa a te Atua.—Hiˈo Timoteo 2, 2:21; 4:11.
3 A haapii i te aupuru i to outou mau hinaaro: Mai te peu e e haapao maitai outou, e nehenehe atoa outou e aravihihia no te manuïaraa i roto i te oraraa ia oti ta outou mau haapiiraa. (Hiˈo Timoteo 1, 5:8.) A maiti maite i te mau haapiiraa ta outou e rave atu. Maoti i te rave i te mau haapiiraa o te aratai i nia i te mau ohipa varavara, a opua i te haapii i te hoê toroa aore ra a rave i te mau haapiiraa o te aratai ia outou i nia i te hoê ohipa papu. (Mas. 22:29) Maoti teie nei faaineineraa, e nehenehe ïa outou e aupuru i to outou mau hinaaro ia opua outou i te tavini i te mau vahi e hinaaro-rahi-hia ra.—Hiˈo Ohipa 18:1-4.
4 Mea faufaa te hoê haapiiraa maitai i noaa mai i te tau haapiiraa no te faaaano i ta outou nei taviniraa. No reira ma te haere atoa i mua i roto i te taviniraa ia Iehova, a tutava e ia noaa te mau ite aravihi o te tauturu ia outou ia aupuru i to outou mau hinaaro. Ia na reira outou, e tauturu ta outou mau matahiti haapiiraa ia naea ia outou ta outou mau fa i te pae varua.